آل پاکستان انجمن تاجران کی سعودی عرب پر حوثی ملیشیا کے حملوں کی مذمت

لاہور (این این آئی) آل پاکستان انجمن تاجران کے مرکزی صدر اشرف بھٹی نے سعودی عرب پر حوثی ملیشیا کے حملوں کی شدید مذمت کرتے ہوئے کہا ہے کہ شہری اور اقتصادی تنصیبات کو نشانہ بنانا قابل تشویش اور خطے کے امن کیلئے خطرناک ہے، سعودی عرب پاکستان کا برادر اسلامی ملک ہے اور پاکستانی عوام سعودی عرب کی سلامتی اور خودمختاری کے تحفظ کو انتہائی اہمیت دیتے ہیں۔ اپنے بیان میں اشرف بھٹی نے کہا کہ پاکستان کی جانب سے سعودی عرب کے ساتھ مکمل یکجہتی اور حوثی حملوں کی مذمت کا اظہار قومی جذبات کی عکاسی کرتا ہے۔ حوثی ملیشیا کو ایسے اقدامات سے گریز کرنا چاہیے جو خطے میں کشیدگی اور عدم استحکام کو مزید بڑھا سکتے ہیں۔ مقدس مقامات اور شہری آبادیوں کے تحفظ کو ہر صورت یقینی بنایا جانا چاہیے۔ انہوں نے کہا کہ پاکستان اور سعودی عرب کے دیرینہ برادرانہ تعلقات ہر آزمائش میں مضبوط رہے ہیں اور پاکستانی قوم سعودی عوام کے ساتھ کھڑی ہے۔ انہوں نے عالمی برادری پر زور دیا کہ خطے میں بڑھتی ہوئی کشیدگی کے خاتمے اور پائیدار امن کیلئے موثر سفارتی کوششیں تیز کی جائیں۔ سعودی عرب کی سلامتی کو درپیش کسی بھی خطرے کے اثرات پورے خطے کے امن اور عالمی تجارت پر پڑ سکتے ہیں۔ پاکستان امن کا خواہاں ہے تاہم سعودی عرب کی خودمختاری اور سلامتی کے احترام کو یقینی بنایا جانا چاہیے۔انہوں نے سعودی عرب کی قیادت اور عوام سے مکمل اظہار یکجہتی کرتے ہوئے حملوں کے فوری خاتمے اور خطے میں امن و استحکام کیلئے دعا کی۔