معروف روسی ملٹری بلاگر ولادلین تاتارسکی بم دھماکے میں ہلاک

ماسکو:(ویب ڈیسک) معروف روسی ملٹری بلاگر ولادلین تاتارسکی سینٹ پیٹرزبرگ کے ایک کیفے میں ہونے والے بم دھماکے میں ہلاک ہو گیا ۔
غیر ملکی خبر رساں ادارے کے مطابق سٹریٹ فوڈ بار نمبر 1 کیفے میں ہونے والے دھماکے میں تاتارسکی ہلاک ہو گیا جبکہ علاقائی گورنر الیگزینڈر بیگلوف نے بتایا کہ دھماکے کے نتیجے میں پچیس افراد زخمی ہوئے جن میں سے 19 کو ہسپتال میں منتقل کیا گیا ہے۔
تاتارسکی کے ٹیلی گرام پر 560,000 سے زیادہ فالوورز تھے اور وہ ان بااثر ملڑی بلاگرز میں سے ایک تھے جنہوں نے یوکرین جنگ پر اکثر تنقیدی تبصرے کئے ہیں۔
سینٹ پیٹرزبرگ کی ایک ویب سائٹ کے مطابق دھماکا ایک کیفے میں ہوا جس کا تعلق ویگنر گروپ کے بانی یوگینی پریگوزن سے تھا، روسی میڈیا اور ملٹری بلاگرز نے کہا کہ تاتارسکی لوگوں سے ملاقات کر رہے تھے ، ایک خاتون نے انہیں ایک باکس پیش کیا جو پھٹ گیا۔
نیشنل انویسٹی گیشن کمیٹی کا کہنا ہے کہ واقعہ کی تحقیقات کا آغاز کر دیا گیا ہے تاہم ابھی اس سے متعلق یہ نہیں کہا جا سکتا کہ اس کا ذمہ دار کون ہے جبکہ وزارت داخلہ کا کہنا ہے کہ دھماکے کے وقت کیفے میں موجود تمام لوگوں کے بارے جانچ پڑتال کی جا رہی ہے۔
روس کی وزارت خارجہ نے تاتارسکی کو خراج تحسین پیش کرتے ہوئے حملے پر ردعمل ظاہر نہ کرنے پر مغربی حکومتوں کو تنقید کا نشانہ بنایا ہے۔
دوسری جانب یوکرین کا کہنا ہے کہ مشرقی یوکرین میں باخموت کے قریب واقع ایک صنعتی شہر کوسٹیانتینیوکا میں بھاری روسی گولہ باری کے نتیجے میں کم از کم چھ شہری ہلاک ہو گئے ہیں۔
صدارتی سٹاف کے سربراہ آندری یرماک نے سوشل میڈیا پر جاری اپنے بیان میں بتایا کہ روسی میزائلوں اور راکٹوں سے 16 اپارٹمنٹ بلاکس اور ایک نرسری سکول سمیت دیگر عمارتوں کو بھی نقصان پہنچا۔