لاہور(ویب ڈیسک ) مصباح الحق کی رخصتی کا پروانہ لکھ دیا گیا ہے اور قومی ٹیسٹ ٹیم کے کپتان مستقبل کے پلان کا حصہ نہیں رہے۔ میڈیا رپورٹ کے مطابق مصباح الحق کو پیغام بھجوا دیا گیا ہے کہ پی سی بی ان کو مستقبل کے پلان میں شامل نہیں سمجھتا اور انھیں انٹرنیشنل کرکٹ کو خیرباد کہنا ہے، یہ فیصلہ سینئر بیٹسمین پرہی چھوڑ دیا گیا کہ وہ ریٹائرمنٹ کا باقاعدہ اعلان کب کرنا پسند کرتے ہیں۔ذرائع کا یہ بھی کہنا ہے کہ مصباح الحق نے کوئی فیصلہ کرلیا تو ان کا تجربہ ڈومیسٹک کرکٹ میں بہتری لانے کیلیے استعمال کیا جائے گا، اظہر علی کو جانشین کے طور پر ٹیسٹ ٹیم کی قیادت سونپے جانے کا قوی امکان ہے۔ دوسری جانب یونس خان کو 10 ہزار رنز بنانے والا پہلا پاکستانی بیٹسمین بننے کا اعزاز حاصل کرنے کیلیے ایک میچ یا ٹور مزید دیا جا سکتا ہے،سینئر بیٹسمین ابھی تک 9977رنز بنا چکے اور سنگ میل عبور کرنے کیلیے انھیں مزید 33رنز درکار ہیں۔واضح رہے ریٹائرمنٹ کے حوالے سے تذبذب کا شکار سینئر بیٹسمین نے پی ایس ایل کو اپنی فارم اور فٹنس کا پیمانہ قراردیتے ہوئے ایونٹ کے بعد کوئی فیصلہ کرنے کا عندیہ دیا تھا۔

لاہور(ویب ڈیسک ) پاکستان کی ورلڈ کپ میں براہ راست شرکت پر خدشات بڑھنے لگے، کینگروز کیخلاف ون ڈے سیریز میں صرف ایک میچ جیتنے والے گرین شرٹس اسے آٹھویں پوزیشن پر برقرار لیکن رواں سال 30 ستمبر تک بچائے رکھنے کیلئے غیر معمولی کارکردگی پیش کرنا ہوگی۔89 پوائنٹس کے حامل گرین شرٹس بنگلہ دیش سے 2پوائنٹس پیچھے اور ویسٹ انڈیز سے2 پوائنٹس آگے ہے تاہم ٹیم کو اگلی ون ڈے سیریز میں پی ایس ایل کے بعدویسٹ انڈیز کا ان کے ہوم گراﺅنڈ پر سامنا کرنا ہے، ان 3میچز کے نتائج کے بعد اگلا چیلنج جون میں انگلینڈ میں شیڈول چیمپئن ٹرافی ہے جبکہ اس میگا ایونٹ میں دنیا کی سرفہرست ٹیمیں مقابل اور کنڈیشنز بھی ناسازگار ہوں گی۔یاد رہے کہ گزشتہ دورہ انگلینڈ میں بھی پاکستان ٹیم میزبان کیخلاف سیریز کے 5 میں سے ایک میچ ہی جیت پائی تھی، ان حالات میں گرین شرٹس کی ورلڈکپ 2019پر براہ راست شرکت پر خدشات کے بادل منڈلا رہے ہیں

