چکوٹھی(نیوز ایجنسیاں)حکومت کی جانب سے کالعدم قرار دی گئی جموں و کشمیر جوائنٹ عوامی ایکشن
کمیٹی کی جانب سے 5 اکتوبر سے آزاد کشمیر بھر میں دی جانے والی شٹر ڈاؤن اور پہیہ جام کی کال جہلم ویلی میں موثر نہ ہو پائی، ضلع بھر میں معمولاتِ زندگی بحال ، تمام بڑے و چھوٹے کاروباری مراکز معمول کے مطابق کھلے رہے۔ہٹیاں بالا، چکار، لیپہ، چناری، چکوٹھی سمیت جہلم ویلی کے دیگر علاقوں کے بازاروں میں کاروباری سرگرمیاں جاری رہیں، جبکہ تعلیمی ادارے بھی معمول کے مطابق کھلے رہے، پبلک اور نجی ٹرانسپورٹ بھی سڑکوں پر معمول کے مطابق رواں دواں رہی اور آمدورفت کا سلسلہ جاری رہا،صبح کے اوقات سے ہی مختلف بازاروں میں دکانیں اور تجارتی مراکز کھل گئے، جس کے باعث شہریوں نے روزمرہ معمولات کے مطابق خریدوفروخت کی،سرکاری و نجی دفاتر سمیت دیگر معمول کی سرگرمیاں بھی جاری رہیں،جہلم ویلی کے مختلف علاقوں میں مجموعی طور پر تجارتی سرگرمیاں معمول کے مطابق رہنے سے شٹر ڈاؤن اور پہیہ جام کی کال کا کوئی نمایاں اثر دکھائی نہیں دیا،دوسری جانب شہری حلقوں نے کہا ہے کہ علاقے میں امن و امان برقرار رکھتے ہوئے معمولاتِ زندگی جاری رہنا عوام اور کاروباری طبقے کے لیے اطمینان بخش ہے،دوسری طرف جہلم ویلی بھر میں موبائل انٹر نیٹ بندش کو چار ماہ مکمل ہو گئے ہیں ،جس کے باعث ہر مکتبہ فکر سے تعلق رکھنے والے افراد کو شدید مشکلات کا سامنا ہے ،عوامی حلقوں نے حکام سے موبائل انٹر نیٹ سروسز کی فوری بحالی کا مطالبہ کیا ہے ۔
ہڑتال
