لاہور(کلچرل رپورٹر)ڈائریکٹرسیدنورکی فلم”چین آئے نہ“کی شوٹنگ کراچی میں شروع ہوگئی ہے جس میں ان دنوں شہروزسبزواری، اور عادل مرادسمیت دیگر فنکار حصہ لے رہے ہیں۔ سیدنورکی اس نئی فلم میں ندیم بیگ اور مصفطےٰ قریشی کے علاوہ بھارتی اداکاردھرمیندربھی کام کررہے ہیں جبکہ صبیحہ خانم اور سنتوش کمارکی نواسی سحرش خان کو بھی اہم کردارمیں کاسٹ کیا گیا ہے۔

لاہور(شوبزڈیسک) جہاں پاکستان اور ہندوستان کے درمیان جاری کشیدگی کے باعث پاکستانی فنکار بالی وڈ سے دور ہوچکے ہیں، وہیں اب بھی کچھ ایسے ستارے موجود ہیں جو ایک ساتھ مل کر کام کررہے ہیں، جس کی ایک مثال عاطف اسلم اور بالی وڈ اداکارہ یلیانا دی کروز کی ہے۔عاطف اسلم نے بہت عرصے بعد اپنا ایک گانا ریلیز کیا، اس کا نام”پہلی دفعہ“ رکھا گیا، جس کا میوزک نہایت خوبصورت جبکہ ویڈیو بھی نہایت شاندار بنائی گئی۔اس گانے میں یلیانا دی کروز خوبصورت نظر آرہی ہیں، جبکہ عاطف اسلم کے ساتھ ان کی کیمسٹری بھی نہایت دلچسپ ہے۔واضح رہے کہ اس سے قبل بھی عاطف اسلم کئی بالی وڈ اداکاروں کے ساتھ گانے فلما چکے ہیں، اس کی حالیہ مثال اداکار ٹائیگر شروف کے ساتھ ان کا گانا ”آرہا ہوں زندگی“ تھا، جسے مداحوں نے کافی پسند کیا۔

لاہور(شوبز ڈیسک)سینئر اداکارہ نشو بیگم نے کہاہے کہ شوبزکی دنیا میں آنے پر والدہ کی مار کھانا پڑی تھی ، شارٹ کٹ کی بجائے محنت اورلگن سے اپنا نام اورمقام پیدا کیا جس پر فخر ہے ۔ ایک انٹر ویو میں نشو بیگم نے کہا کہ شوبزکی دنیا میں آنااور پھر نام پیدا کرنا بڑا کٹھن سفر تھا لیکن نیک نیتی سے مسلسل محنت جاری رکھی جس کا پھل بھی ملا ۔ انہوںنے کہاکہ جب میں شوبزکی دنیا میں آئی تو والدہ نے چمٹے سے مارتے ہوئے کہا کہ تم بازآﺅ گی یا نہیں لیکن پھر وقت کے ساتھ ساتھ سب بہتر ہو گیا۔ انہوں نے کہا کہ اپنے کیرئیر کے آغاز سے ایک اصول طے کر لیا تھاکہ شارٹ کٹ کی بجائے محنت اور لگن سے نام پیدا کرنا ہے اور جب تک کام کیا اس پر کاربند رہی اور آج میں سب کے سامنے ہوں ۔

عابدہ ریاض (نیلو) کا ذکر آیا تو اچانک ہمارے ذہن میں صوفی گلوکارہ عابدہ پروین بھی آگئیں۔ عابدہ پروین کا تعلق سندھ فیملی سے ہے۔ انہوں نے ماسٹر غلام حیدر سے موسیقی کی تربیت حاصل کی اور 70ءکی دہائی میں گانا شروع کیا۔ تب سے انٹرنیشنل شو بھی کئے۔ کوک سٹوڈیو میں بھی پرفارمنس دی۔ بھارت میں منعقد ہونے والے میوزیکل مقابلہ میں جج کے طور پر بھی بیٹھیں تاہم عابدہ پروین کو زیادہ شہرت ”بابا بلھے شاہ ؒ“کے کلام سے ملی۔ شروع شروع میں جب عابدہ نے اس فیلڈ میں قدم رکھا تو ریڈیو پر 1977ءمیں سرکاری گلوکارہ کے طور پر متعارف کروایا۔ عابدہ پروین نے 1975ءمیں غلام حسن شیخ سے شادی کی جوریڈیو کے سینئر پروڈیوسر تھے جو 1980ءمیں ریٹائرڈ ہوگئے تاہم 2000ءمیں انٹرنیشنل فلائٹ کے دوران ہارٹ اٹیک ہوگیا جس سے عابدہ پروین کی دوبیٹیاں اور ایک بیٹا ہے۔ عابدہ پروین نے بیرونی ممالک کے دورے بھی کئے جہاںان کو سننے والے لاکھوں پرستار موجود ہیں تاہم عابدہ پروین کے بارے میں کہا جاتا ہے کہ ہ بہت مہنگی گلوکارہ ہیں۔ کراچی میں ایک کالج انتظامیہ نے جہاںخود عابدہ پروین کا بیٹا بھی پڑھتا تھا وہاں کے طلباءنے عابدہ پروین کو سننے کی فرمائش کی مگر جب عابدہ پروین سے رابطہ ہوا تو انہوں نے تین گھنٹے کی پرفارمنس کے 25 لاکھ مانگ لئے اور کالج انتظامیہ کو اپنی پیشکش واپس لینا پڑی۔

