کراچی میں مبینہ پولیس مقابلہ، 19 سال سے گاڑیاں چوری کرنیوالا ملزم ہلاک

کراچی (این این آئی) شہر قائد کے علاقے کورنگی شاہ فیصل کالونی میں اینٹی وہیکل لفٹنگ سیل (اے وی ایل سی) اور ملزمان کے درمیان مبین پولیس مقابلے کے دوران 19 سال سے گاڑیاں چوری کرنے والے ایک مبینہ کار لفٹر کو ہلاک کر دیا گیا جبکہ اس کے دو ساتھی فرار ہونے میں کامیاب ہوگئے۔ ایس ایس پی اے وی ایل سی کے مطابق ہلاک ہونے والے ملزم کی شناخت در محمد بروہی ولد شیر علی کے نام سے ہوئی ہے جو مبینہ طور پر ایک بین الصوبائی کار لفٹر گینگ کا سرگرم رکن تھا۔ پولیس حکام کے مطابق ملزم کے خلاف کراچی کے مختلف تھانوں میں گاڑی چوری، پولیس مقابلے، ناجائز اسلحہ اور منشیات سمیت مختلف نوعیت کے 47 مقدمات درج تھے۔ پولیس حکام نے کہاکہ در محمد بروہی ماضی میں سات مرتبہ گرفتار بھی ہو چکا تھا تاہم رہائی کے بعد دوبارہ جرائم پیشہ سرگرمیوں میں ملوث رہا۔ حکام کے مطابق مقابلے کے بعد ملزم کے قبضے سے سعید آباد تھانے کی حدود سے چوری کی گئی ایک گاڑی اور غیر قانونی اسلحہ برآمد کیا گیا۔ برآمد شدہ گاڑی اور اسلحے کو تحویل میں لے کر مزید قانونی کارروائی شروع کر دی گئی ہے۔ اے وی ایل سی حکام نے کہا کہ مقابلے کے دوران فرار ہونے والے دو ملزمان کی گرفتاری کے لیے مختلف علاقوں میں چھاپے مارے جارہے ہیں اور جلد انہیں بھی گرفتار کر لیا جائے گا۔ پولیس کے مطابق واقعے کی مزید تفتیش جاری ہے جبکہ ہلاک ملزم کے جرائم پیشہ نیٹ ورک اور اس کے ساتھیوں کے بارے میں بھی معلومات اکٹھی کی جارہی ہیں۔