آئین شکنی کرنیوالوں کو معاف نہیں کیا جائیگا، عمران نیازی مگر مچھ کے آنسو بہا رہا ہے: حمزہ شہباز

لاہور: (ویب ڈیسک) صوبہ پنجاب کے نو منتخب وزیراعلیٰ حمزہ شہباز نے خبردار کرتے ہوئے کہا ہے کہ آئین شکنی کرنے والوں کو معاف نہیں کیا جائے گا، سلیکٹڈ کے خلاف کوئی سازش نہیں ہوئی، یہ نااہل تھے، عمران نیازی مگر مچھ کے آنسو بہا رہا ہے، یہ کھلاڑی نہیں اس نے عوام کے ساتھ کھلواڑ کیا۔
پاکستان مسلم لیگ (ن) سے تعلق رکھنے والے نو منتخب وزیراعلیٰ پنجاب حمزہ شہباز نے حلقہ این اے -128 میں منعقدہ جلسہ عام سے خطاب کرتے ہوئے استفسار کیا کہ آئی ایم ایف سے بھیک مانگنے والے نے خودکشی کیوں نہیں کی؟
انہوں نے دعویٰ کیاکہ عمران نیازی کا نوجوانوں سے ایک کروڑ نوکریوں کا وعدہ دراصل سازش تھی، آج خیبر پختونخوا، سندھ اور پنجاب میں لاکھوں لوگ بے روزگار ہو چکے ہیں، 50 لاکھ گھر تو دور کی بات 50 ہزار گھر بھی عوام کو نہیں ملے۔
حمزہ شہباز نے کہا کہ کورونا کے دوران پینا ڈال دستیاب نہیں تھی، عمران نیازی کی کابینہ میں مافیاز کے سربراہ بیٹھے ہوتے تھے، جس نے غریبوں سے دوا چھینی عمران نیازی نے اس کو ترقی دی، عمران نیازی نے عوام کی جبپ پر ڈاکہ ڈالا۔
جلسہ عام سے خطاب کرتے ہوئے حمزہ شہباز نے کہا کہ شہباز شریف کے وزیراعظم بننے پر عمران نیازی کے پیٹ میں درد ہو رہا ہے، چار سال تک عمران خان نے شریف خاندان سے بدترین انتقام لیا لیکن نواز شریف اور شہباز شریف کے خلاف ایک پائی کی کرپشن بھی ثابت نہیں ہوئی۔