وزیرِ اعلیٰ سندھ مراد علی شاہ نے کراچی سے متصل جزیرہ نما منوڑہ میں سینڈز پٹ بیچ روڈ کا افتتاح کر دیا۔
منوڑہ بیچ روڈ کی افتتاحی تقریب سے خطاب کرتے ہوئے وزیر اعلیٰ سندھ مراد علی شاہ نے کہا کہ میرے لیے خوشی کا مقام ہے کہ ضلع کیماڑی میں پہلا ایونٹ کر رہا ہوں، ہمیں اس ضلع کے لوگوں کی مشکلات کا علم ہے۔
وزیراعلیٰ سندھ نے کہا کہ کیماڑی کو ماڈل ضلع بنائیں گے، یہاں کے لوگوں کو ملازمتیں دیں گے۔
مرادعلی شاہ کا مزید کہنا تھا کہ پاک بحریہ کا ہمیشہ کراچی کی ترقی میں تعاون رہا ہے، پاک بحریہ کے منصوبوں میں مقامی افراد کو بھرتی کیا جائے۔
انہوں نے کہا کہ سندھ حکومت کراچی کی ترقی کے لیے کام کر رہی ہے، کراچی میں سیوریج اور کچرے کے مسئلہ کو جلد حل کریں گے، کراچی میں سیوریج اور گاربیج کا مسئلہ سنگین ہے۔
افتتاحی تقریب سے خطاب کرتے ہوئے مراد علی شاہ کا کہنا ہے کہ کراچی پیکیج پر کمیٹی کا پہلا اجلاس پیر کو ہو گا۔
مراد علی شاہ نےکہا کہ 11 سو ارب روپے کے پیکیج میں شامل بیشتر منصوبوں پر کام جاری ہے، بعض نئے منصوبے وفاق کو شروع کرنے ہیں۔
