اسلام آباد (مانیٹرنگ ڈیسک) پانامہ کیس میں حسین نواز کے نئے جواب میں نیا انکشاف سامنے آگیا۔ مریم نواز کو آف شور کمپنیوں میں دستخط کی مجاز قرار دیدیا۔ نجی ٹی وی کے مطابق وزیراعظم نوازشریف کے صاحبزادے حسین نواز نے پانامہ کیس میں نئے جواب میں کہا ہے کہ مریم نواز آف شور کمپنیوں میں دستخط کی مجاز ہیں۔ مریم نواز نیلسن اور نیسکول کی بینی فیشل آنر نہیں ہیں انہیں دستخط کرنے کے اختیارات صرف انتظامی امور کیلئے سونپے گئے اور اس مقصد کیلئے منروا کمپنی کی خدمات حاصل کی گئیں۔ حسین نواز نے جواب میں مزید لکھا ہے کہ سامبا گروپ نے مریم نواز کے آف شور کمپنیوں کے معاملات طے کرائے۔ 2005سے قبل مریم کے پاس نیلسن اور نیسکول سے متعلق اختیارات نہیں تھے۔

ساہیوال (بیورورپورٹ)پاکستان تحریک انصاف کے مرکزی چیئرمین عمران خان نے کہاہے کہ ہم نے ملک کے وزیراعظم اوراس کے خاندان کو کرپشن کرنے پر پریم کورٹ میں لاکھڑا کیا ہے حکمرانوں کے آخری دن آگئے ہیں میں زندگی کی آخری سانس تک کرپشن کے خلاف لڑوں گا ۔ پاکستان کو ترقی کی راہ پر گامزن کرنے کیلئے پاکستان تحریک انصاف ‘تعلیم ‘صحت ‘پولیس ‘زراعت اور روزگارمیں انقلابی اقدامات کرے گی ۔ خیبرپختونخواہ آج ملک کا ماڈل صوبہ ہے ۔ وہ گذشتہ روزساہیوال کے شیخ ظفر علی سٹیڈیم میں ایک بہت بڑے جلسہ عام سے خطاب کر رہے تھے ۔ ان سے قبل جلسہ عام سے مرکزی راہنماﺅں شاہ محمود قریشی ‘ جہانگیر ترین ‘شیخ رشید ‘چوہدری محمدسرور ‘ عبدالعلیم خان ‘اعجاز احمد چوہدری ‘چوہدری محمداشفاق ‘ ضلعی جنرل سےکرٹری علی شکور ،چو ہدری صغےر انجم،عمر اسحاق،شکےل خان نےازی،رانا آفتاب احمد خاں،وسےم رامے،،شےخ شاہد حمےد،نورےز شکواور دیگر راہنماﺅں نے بھی خطاب کیا ۔ عمران خان نے اپنے خطاب میں کہاکہ آج امریکہ میں مسلمانوں پر زمین تنگ کی جارہی ہے پاکستانیوں نے نوازشریف کو منتخب کرکے غلطی کی تھی جس کا خمیازہ وہ آج بھگت رہے ہیں یہی حال امریکیوں کا ہو گا جنہوںنے ڈونلڈ ٹرمپ کا غلط انتخاب کیا ہے ۔وزیراعظم کا سرمایہ بچے ‘جائیداد ‘علاج ‘جینا مرنا سب بیرون ملک ہے وہ پاکستان کے وفادا کیسے ہو سکتے ہیں آج ملک بھکاری بنادیا گیا ہے بھکاری کی عزت نہیں ہوتی ۔شریف خاندان جھوٹ کے ریکارڈ توڑ رہاہے خود کو قائد کہہ کر قائداعظم کی توہین کرتے ہیں ۔انہوںنے کہاکہ ہم نے خیبر پختونخواہ میں تعلیمی اداروں میں اصلاحات کیں ۔ نصاب تعلیم ایک کیا جس کی وجہ سے 34ہزار بچے پرائیویٹ سکول چھوڑ کر سرکاری سکولوں میں آئے ۔ ہسپتال مثالی بن رہے ہیں ۔ 60لاکھ افرا دکو 5لاکھ فی مریض تک علاج معالجہ کی سہولت کیلئے انصاف ہیلتھ کارڈ دیئے ہیں ‘ قرآن پاک کی تعلیم لازمی قرار دی ہے ہم ہر ہسپتال کو عالمی معیار تک لائیں گے ۔ اگلے ڈیڑھ سال تک خیبر پختونخواہ میں ہر شخص کو ہیلتھ کارڈ جاری ہو گا ۔ انہوںنے انکشا ف کیا کہ خیبر پختونخواہ میں گیس کے وسیع ذخائر موجود ہیں لیکن وفاقی حکومت این او سی جاری نہیں کر رہی ۔قطر سے مہنگی ترین گیس صرف کمیشن بنانے اور بزنس کو ترقی دینے کیلئے خریدی گئی ہے ۔پانامہ کیس کے حوالہ سے انہوںنے کہاکہ میاں نوازشریف جھوٹ پر جھوٹ بول کر اپنے بچوں حتیٰ کہ مریم بی بی کو بھی رسوا کررہاہے ۔ پیسہ خود چوری کیا نام ان کا لکھوا دیا ۔ عمران خان نے بھارتی وزیراعظم نریندر مودی کو خبردار کیا کہ پاکستان کاپانی بند کرنے کی غلطی نہ کرنا ۔ پاکستانیوں کو نوازشریف نہ سمجھ لینا ۔ انہوںنے کہاکہ حکمرانوںنے ہمارے کسان کا برا حال کردیا ہے لیکن ہم ان کا بھرپور ساتھ دیکر زراعت کو پھر سے صف اول کا شعبہ بنائیں گے ۔ تمام برباد اداروں کو دوبارہ کامیاب بنائیں گے نوجوانوں کیلئے روزگار کے بے پناہ مواقع فراہم کرینگے ۔ انہوںنے خواتین خصوصاً ماﺅں سے اپیل کی کہ وہ دعاکریں کہ میں کرپشن مافیا کے مقابلے میں فتح یاب رہوں ۔ انہوںنے کہاکہ کرپشن کیس میں ہم سپریم کورٹ کا فیصلہ قبول کرینگے لیکن نوازشریف کی کرپشن کو ہرگز قبول نہیں کرینگے اورلوٹے ہوئے اربوں ڈالر نوازشریف سے واپس قومی خزانہ میں لاکر دم لیں گے ۔ شاہ محمود قریشی نے حکومتی وزراءخواجہ آصف ‘خواجہ سعد رفیق پر کڑی تنقید کی اوردونوں کو چھوٹی ”ی “اوربڑی”ے“کا لقب دیا اور عابد شیر علی کو کہاکہ عمران خان کو ریڈار پرلانے سے قبل وہ خود کو رانا ثناءاﷲ کے ریڈار سے بچائیں ۔ شیخ رشیدنے کول پاور پراجیکٹ ساہیوال پر شدید تنقید کی اور کہاکہ اس سے آلودگی میں بے تحاشا اضافہ ہو گا شیخ رشید احمد نے اپنے روائتی انداز میں حکمرانوں کو آڑے ہاتھوں لیا اور کہاکہ حکمران مجھ سے لال حویلی چھیننے کی بات کر رہے ہیں وہ پانچ مرلے کی یہ حویلی میری لاش سے گزر کر رہی چھین سکتے ہیں جس پر جہانگیر ترین نے کہاکہ پی ٹی آئی شیخ رشید احمدکے ساتھ لال حویلی میں کھڑی ہو گی ۔ عمران خان ،شیخ رشید ،جہانگیر ترین ،چوہدری سرور،شاہ محمودقریشی سمیت دیگر مقررین نے پانامہ لیکس پر شریف خاندان اورقطری شہزادے کے خطوط پر توجہ مرکوز کئے رکھی ۔

