راولپنڈی (خصوصی رپورٹ) کسانوں کیلئے وزیراعظم کا پیکیج جس کے بارے میں بڑا شور مچایا جا رہا تھا وہ بری طرح ناکام ہو گیا ہے۔ اس کا اعلان 14ستمبر 2015ءکو ہوا تھا۔ بزنس ریکارڈر کی رپورٹ کے مطابق کسانوں کی مالی امداد کیلئے 40بلین روپے رکھے گئے تھے لیکن اس میں سے صرف 25بلین جاری کئے گئے ہیں۔ پیکیج کے دوسرے پہلوﺅں پر بھی عملدرآمد کی رفتار انتہائی سست ہے۔ متعلقہ وزارت کے ایک اعلیٰ افسر کے حوالے سے اخبار نے لکھا ہے کہ پیکیج کے تحت کسانوں کیلئے مالی امداد حاصل کرنے کا طریق کار انتہائی مشکل ہے‘ صرف بااثر لوگ ہی اس سے فائدہ اٹھا سکتے ہیں۔ یہ معاملہ پارلیمنٹ کی سٹینڈنگ کمیٹی میں بھی زیربحث آیا جہاں اپوزیشن کے ارکان نے الزام لگایا کہ حکومت اپنے چہیتوں کو نواز رہی ہے‘ خصوصاً مالی امداد اور کھاد پر سبسڈی کے سلسلے میں غریب کسانوں کا کوئی پرسان حال نہیں۔ پیکیج میں کہا گیا ہے کہ کسانوں کو 147بلین روپے کا براہ راست فائدہ ہو گا جبکہ 194بلین روپے کے زرعی قرضے دیئے جائیں گے۔ صدر پاکستان کسان اتحاد پنجاب کا کہنا ہے کہ 40میں سے 25بلین روپے کاٹن پیدا کرنے والوں کو 5ہزار فی ایکڑ اور چاول پیدا کرنے والوں کو بھی 5ہزار فی ایکڑ کے حساب سے دیئے جانے تھے۔ بدقسمتی سے حکومت نے یہ رقم بااثر زمینداروں اور چہیتوں میں بانٹ دی ہے۔
کسان پیکیج

لاہور (خصوصی رپورٹ) گلی‘ محلے کی صفائی اور کوڑا اٹھانے کے بھی اب پیسے لگیں گے۔ خواجہ احمد حسان اور لارڈ میئر کی زیرصدارت اجلاس میں تجویز سامنے آ گئی۔ مسلم لیگ (ن) کے سینئر رہنما خواجہ احمد حسان اور لارڈ میئر لاہور کرنل (ر) مبشر جاوید کی زیرصدارت اجلاس میں ڈپٹی میئرز لاہور میاں طارق‘ حاجی اللہ رکھا‘ رانا اعجاز حفیظ‘ مشتاق مغل‘ راﺅ شہاب الدین سمیت لاہور ویسٹ مینجمنٹ کمپنی کے عہدیداروں نے شرکت کی۔ اجلاس میں مقامی حکومت کو تجویز دی گئی ہے کہ شہر کو مختلف درجات پر تقسیم کرتے ہوئے گھروں سے 15سے 35روپے فی مرلہ ویسٹ چارجز وصول کئے جائیں تاکہ ویسٹ کمپنی کے اخراجات کو پورا کیا جا سکے۔ پہلے مرحلے میں یہ پیسے پوش علاقوں سے وصول کئے جائیں گے تاہم بعدازاں دیگر علاقوں کو بھی اس میں شامل کیا جائے گا۔ مذکورہ تجویز پر ڈسٹرکٹ اسمبلی سے قانون سازی کے بعد عملدرآمد کرایا جائے گا۔ لاہور شہر کو 3 کیٹیگری میں تقسیم کیا گیا ہے جس میں کیٹیگری ون‘ ٹو اور تھری کو شامل کیا گیا ہے۔ میئر کرنل (ر) مبشر جاوید نے بتایا کہ شہر کے پوش ایریاز سے اس کا آغاز کیا جائے گا۔ علاقوں کی صفائی کی مد میں لاہور کے رہائشیوں سے ان کے مکانات کے حساب سے رقم وصول کی جائے گی جس کے مطابق 15 روپے سے 35 روپے فی مرلہ کے حساب سے شہریوں سے صفائی کی مد میں وصولی کی جائے گی اور اس کیلئے باقاعدہ اجازت ڈسٹرکٹ اسمبلی سے لی جائے گی۔
کوڑا ٹیکس

اسلام آباد(آئی این پی ) سپریم کورٹ نے وفاقی وزارت داخلہ کی جانب سے ماڈل گرل ایان علی کا نام ای سی ایل میں ڈالنے کی درخواست مسترد کرتے ہوئے ماڈل کا نام ایگزٹ کنٹرول لسٹ سے نکالنے کا حکم دے دیا۔ سپریم کورٹ میں ماڈل ایان علی کا نام ای سی ایل میں ڈالنے سے متعلق کیس کی سماعت چیف جسٹس ثاقب نثار کی سربراہی میں 3 رکنی بینچ نے کی۔ اس موقع پر چیف جسٹس نے ایڈیشنل اٹارنی جنرل سے استفسار کیا کہ ایان علی کا نام تو آپ نے تیسری بار ای سی ایل میں ڈال دیا ہے، بتائیں کہ حکومت نے قتل کے کتنے ملزموں کا نام ای سی ایل میں ڈالا، لگتا ہے کہ آپ ہر قیمت پر ملزمہ کو روکنا چاہتے ہیں۔ جسٹس عمر عطا بندیال نے ریمارکس دیئے کہ اٹارنی جنرل صاحب ہم آپ سے دائرہ اختیار کا پوچھ رہے ہیں اور آپ اپیل کا دفاع کر رہے ہیں۔ انہوں نے پوچھا کہ ایک تفتیشی افسر کو قتل کر دیا گیا، کیا پنجاب حکومت نے کوئی شکایت کی۔میڈیا رپورٹس کے مطابق جسٹس ثاقب نثار نے استفسار کیا کہ بتائیں کہ ایان علی کے خلاف مقدمہ کب درج ہوا تھا، جس پر ایڈیشل اٹارنی جنرل نے بتایا کہ 2 جون 2015 کو ایان علی کے خلاف مقدمہ درج ہوا تھا، چیف جسٹس نے ریمارکس دیئے کہ بہت افسوس کی بات ہے کہ اتنا عرصہ گزر جانے کے باوجود بھی کیس کی تفتیش مکمل نہیں ہو سکی۔ جسٹس مقبول باقر نے ریمارکس دیئے کہ آپ ہائی کورٹ کے حکم کی خلاف ورزی کر کے ہم سے مدد مانگ رہے ہیں۔