ممبئی (نیا اخبار رپورٹ) بولی وڈ اداکار ورون دھون نے اپنے مداحوں کو ماہ رمضان کی مبارکباد دی اور یہ بھی بتایا کہ اپنے مسلمان مداحوں کے ساتھ آج انہوں نے بھی رمضان کا روزہ رکھا۔ ڈیوڈ دھون کے بیٹے ورون دھون نے اپنے انسٹاگرام پر ایک ویڈیو شیئر کی، جس میں وہ اپنے جم میں موجود ہیں۔ اس ویڈیو کا آغاز انہوں نے سب کو سلام کرنے کے ساتھ کیا اور کہا کہ سب کو معلوم ہے کہ رمضان شروع ہوگیا ہے اور یہ بہت ہی مقدس وقت ہے جب میرے تمام مسلم بھائی اور بہنوں نے روزہ رکھنا شروع کردیا ہے۔ اداکار نے مزید کہا کہ آج میں نے اور میرے دوستوں نے بھی روزہ رکھا ہے۔ وہ اپنی اس ویڈیو میں جم میں ورزش کرتے بھی نظر آئے۔ خیال رہے کہ ورن دھون کی بڑھتی مقبولیت کے باعث ان کی فین فالوونگ میں بھی دن با دن اضافہ ہورہا ہے، ان کی اس ویڈیو کو بھی دنیا بھر میں موجود مداحوں نے پسند کیا جبکہ انہیں رمضان کی مبارکباد بھی دی۔ ورون دھون کے علاوہ بولی وڈ کے لیجنڈری اداکار امیتابھ بچن نے بھی ٹوئٹر پر اپنی تصویر شیئر کرنے کے ساتھ مداحوں کو رمضان کی مبارکباد دی۔ امیتابھ کے علاوہ رشی کپور بھی ماہ رمضان کی مبارکباد دینے والے اداکاروں کا حصہ بنے۔
