میونسپل کارپوریشن کی غفلت، راولپنڈی ایک بار پھر "تجاوزات سٹی” بن گیا

راولپنڈی(سٹی رپورٹر) میونسپل کارپوریشن راولپنڈی کے شعبہ انسداد تجاوزات اور پیرا فورس کی مبینہ پراسرار خاموشی سے راولپنڈی ایک بار پھر
"تجاوزات سٹی” بن گیا جس سے شہر بھر میں پارکنگ کا مسئلہ بھی سنگین صورتحال اختیار کر گیا کارپوریشن کی جانب سے تجاوزات مافیا کے خلاف کاروائی کی بجائے ٹریفک پولیس نے خریداری کے لئے آنے والے شہریوں کے چالان اور لفٹر سے گاڑیاں اٹھانا معمول بنا لیا شہر کے تمام کاروباری و تجارتی مراکز، رہائشی علاقوں کی دکانوں و مارکیٹوں کے ساتھ سڑکوں چوراہوں اور فٹ پاتھوں پر تجاوزات مافیا نے پنجے گاڑ لئے جس سے نہ صرف مختلف علاقوں میں ٹریفک جام معمول بن گیا بلکہ راہ گیروں اور خریداروں بالخصوص خواتین کا پیدل چلنا بھی ناممکن ہوچکا ہے عوامی شکایات کے مطابق صادق آباد، مسلم ٹان، ڈھوک کھبہ، کمرشل مارکیٹ، ڈھوک علی اکبر، ڈھوک کالا خان، خیابان سرسید، اندرون شہر اقبال روڈ، چائنہ مارکیٹ، لیاقت روڈ، باڑہ مارکیٹ، بازار تلواڑاں، اردو بازار، بوہڑ بازار، بھابھڑہ بازار، سرکلر روڈ، صرافہ بازار، جامع مسجد روڈاور پرانا قلعہ سمیت دیگر کاروباری مراکز مارکیٹوں اور بازاروں میں گزشتہ 1 ماہ سے تجاوزات مافیا ایک بار پھر منظم ہوگیا ہے ٹھیلہ وریڑھی بانوں اور چھابڑی فروشوں نے اندرون شہر فٹ پاتھوں اور سڑکوں پر قبضے جمالیئے ہیں تاجروں کی جانب سے دکانوں کے سامنے ترچھے رخ موٹر سائیکلیں کھڑی کر کے دکانوں کے باہر 8 سے 10 فٹ کا حصار قائم کر لیا جاتا اس کے آگے گاڑیاں بھی کھڑی کردی جاتی ہیں جس سے بیرونی علاقوں اور مضافات سے شہر میں خریداری کیلئے آنیوالوں کو سخت مشکلات پیش آتی ہیں اسی طرح رہی سہی جگہوں پر بائیکیا و رکشہ سٹینڈ نے قبضے جما رکھے ہیں گھنٹوں ٹریفک جام معمول بن چکا ہے جس کی وجہ سے مردوں بالخصوص خواتین کا پیدل چلنا بھی عذاب بن گیا ہے اس تمام صورتحال میں میونسپل کارپوریشن میں میونسپل افسر ریگولیشن کی سیٹ گزشتہ طویل عرصے سے خالی پڑی ہے جبکہ کارپوریشن کے شعبہ تجاوزات کے عملہ نے بھی مکمل چپ سادھ رکھی ہے شہریوں نے کمشنر راولپنڈی سعید غنی سے تجاوزات کیخلاف سخت آپریشن کرنے اور ذمہ دار افسران واہلکاروں کیخلاف سخت کاروائی کا مطالبہ کیا ہے۔