پاکستان کواس وقت کسی سیاسی ایڈونچر کی ضرورت نہیں : احسن اقبال

کراچی : (ویب ڈیسک) رہنما مسلم لیگ ن احسن اقبال نے کہا ہے کہ پاکستان کو اس وقت کسی سیاسی ایڈونچر کی ضرورت نہیں ، نہ پاکستان ڈیفالٹ کرے گا نہ کرنے دینگے، ہم ملکی مفاد میں فیصلے کریں گے ۔
کراچی میں میڈیا سے بات کرتے ہوئے مسلم لیگ ن رہنما اور وفاقی وزیر پلاننگ احسن اقبال نے کہاکہ اس وقت ملک معاشی بحران کی زد میں ہے ، ہماری حکومت آنے سے قبل خزانہ خالی تھا، اس وقت کہا جارہا تھا پاکستان سری لنکا بن جائے گا، ہم نے مشکل فیصلے کیے اور پاکستان کی معیشت کو دوبارہ سنبھالا۔
ان کاکہنا تھا کہ ہمارے ملک کے اندر سے ایک جماعت مسلسل منفی پروپیگنڈہ کررہی ہے، اس وقت ملک کی تمام قیادت کو معاشی چیلنجز کا سمجھداری سے مقابلہ کرنا چاہیے ، پاکستان کو اس وقت معاشی استحکام کی ضرورت ہے۔
احسن اقبال نے مزید کہا کہ کراچی پاکستان کا سب سے زیادہ تعلیم یافتہ شہر ہے، کراچی نے اس جماعت کا کچومر نکال دیا،جس نے گزشتہ 4سال میں ملکی معیشت کا کچومر نکالا تھا۔
انہوں نے کہا کہ عوام حقائق جانتے ہیں،عوام یہ دیکھ رہے ہیں کہ اس وقت ملک کو کون بچا رہا ہے، کراچی کے الیکشن نے ہمیں بڑا حوصلہ دیا ہے، جیسے کراچی کے عوام نے جھوٹ کی سیاست کو مسترد کیا ہے، پنجاب اور خیبر پختونخوا کے عوام بھی جھوٹ کی سیاست کو مسترد کریں گے۔
احسن اقبال نے مزید کہا کہ آج اگر کسی نے اپنی سیاست بچانی ہے تو اس کو ریاست بچانے کے لئے کردار ادا کرنا ہوگا، وہ جماعت جو دعویٰ کرتی تھی کہ اس کے پاس 14سیٹیں ہیں اس کا کراچی میں وائٹ واش ہوگیا۔
رہنما مسلم لیگ نے سابق وزیراعظم کے بارے میں بات کرتے ہوئے کہا کہ نوازشریف ہمارے قائد ہیں، ہر شخص کو سمجھ آگئی ہے 2017میں نوازشریف کے خلاف جو سازش کی گئی تھی دراصل وہ سازش پاکستان کے مستقبل کے خلاف تھی۔
ان کا کہنا تھا کہ نوازشریف کو ایک جھوٹے کیس میں نااہل کیا گیا، ہمیں یقین ہے اس ناانصافی کا ازالہ ہوگا، نوازشریف صاحب واپس آئیں گے اور اگلے الیکشن میں پارٹی کو لیڈ کریں گے۔