دبئی(ویب ڈیسک)متحدہ عرب امارات میں حالیہ دِنوں کورونا وائرس کی وبا کے باعث عوامی مفاد میں بہت سارے فیصلے لیے لئے جا رہے ہیں، جن کے باعث مقامی اور تارکین دونوں کو بہت فائدہ پہنچ رہا ہے۔ دبئی کے حکمران شیخ محمد بن راشد المکتوم نے اعلان کیا ہے کہ مملکت میں مقیم تمام تارکین وطن کو رواں سال کے دوران ویزہ خلاف ورزیوں کی بناءپر کوئی جرمانہ عائد نہیں کیا جائے گا۔اگر اس سال کے دوران کسی تارک پر کوئی جرمانہ عائد کیا گیا ہے تو اسے بھی منسوخ کر دیا گیا ہے۔اس فیصلے سے ان لوگوں کو فائدہ ہو گا جن کے ویزوں کی مدت ختم ہو جانے کے باعث ان پر جرمانے عائد کیے گئے ہیں، یا مستقبل میں ان کے ویزوں کی مدت ختم ہو جائے گی۔ تارکین وطن کے مفاد میں یہ اہم فیصلہ کابینہ کے تازہ ترین اجلاس کے دوران لیا گیا۔یہ اجلاس آن لائن منعقد ہوا۔اجلاس کے دوران کئی اہم فیصلے لیے گئے۔ اس موقع پر شیخ محمد راشد جو کہ متحدہ عرب امارات کے نائب صدر اور وزیر اعظم بھی ہیں، انہوں نے فیکٹریز کو ہدایت کی کہ وہ صحت کے شعبے میں درکار طبی آلات اور ساز و سامان کی تیاری میں تیزی لائیں، تاکہ کورونا کے باعث جنم لینے والی صورت حال سے بہتر انداز میں نمٹا جا سکے۔ واضح رہے کہ31 مارچ 2020ءکو متحدہ عرب امارات کی وفاقی کابینہ کے اجلاس میں رہائشی ویزوں کے حوالے سے اہم فیصلہ لیا گیا تھا جس کے مطابق جن تارکین وطن کے رہائشی ویزوں کی مدت یکم مارچ 2020ءسے قبل ختم ہو گئی ہے، ان کے ویزوں کی مدت میں اگلے تین ماہ کے لیے تجدید کرانے پر کوئی فیس وصول نہیں کی جائے گی۔رہائشی ویزوں کے حوالے سے یہ فیصلہ مملکت میں کورونا وائرس کی وبا کے باعث پیدا ہونے والے حالات کے باعث لیا گیا ہے۔اس کے علاوہ رہائشی ویزوں سے متعلق کسی خلاف ورزی کی بناءپر عائد ہونے والے جرمانے بھی وصول نہیں کیے جائیں گے۔ کابینہ کے اس فیصلے کا مقصد مقامی افراد، تارکین وطن اور سیاحوں کی صحت اور زندگی کے تحفظ کو یقینی بنانا ہے۔ کابینہ کے اجلاس میں ایک اور اہم فیصلہ یہ کیا گیا کہ یکم اپریل 2020ءسے اگلے تین ماہ کے لیے نیشنل اتھارٹی فار آئیڈنٹٹی اینڈ نیشنلٹی کی جانب سے مہیا کی جانے والی خدمات سے متعلق خلاف ورزیوں پر بھی کوئی جرمانہ وصول نہیں کیا جائے گا۔کابینہ نے عدالتی امور سے متعلق رقوم ڈیجیٹل ٹرانزیکشن ٹیکنالوجی کے ذریعے ادا کرنے کی خاطر عارضی لائسنس جاری کرنے کا بھی اعلان کیا ہے۔ تاکہ عدالتی عملے اور مقامی و تارکین وطن سب کی زندگیوں کا تحفظ ہو سکے۔ اس فیصلے سے آن لائن طریقے سے ہی رقوم جمع کرا دی جائیں گی۔ جبکہ جن افراد کی سرکاری خدمات سے متعلق دستاویزات کی مدت یکم مارچ 2020ءکو ختم ہو گئی تھی، انہیں بھی یکم اپریل سے تین ماہ کے لیے توسیع دی جا رہی ہے۔ اس فیصلے کا اطلاق تمام وفاقی سروسزبشمول دستاویزات، پرمٹس، لائسنس اور کمرشل رجسٹریشن وغیرہ پر ہو گا۔ تارکین وطن نے رہائشی ویزوں کی مدت میں بلامعاوضہ توسیع کو بہت خوش آئند قرار دیا ہے۔
