باڈی کیم کی پہلی کھیپ لاہور پولیس کے حوالے

لاہور (کرائم رپورٹر) پنجاب حکومت کی جانب سے باڈی کیم کی پہلی کھیپ لاہور پولیس کو دے دی گئی۔ لاہور پولیس کو ابتدائی طور پر 600 باڈی کیم فراہم کیے جارہے ہیں جو پولیس اہلکار ناکوں اور چیکنگ کے دوران استعمال کریں گے۔ لاہور پولیس کے باڈی کیم کی ٹریننگ کا آغاز سیف سٹی اتھارٹیز میں کر دیا گیا ہے۔ ڈی آئی جی آپریشنز فیصل کامران کاکہنا ہے کہ لاہور کے تھانوں میں آڈیو ویڈیو کیمروں کی تنصیب کا 70 فیصد سے زائد کام مکمل کر لیا گیا ہے، تھانوں میں کیمروں کی تنصیب اور باڈی کیم سے پولیس نظام میں شفافیت آئے گی۔ ڈی آئی جی فیصل کامران کے مطابق باڈی کیم اور تھانوں میں کیمروں کی تنصیب پولیسنگ کے نظام کو مزید موثر بنانے میں مددگار ہوگی، پنجاب حکومت کی جانب سے صوبہ بھر کی آپریشنل پولیس کے لیے تیس ہزار سے زائد کیمرے منگوائے گئے ہیں۔