اسلام آ با د( آ ئی این پی) وزیر اعظم میاں محمد نواز شریف نے کہا ہے کہ پاکستان اور چین اب ہمیشہ کے لئیے مضبوط دوستی کے رشتے میں جڑ چکے ہیں ۔چا ئنہ ر یڈ یو انٹر نیشنل کے مطا بق چینی سفارت خانے کی طرف سے جاری کردہ ایک بیان کے مطابق چین کے قمری سال اور جشن بہار کے آغاز کے موقع پر وزیر اعظم نواز شر یف نے پاکستان کی عوام اور اپنی طرف سے چینی عوام ، چینی راہنماﺅں اور چینی حکومت کے نام پیغام میں مبارک باد اور نیک خواہشات کا اظہار کیا۔ انہوں نے مزید کہا کے دونوں ممالک کے درمیان دو طرفہ شراکت میں چین پاک اقتصادی راہداری ایک اہم تاریخی سنگ میل ثابت ہو گی۔

اوپر میں نے قاضی حسین احمد کی ہمت، استقامت، جرا¿ت، صبر واستقلال کے حوالے سے بات کی ہے۔ اس ضمن میں ایک واقعہ بیان کرنا ضروری سمجھتا ہوں۔ بینظیر بھٹو کا دور تھا جب قاضی صاحب نے لیاقت باغ سے فیض آباد (اسلام آباد) تک ٹرکوں پر ایک مظاہرے کا اہتمام کیا۔ یوں تو جماعت اسلامی نے بیسیوں اور سینکڑوں نہیں ہزاروں جلسوں اور جلوسوں کا اہتمام کیا لیکن میں جس مظاہرے کا ذکر کرنے جا رہا ہوں وہ میرا چشم دید بھی ہے اور اس میں بہت سے ایسے گواہوں کے مشاہدات شامل ہیں جو قاضی حسین احمد سے عمر میں کہیں چھوٹے اور صحت میں کہیں بہتر تھے‘ لیکن ایک ایک کر کے ان کی ہمت بھی جواب دیتی گئی۔ میں نے دانستہ ان کے ساتھ ٹرک پر سوار ہونے کی بجائے روزنامہ خبریں اسلام آباد کے ایک کارکن کی موٹرسائیکل پر جلوس کے ساتھ ساتھ چلنے کا فیصلہ کیا کیونکہ اس طرح میں گھوم پھر کر اس کے طول وعرض کا بخوبی مشاہدہ کر سکتا تھا۔ قاضی صاحب نے اصرار کیا کہ میرے ساتھ ٹرک پر آ جاﺅ مگر میں نے وعدہ کر لیا کہ جلوس جہاں اختتام پذیر ہو گا میں آپ کے استقبال کیلئے موجود ہونگا، مجھے موٹرسائیکل پر سفر کرنے دیجئے۔ جماعت اسلامی کے علاوہ اپوزیشن کی دیگر جماعتوں کے بہت سے نامور لوگ بھی خیرسگالی کے طور پر شرکت کیلئے آئے‘ لیکن جونہی ہم نے پنڈی کا چاندنی چوک کراس کیا اور اسلام آباد جانے والی مری روڈ پر ٹرکوں کے جلوس کے اطراف میں ذرا رک کر جائزہ لینا چاہا کہ چند ٹرکوں کے اختتام پر کتنی گاڑیاں اور کتنے لوگ پیدل جلوس میں چل رہے ہیں کہ اچانک راولپنڈی کی ”بہادر پولیس“ ٹرکوں کے جلوس پر ٹوٹ پڑی۔ آنسو گیس کے اتنے شیل پھینکے گئے کہ ہم لوگوں کے لیے جو سڑک کنارے موٹرسائیکل پر سوار تھے سانس لینا مشکل ہو گیا۔ آنکھوں میں مرچیں سی چبھنے لگیں اور نہ چاہتے ہوئے بھی بے اختیار آنسو ٹپکنے لگے۔ میرے ساتھی نے موٹرسائیکل کا رخ سیٹلائٹ ٹاﺅن کے اندر جانے والی ایک سڑک پر موڑ دیاتاکہ آنسو گیس کی زد میں آنے والے علاقے سے دور چلے جائیں۔ کچھ فاصلے پر ایک چوک تھا جہاں رک کر ہم نے ایک سرکاری نل پر جہاں رومال، تولیے اور مختلف انداز کے کپڑے بھگونے والوں کا ہجوم تھا۔ بڑی مشکل سے اپنے رومال بھی پانی میں بھگوئے اور بار بار آنکھوں کو ٹھنڈک پہنچاتے رہے پھر ہم نے گلے کی خشکی تر کرنے کیلئے تھوڑا سا پانی پیا۔ چند منٹ بعد میں نے اپنے ساتھی سے کہا کہ ایک بار پھر ذرا آگے جا کر مری روڈ کی طرف مڑو تاکہ دیکھیں جلوس میں ٹرکوں پر سوار اور لوگوں کا کیا حال ہے۔ مری روڈ کے قریب پہنچنا بھی مشکل ہو رہا تھا کیونکہ فضا میں آنسو گیس یوں پھیلی ہوئی تھی کہ سانس لینے میں بڑی دقت ہو رہی تھی۔ اتنے میں ہمیں اعجاز الحق کچھ لوگوں کے جھرمٹ میں دکھائی دیئے۔ ایک شخص تولیہ گیلا کر کے بار بار ان کو دے رہا تھا اور وہ اپنی آنکھیں اور چہرہ بھگو کر آنسو گیس سے ہونے والی جلن کم کر رہے تھے۔ میں موٹرسائیکل سے اتر کر ان کے پاس پہنچا تو انہوں نے مختصر روداد یوں سنائی کہ میں تو سانس کی بندش کے باعث قاضی صاحب کے ٹرک سے اتر آیا ہوں۔ مجھے ویسے بھی کئی دن سے بخار ہے اور گلا پہلے ہی سوجا ہوا ہے۔ بخدا میرا تو دم گھٹنے لگا تھا۔ میں نے کہا قاضی صاحب کہاں ہیں‘ اعجاز الحق نے کہا وہ ابھی تک ٹرک پر اپنی جگہ جم کر کھڑے ہیں۔ اللہ رحم کرے پچھلے دنوں ان کی بیماری کی خبر سنی تھی اللہ انہیں اپنی حفاظت میں رکھے۔ پولیس نے آنسو گیس کے شیل پھینکنے کی انتہا کر دی ہے اور مری روڈ پر تو پیدل چلنا بھی ناممکن ہے۔ کچھ دیر ہم باتیں کرتے رہے‘ اعجاز الحق نے کہا میرے ساتھ گاڑی میں چلو میں آپ کو آئی نائن میں ”خبریں“ کے دفتر چھوڑ دوں گا۔ فیض آباد تک پہنچنا کسی صورت ممکن نہیں مگر میں نے شکریہ ادا کرتے ہوئے کہا کہ میں دانستہ گاڑی کی بجائے موٹرسائیکل پر آیا ہوں اور ابھی میرا جلوس کے متوازی جہاں تک جانا ممکن ہے ساتھ چلنے کا پروگرام ہے۔
ہم پھر موٹرسائیکل پر بیٹھ کر مری روڈ کی طرف گئے۔ اعجاز الحق کے ایک ساتھی نے البتہ ہمیں پانی میں بھیگا ہوا ایک تولیہ دیا جو میں نے اپنے سر پر ڈال لیا اور آنکھیں بھی گیلے تولیے سے ڈھانپ لیں۔ موٹرسائیکل چلانے والے نے بڑی ہمت سے دوبارہ ہمیں مری روڈ کے اس حصے تک پہنچایا جہاں ابھی تک جلوس نہیں پہنچا تھا۔ البتہ پولیس کی بے انتہا نفری اور بے شمار گاڑیاں راستے میں حائل تھیں اور واقعی قاضی صاحب کے ٹرک کا فیض آباد پہنچنا ناممکن تھا۔ میں نے موٹرسائیکل ڈرائیور سے کہا دوبارہ سیٹلائٹ ٹاﺅن کے راستے پیچھے چلو جہاں قاضی صاحب کا ٹرک پہنچا ہے وہاں تک ایک چکر ضرور لگانا ہے۔ پورا سیٹلائٹ ٹاﺅن آنسو گیس سے متاثر ہو رہا تھا پھر بھی ہم واپسی کا سفر اختیار کر کے ٹرک کے اس مقام کی طرف روانہ ہوئے جہاں پولیس نے قاضی صاحب کے ٹرک کو روک رکھا تھا۔ میں نے کئی لوگوں کو پانی سے بھری ہوئی بالٹیاں اٹھائے ٹرک تک پہنچتے اور بالٹیاں اوپر ٹرک پر پہنچاتے دیکھا۔ شیلنگ بدستور جاری تھی اور شور اتنا تھا کہ قاضی صاحب مائیک پر جو کچھ کہہ رہے تھے اس کا ایک لفظ بھی سنائی نہیں دے رہا تھا۔ یہاں مجھے مسلم لیگ (ن) کے اپنے پرانے دوست شیخ رشید ملے جو نوجوانوں کی ایک ٹولی کے ساتھ پیدل واپس پنڈی کی طرف جا رہے تھے۔ میں پھر موٹرسائیکل سے اترا اور انہیں رکنے کا اشارہ کیا۔ شیخ صاحب کی آنکھیں سرخ ہو رہی تھیں اور وہ بھی بار بار گیلے تولیے سے اپنی آنکھیں صاف کر رہے تھے۔ میں نے کہا شیخ صاحب! قاضی صاحب کا کیا حال ہے۔ شیخ صاحب نے کسی تکلف کے بغیر کھلے دل سے کہا‘ ضیا شاہد! قاضی صاحب کی ہمت اور حوصلے کی داد دینا پڑتی ہے۔ میں فیصلہ کر کے آیا تھا کہ آخر وقت تک ان کے ساتھ کھڑا رہوں گا مگر آنسو گیس اس قدر پھیپھڑوں میں جا چکی ہے کہ آپ دیکھ سکتے ہیں۔ زبان سے پورا لفظ ادا نہیں ہو رہا۔ یار قاضی گوشت پوست کا نہیں لوہے کا بنا ہوا انسان ہے۔ بینظیر کی آمریت کے دن تو گنے جاچکے ہیں لیکن دعا کرو قاضی صاحب کو اللہ زندگی دے۔ جس حالت میں وہ کھڑے ہیں وہاں تو پانچ منٹ نہیں رکا جا سکتا۔
(جاری ہے)

لاہور ‘ اسلام آباد(خصوصی رپورٹ) ممکنہ دہشت گردی کے خطرات کے پیش نظر صوبائی دارالحکومت لاہور سمیت صوبہ بھر میں سکیورٹی ہائی الرٹ کردی گئی۔ ذرائع کے مطابق داخلی اور خارجی راستوں پر چیکنگ کا نظام مزید سخت کردیا گیا ہے۔ بتایاگیا ہے کہ حساس اور قانون نافذ کرنے والے تمام اداروں کی تنصیبات سمیت اہم سرکاری و نجی عمارتوں اور رش والے مقامات پر سکیورٹی اہلکاروں کی تعداد اور اطراف میں پٹرولنگ کا عمل بھی بڑھا دیا گیا ہے۔ علاوہ ازیں آئی جی پنجاب کی طرف سے وقفے وقفے سے جنرل ہولڈاپ بھی کیا جارہا ہے۔ لاہور کے علاقے گرین ٹاﺅن میں پولیس نے سرچ آپریشن کے دوران شناخت نہ ہونے پر 200 سے زائد افراد کو حراست میں لے لیا۔ پولیس حکام کا کہنا ہے کہ زیر حراست افراد کو شناخت سامنے آنے پر رہا کردیا جائے گا۔ دہشت گردی کے خطرے کے پیش نظر ڈائریکٹر جنرل نے فیڈرل انوسٹی گشن ایجنسی کے دفاتر کی سکیورٹی بڑھانے کا حکم جاری کردیا گیا۔