چیئر پرسن چائلڈ پروٹیکشن بیورو سارہ احمد نے بچوں میں عید گفٹس تقسیم کئے

لاہور:(ویب ڈیسک) چائلڈ پروٹیکشن بیورو کی چیئر پرسن سارہ احمد نے بچوں میں شاندار عید گفٹس تقسیم کئے، تحائف ملنے پر بچوں کی خوشی کا کوئی ٹھکانہ نہ تھا۔
چیئرپرسن چائلڈ پروٹیکشن بیورو سارہ احمد نے لاہور بیورو آفس میں افطاری کے وقت خصوصی تقریب کا اہتمام کیا، چائلڈ پروٹیکشن بیورو میں مقیم بچے تقریب کے مہمانان خاص تھے۔
افطاری میں بچوں نے مزے مزے کے کھانے کھائے، جس کے بعد چیئرپرسن سارہ احمد نے بچوں میں عید گفٹس تقسیم کئے۔
اس موقع پر گفتگو کرتے ہوئے سارہ احمد نے کہا کہ بیورو میں بچوں کو گھر جیسا ماحول فراہم کیا گیا ہے، انہیں سحری و افطاری دی جا رہی ہے جبکہ عید قریب آتے ہی تحائف بھی دئیے گئے ہیں تاکہ وہ عید کی خوشیوں میں بھرپور شریک ہو سکیں۔
عید کے تحفے ملنے پر بچے خوشی سے پھولے نہ سمائے، چائلڈ پروٹیکشن بیورو کی انتظامیہ کی جانب سے بھرپور خیال رکھنے پر بچوں نے اطمینان کا اظہار کیا۔
چائلڈ پروٹیکشن بیورو کی انتظامیہ نے عید پر بچوں کو تفریح کے دیگر پروگرامز کی خوشخبری بھی سنائی۔