سرکاری اسلحہ استعمال کرنے والے افسران و اہلکار اس کی حفاظت کے بھی ذمہ دار ہوں گے محکمہ پولیس،

لاہور (رپورٹ/عامر رانا) پولیس افسران و اہلکاروں کی مبینہ غفلت کے باعث سرکاری اسلحہ گم یا چھینے جانے کے واقعات کے بعد محکمہ پولیس نے اسلحہ کی حفاظت کے حوالے سے اہم فیصلہ کر لیا۔ سرکاری اسلحہ استعمال کرنے والے افسران و اہلکار اب اس کی حفاظت کے بھی ذمہ دار ہوں گے، جبکہ اسلحہ گم ہونے کی صورت میں متعلقہ اہلکار کو اس کی قیمت ادا کرنا پڑے گی۔ مراسلے کے مطابق جس بھی پولیس افسر یا اہلکار سے سرکاری اسلحہ گم ہوا، وہ مذکورہ ہتھیار کی مقررہ مارکیٹ قیمت کے مطابق رقم سرکاری خزانے میں جمع کروانے کا پابند ہوگا۔ اس اقدام کا مقصد سرکاری اسلحہ کی حفاظت میں غفلت کا تدارک اور ذمہ داری کا واضح تعین کرنا قرار دیا گیا ہے۔ مراسلے میں مختلف اقسام کے سرکاری اسلحہ اور حفاظتی سامان کی قیمتیں بھی مقرر کی گئی ہیں۔ بریٹا پسٹل 92 ایف ایس کی قیمت 3 لاکھ 60 ہزار روپے، .38 بور ریوالور سادہ و اسپیشل کی قیمت 2 لاکھ 60 ہزار روپے مقرر کی گئی ہے۔ اسی طرح ایس ایم جی 56 کی قیمت ڈیڑھ لاکھ روپے، 12 بور پمپ ایکشن امریکن کی قیمت بھی ڈیڑھ لاکھ روپے مقرر کی گئی ہے، جبکہ سیمی آٹومیٹک رائفل 7.62 کی قیمت ایک لاکھ 30 ہزار روپے رکھی گئی ہے۔ مراسلے کے مطابق ایم جی تھری بمع اسیسریز کی قیمت 3 لاکھ 38 ہزار روپے، بلٹ پروف ہیلمٹ 25 ہزار روپے جبکہ بلٹ پروف جیکٹ کی قیمت 90 ہزار روپے مقرر کی گئی ہے۔ ذرائع کے مطابق سرکاری اسلحہ کی حفاظت اور ریکارڈ کے حوالے سے محکمہ پولیس میں پہلے ہی سخت ہدایات موجود ہیں، تاہم اسلحہ گم یا چوری ہونے کے واقعات کے بعد ذمہ داری کے تعین اور مالی نقصان کی تلافی کے لیے یہ اقدام مزید اہمیت اختیار کر گیا ہے۔ آئی جی پنجاب عبدالکریم کی تشکیل کردہ کمیٹی کی سفارشات کے بعد اے آئی جی لاجسٹک پنجاب نے تمام ضلعی پولیس افسران کو مراسلہ بھجوا دیا ہے، جس میں سرکاری اسلحہ و حفاظتی سامان کی حفاظت یقینی بنانے اور نقصان کی صورت میں متعلقہ افسر یا اہلکار سے مقررہ رقم وصول کرنے کی ہدایات شامل ہیں۔