وزیراعظم آزادکشمیرراجہ محمد فاروق حیدر خان نے کہا کہ عوام 25 جولائی کو ووٹ کی پرچی سے علی آمین اور عمران خان کا منصوبہ ناکام بنائے گی۔
تفصیلات کے مطابق وزیراعظم آزادکشمیر راجہ محمد فاروق حیدر خان نے اپنے ایک بیان میں کہا کہ علی امین گنڈاپور نے پابندی کے باوجود آزادکشمیر آکر تقریر کی اس سے یہ واضح ہوگیا کہ عمران خان اور وزراء کی نظر میں آزادکشمیر کے آئین و قانون کی کوئی حیثیت نہیں۔
انہوں نے کہا کہ اگر علی امین گنڈاپور آزادکشمیر کے قانون و ضابطے کو نہیں مانتے ، کل کو یہاں کے لوگ کہیں کہ ہم پاکستان کے قانون کو نہیں مانتے تو کیا کرینگے ؟
وزیراعظم آزادکشمیر نے کہا کہ پاکستان کی حکومت وزیراعظم اور وزراء کا ہماری ریاست کے آئین و قانون کے ساتھ رویہ قابل مذمت ہے ، عمران خان علی آمین گنڈاپور اور اس کے حواری خطے میں پاکستان کے مفادات کو نقصان پہنچا کرکس کے ایجنڈے کی تکمیل کررہے ہیں؟
راجہ محمد فاروق حیدر خان نے کہا کہ ن لیگ آزادکشمیر اور مہاجرین کے حلقوں میں سے واضح اکثریت سے جیت رہی ہے پی ٹی آئی کی بوکھلاہٹ اس کا ثبوت ہے ، آزادکشمیر عمران خان کے لیے ترنوالہ ثابت نہیں ہوا ، لوگوں کے جذبے کو سلام پیش کرتا ہوں ، آزادکشمیر کے لوگو یاد رکھنا 25جولائی کو ریاست کے تشخص آئین و قانون کو جوتے کی نوک پر رکھنے والوں سے پرچی کے ذریعے انتقام لینا ہے۔
