ایلون مسک ٹیکنالوجی اور مصنوعی ذہانت کے فروغ کے حوالے سے خبروں میں رہتے ہیں۔ ایسے ہی ان کی ایک ویڈیو انٹرنیٹ پر وائرل ہوئی جس میں وہ ایک روبوٹ سے بال کٹوا رہے ہیں۔
ویڈیو میں روبوٹ حجام نہ صرف ایلون مسک سے یہ پوچھتا ہے کہ وہ کس قسم کے بال کٹوائیں گے بلکہ ان کے ساتھ خوش گپیاں بھی کرتا نظر آتا ہے۔
ویڈیو میں دیکھا جاسکتا ہے کہ روبوٹک حجام بڑی مہارت سے قینچی چلاتے ہوئے ایولن مسک کے بال تراش رہا ہے اور اس کی حرکات بالکل انسانوں جیسی ہیں۔
ویڈیو سے یہ تاثر ابھر رہا ہے جیسے یہ باربر روبوٹ ایلون مسک کی ہی تخلیق ہے اور وہ ویڈیو میں اپنی تخلیق پر خوش نظر آرہے ہیں۔
مذکورہ ویڈیو کو مختلف پلیٹ فارمز سے بار بار شیئر کیا گیا اور یہ اطلاعات پھیلنا شروع ہوئیں کہ ایلون مسک کا تیار کردہ روبوٹ انسانوں کی طرح بال بھی تراش سکتا ہے۔ صارفین کی جانب سے ویڈیو کے کمنٹس سیکشن میں مختلف آرا بھی پیش کی گئیں۔
تاہم فیکٹ چیک کے بعد یہ حقیقت سامنے آئی ہے کہ ایلون مسک کی روبوٹ سے بال کٹواتے ہوئے ویڈیو دراصل مصنوعی ذہانت (اے آئی) سے تیار کی گئی ہے۔
دلچسپ بات یہ ہے کہ جہاں یہ ویڈیو پہلی بار شیئر کی گئی تھی اس کے کیپشن میں بالکل نیچے یہ بات درج بھی تھی کہ یہ ویڈیو اے آئی کی مدد سے تخلیق کی گئی ہے لیکن اس کے باوجود کئی سوشل میڈیا صارفین نے اس پر یقین کرلیا۔