لندن (ویب ڈیسک ) پاکستانی نژاد برطانوی باکسر عامر خان کی اہلیہ فریال سسرالی جھگڑوں سے تنگ آگئیں، شوہر کو الٹی میٹم دے دیا کہ گھر والوں اور مجھ میں سے کسی ایک کو چن لو۔ جبکہ ان کو یہ بھی خطرہ ہے کہ عامر خان کی مزید شرمناک ویڈیوز لیک ہو سکتی ہیں ۔ اس لیے وہ اپنے خاوند کیساتھ ہر وقت چپکی رہتی ہیں ۔ باکسر عامر خان فریال اور ان کے اہل خانہ کی مثلث ہر روز نئی سے نئی خبروں کا مرکز بن رہی ہے، کچھ روز پہلے عامر اور فریال ایک ساتھ سامنے آئے اور دونوں نے عامر کے بھائی کی شادی کی تقریب میں بھی شرکت نہ کی تو ایسا لگا جیسے فریال اور عامر میں اب سب اچھا ہو گیا ہے ۔برطانوی میڈیا رپورٹس کے مطابق فریال نے اب عامر کو الٹی میٹم دے دیا ہے۔ فریال نے عامر کو وارننگ دے دی کہ خاندان والوں اور فریال میں سے کسی ایک کا انتخاب کرلو، اخبار کے مطابق فریال سسرالی رشتے داروں سے بالآخر مکمل بیزار ہو گئی ہیںاور انہوںنے عامر کی ہر حرکت پر نظر رکھی ہوئی ہے۔

اسلام آباد(ویب ڈیسک ) سابق ٹیسٹ کرکٹر سرفراز نواز نے ڈاکٹر، پروفیسر اور جادوگر سے ٹیم کی جانچھڑانے کا مشورہ دےدیا، آسٹریلیا میں قومی کرکٹ ٹیم کی شرمناک شکستوں کے ذمہ دار مکی آرتھر ہیں، ان کی جگہ کسی سابق پاکستانی ٹیسٹ کرکٹر کو ذمہ داری سونپی جائے، وطن واپسی آنے پر پوری ٹیم کی کارکردگی کا پوسٹ مارٹم ہونا چاہیے، چلے ہوئے کارتوسوں کے بجائے نوجوان کرکٹرز کو سامنے لانا مناسب ہوگا۔ان خیالات کا اظہار انہوںنے میڈیا سے گفتگو کرتے ہوئے کیا ۔ انہوںنے کہا کہ آسٹریلیا میں شکست سے پی سی بی انتظامیہ کی کارکردگی کا پول کھل گیا، سلیکشن کمیٹی کے عہدیدار ڈومیسٹک میچز میں نوجوان کھلاڑیوں کوتلاش کریں، چلے ہوئے کارتوسوں سے جان چھڑائی جائے۔ انہوں نے پلیئرز کی عرفیت کے حوالے سے کہا کہ ٹیم میں ڈاکٹر، پروفیسر اور جادوگر تو موجود ہیں لیکن جیت میں کردار ادا کرنے والا کوئی نہیں ہے، یہ عجیب بات ہے کہ شکست پر کھلاڑی شرمندہ ہوتے نہ ہی اپنا احتساب کرتے ہیں جب کہ ماضی میں ناکامیوں کے بعد کوچز اور سینئر کھلاڑی غلطیوں سے آگاہ کرتے تھے اب ایسا نہیں ہوتا۔سابق ٹیسٹ کرکٹر نے کہا کہ پی سی بی میں حکومت کے من پسند افراد کا قبضہ ہے جو اپنی مرضی کے فیصلے کرتے ہیں، اسی وجہ سے ملکی کرکٹ تباہ اوربورڈ آفیشلز مالدار ہو رہے ہیں،آسٹریلیا میں عبرتناک شکست پر قومی اسمبلی اور سینیٹ کی قائمہ کمیٹیز کو نوٹس لینا چاہیے۔سرفراز نواز نے کہا کہ پاکستانی ٹیم میں موجود پلیئرز کھیلنے کیلئے سنجیدہ نہیں ہیں، عمر رسیدہ پلیئرز صرف یو اے ای میں رنز بنانے میں ماہر ہیں، آسٹریلیا، نیوزی لینڈ اور انگلینڈ میں یہ بری طرح ناکام ہو جاتے ہیں، گزشتہ تین برسوں سے پی سی بی انتظامیہ اور سلیکشن کمیٹی فاسٹ بولر تیار نہیں کر سکی، قومی ٹیم بیٹنگ، بولنگ اور فلیڈنگ کے شعبوں میں مکمل طور پر ناکام ہوگئی ہے۔