لاہور(کلچرل رپورٹر) ڈائریکٹر سیدفیصل بخاری کے سوپ”کیسی خوشی لے کے آیاچاند“جس میں ان دنوں اہم فنکار حصہ لے رہے ہیں۔سیریل کی کاسٹ میں جہاں دیگر بہت سے فنکاروں کی پرفارمنس پسندکی جارہی ہے وہیں نیلم منیراور اقراظفرکی پرفارمنس نے بھی ناظرین کو اپنی گرفت میں لیا ہوا ہے کیونکہ دونوں نے اپنے کرداربہت خوبصورتی سے نبھائے ہی خاص طور پر اقراظفرجن کا شمار ابھی قدرے نئے فنکاروں میں ہوتا ہے لیکن انہوں نے یہ ثابت کیا ہے کہ نئے فنکار ٹیلنٹ سے مالا مال ہیں۔ اس ڈرامے میں نیلم منیر نے اقراظفرکی بھابی کا کردارکیا ہے جنہیں فیملی کی طرف سے بے پناہ مشکلات کا سامنا ہے۔ پروڈیوسرشہزادچوہدری کے اس سوپ میں کام کرنے والے دیگر فنکاروں میں احسن خان ،فضاعلی،بابرعلی ،سلیم شیخ،شبیرجان ،صباحت بخاری، سہیل اصغر،علی انجم،عظیم سجاداوردیگر فنکا شامل ہیں۔

لاہور( مانیٹرنگ ڈیسک) معروف کامیڈین غفار لہری نے کہا ہے کہ مرحوم اداکار لہری کا میں ہی واحد شاگرد ہوں اور یہ نام بھی انہوں نے مجھے دیا تھا ۔ چینل فائیو کے پروگرام ٹی ایٹ فائیو میں گفتگو کرتے ہوئے انہوں نے بتایا کہ ہنسانے والے کے پیچھے بہت دکھ ہوتے ہیں لیکن اس کے باوجود وہ دوسروں کے چہروں پر خوشی بکھیرتا ہے اور اپنے دکھ ہی نہیں دوسروں کے دکھ بھی اپنی جھولی میں سمیٹ لیتا ہے۔ انہوں نے کہا کہ افسوس آج کل سٹیج پر بد تہذیبی ہو رہی ہے۔ انہوں نے بتایا کہ کامیڈی کا باقاعدہ آغاز فلم سے کیا ٹیلی ویژن پر 1990ءمیں پی ٹی وی سے آغاز کیا۔ میں زیادہ تر ون مین شو ہی کرتا ہوں۔ میں سمجھتا ہوں کہ خواجہ سرا ںبھی فنکار ہوتے ہیں۔صوفی گلوکارہ حنا نصراللہ نے بتایا میں صوفی ازم کی طرف اس لیے آئی ہوں کیونکہ میری فیملی کا رحجان بھی اس طرف تھا۔ میں سمجھتی ہوں کہ لوگوں تک اچھی اور حق کی بات پہنچانی ہو تو صوفیانہ کلام اس کا بہترین ذریعہ ہے۔اس کے علاوہ میں نعتیں بھی پڑھتی ہوں میری خوش قسمتی ہے کہ میں نے بہترین کمپوزرز کے ساتھ کام کیا جن سے مجھے بہت کچھ سیکھنے کا موقع ملا۔پروگرام کے دوران انہوں نے کلام” جے میں ویکھاں عملا ں ولے تے کج نئیں میرے پلے“ سنایا۔ انہوں نے بتایا کہ بھارت میں آٹھ 9گھنٹے پرفارم کیا ہے۔ استاد نصرت فتح علی خان کو سوتے ،اٹھتے اور بیٹھتے سنا۔ ان کی آواز میں جادو تھا ان کے فن نے سب کو متاثر کیا ۔ میں نے کلام کا آغاز پی ٹی وی کے میوزیکل پروگرام” آنگن تارے“ سے کیا۔