شام میں بشار الاسد کی حکومت کے دوران مخالفین کو گرفتار کرکے زیر زمین جیلوں میں رکھا گیا تھا جن کا کسی طرح باہر کی دنیا سے رابطہ نہیں تھا۔
عالمی خبر رساں ادارے کے مطابق شام میں انسانی حقوق کے لیے کام کرنے والی تنظیم المرصد کے ڈائریکٹر نے بتایا کہ شمال مغربی علاقے الساحل السوری میں متعدد جیلیں زیر زمین موجود ہیں۔
ان خطرناک زیر زمین جیلوں میں سیاسی مخالفین کو بھی رکھا جاتا تھا جن میں خواتین اور بچے بھی شامل ہیں۔
العربیہ نیوز سے گفتگو میں ڈائریکٹر رامی عبد الرحمان نے بتایا کہ شامی سیکیورٹی فورسز کی متعدد خفیہ جیلیں مخالفین سے بھری ہوئی ہیں۔
ڈائریکٹر المرصد نے مزید کہا کہ شامی فوج کے متعدد سینیئر افسران نامعلوم مقام پر چھپے ہوئے ہیں جن سے خفیہ جیلوں کے متعلق پوچھ گچھ کی جائے گا۔
بشار الاسد کے بھائی ماہر الاسد کے مارے جانے کی تصدیق کرتے ہوئے المرصد کے ڈائریکٹر نے بتایا کہ خفیہ جیلوں کے قیدیوں کا رابطہ ان کے اہل خانہ سے بھی نہیں ہے۔
یاد رہے کہ شام میں بشار الاسد کا دھڑن تختہ کرنے والے مسلح باغیوں کو بھی ایسی زیر زمین جیلیں ملی ہیں جن تک پہنچنے کے لیے کھدائی کرنا پڑی ہے۔
