کارڈیک ڈسپوزیبلز سینٹرل پروکیورمنٹ اربوں روپے کی خریداری مارکیٹ سروے کمیٹی پر سوالات کا انبار۔کھڑا ہو گیا

لاہور (مہران اجمل خان سے) کارڈیک ڈسپوزیبلز سینٹرل پروکیورمنٹ کی اربوں روپے کی خریداری، مارکیٹ سروے کمیٹی پر سوالات کا انبار۔ تفصیلات کے مطابق کارڈیک ڈسپوزیبلز کے اربوں روپے کے فریم ورک کنٹریکٹ کیلئے محکمہ سپیشلائزڈ ہیلتھ کیئر کی جانب سے قائم مارکیٹ سروے کمیٹی کی تشکیل نے محکمہ صحت کی خریداری کے طریقہ کار پر سنگین سوالات کھڑے کر دیئے۔ یکم اکتوبر کے نوٹیفکیشن کے مطابق کمیٹی میں چلڈرن ہسپتال، پی آئی سی، سروسز ہسپتال اور میوہسپتال کے فارماسسٹ شامل ہیں تاہم کارڈیالوجی، کیتھ لیب یا انٹروینشنل کارڈیالوجی کے کسی ماہر کو کمیٹی کا حصہ نہیں بنایا گیا۔ ذرائع کے مطابق سروسز ہسپتال میں کارڈیک سینٹر ہی موجود نہیں اس کے باوجود وہاں کے ہسپتال فارماسسٹ کو کارڈیک ڈسپوزیبلز کے مارکیٹ سروے کیلئے کمیٹی میں شامل کیا گیا جبکہ کارڈیک پروکیورمنٹ اور متعلقہ آئٹمز کے بارے میں ان کی تکنیکی واقفیت پر سوالات اٹھ رہے ہیں۔ میو ہسپتال کی فارماسسٹ کا حوالہ جس کا دیا گیا حیرت انگیز طور پر وہ عرصہ دراز سے سپیشلائزڈ ہیلتھ کیئر میں تعینات ہے۔ ماہرین کے مطابق کارڈیک ڈسپوزیبلز کی گزشتہ 3 ، 4 سال سے مرکزی سطح پر خریداری جاری ہے اور محکمہ کے پاس سابقہ ٹینڈرز، منظور شدہ نرخ، برانڈز اور سپلائرز کا ریکارڈ موجود ہے۔ اس کے باوجود دوبارہ مارکیٹ ریٹس حاصل کرنے اور صرف ایک روز بعد رپورٹ پیش کرنے کا طریقہ کار بھی سوالیہ نشان بن گیا ہے۔ ذرائع کے مطابق کارڈیک ڈسپوزیبلز اور سرجیکل ڈسپوزیبلز/ میڈیکل ڈیوائسز کے ٹینڈرز میں لازمی شرائط اور بولیوں کی جانچ کے معیار میں فرق کیوں رکھا گیا ہے اگر دونوں ہی طبی آلات کی خریداری ہیں تو معیار اور جانچ کے پیمانے میں یہ فرق کس تکنیکی اور قانونی بنیاد پر کیا گیا اسی طرح کارڈیک ڈسپوزیبلز کے حالیہ ٹینڈر میں متعدد چینی مصنوعات کامیاب قرار دی گئی ہیں۔ سوال اٹھایا جا رہا ہے کہ ان مصنوعات کے فری سیل سرٹیفکیٹ کیا واقعی چین کی متعلقہ ریگولیٹری اتھارٹی این ایم پی اے سے جاری شدہ ہیں اگر ایسا نہیں تو پھر پنجاب کے ہیلتھ ٹینڈرز میں ان مصنوعات کیلئے ریگولیٹری اور معیار کا پیمانہ کیا رکھا گیا ہے کیا ہر کمپنی کیلئے معیار یکساں ہے یا جس کی لاٹھی اس کی بھینس کے اصول پر فیصلے ہو رہے ہیں۔ محکمہ صحت کی مجموعی کارکردگی پہلے ہی سوالیہ نشان بنی ہوئی ہے ایسے میں اربوں روپے کی طبی آلات کی خریداری میں شفافیت، معیار اور مفادات کے ٹکرا کو نظر انداز کیا گیا تو پنجاب کے سرکاری ہسپتالوں کا نظام مزید تباہی کی طرف جا سکتا ہے۔