ممبئی: (ویب ڈیسک) بالی ووڈ کی معروف اداکارہ الیانا ڈی کروز نے اپنے مداحوں کو خوشخبری سنائی ہے کہ ان کے گھر اب جلد ہی ایک ننھے مہمان کی آمد متوقع ہے۔
الیانا ڈی کروز نے فوٹو اینڈ ویڈیو شیئرنگ ایپ انسٹاگرام پر دو نئی تصاویر شیئر کی ہیں۔
اداکارہ کی جانب سے شیئر کی گئی پہلی تصویر میں ایک چھوٹے بچے کے کپڑے نظر آرہے ہیں جبکہ دوسری تصویر میں اداکارہ کا پینڈینٹ دیکھا جاسکتا ہے جس کے اوپر لفظ ’ماما‘لکھا ہوا ہے۔
انہوں نے یہ تصاویر شیئر کرتے ہوئے لکھا کہ’میری چھوٹی ڈارلنگ میں آپ سے ملنے کے لیے بہت بے صبری سے انتظار کر رہی ہوں‘۔
یاد رہے کہ کچھ سال قبل الیانا ڈی کروز ایک آسٹریلوی فوٹوگرافر اینڈریو کنیبون کو ڈیٹ کر رہی تھیں اور یہ خبر بھی سامنے آئی تھی کہ ان دونوں نے شادی کرلی ہے تاہم 2019 میں ان دونوں نے اپنی راہیں جدا کر لی تھیں۔
بعد ازاں یہ خبریں گردش کرنے لگیں کہ الیانا ڈی کروز کے اپنی ساتھی اداکارہ کترینہ کیف کے بھائی سبستین لارینٹ مشیل کے ساتھ قریبی تعلقات ہیں۔
صرف اتنا ہی نہیں بلکہ یہ دونوں کترینہ کیف، وکی کوشل اور دیگر کے ساتھ مالدیپ بھی گئے تھے۔
الیانا ڈی کروز نے ابھی تک اس حوالے سے خاموشی اختیار کی ہوئی ہے کہ انہوں نے شادی کی ہے یا نہیں اور اپنی انسٹا گرام پوسٹ میں بچے کے باپ کی شناخت بھی ظاہر نہیں کی۔
