انجامینا(ویب ڈیسک) افریقی ملک چاڈ میں شدت پسند تنظیم باکو حرام نے فوجی اڈے پر حملہ کردیا جس کے نتیجے میں 100 اہلکار ہلاک اور متعدد زخمی ہوگئے۔افریقی ملک چاڈ کے ایک جزیرے میں واقع فوجی اڈے پر بوکو حرام کے جنگجووں نے دھاوا بول دیا، چاڈ فوجیوں اور جنگجووں کے درمیان 7 گھنٹے تک گھمسان کی جنگ جاری رہی۔بوکوحرام کے جنگجو اسپیڈ بوٹس کے ذریعے جزیرے پر پہنچے اور آرمی بیس پر حملہ کردیا۔ جنگجووں نے فوجی گاڑیوں کو بھی نذر آتش کردیا اور جاتے ہوئے اسلحہ اور فوجی ساز و سامان بھی ساتھ لے گئے۔ حملہ اتنا اچانک تھا کہ فوجیوں کو سنبھلنے کا موقع نہ مل سکا۔ چاڈ میں 2009 سے بوکو حرام اور سیکیورٹی فورسز کے درمیان جھڑپوں کا سلسلہ جاری ہے اور بیشتر علاقوں میں جنگجووں کا تسلط ہے۔ جھڑپوں میں بڑے پیمانے پر معصوم شہریوں کا جانی اور مالی نقصان ہوا ہے۔
