اسلام آباد (نیوز ایجنسیاں) تحریک انصاف کے چیئر مین عمران خان نے کہا ہے کہ شریف خاندان کے صاحبزادوں نے انصاف سے بچنے کے لئے منی لانڈرنگ کے الزامات اپنے دادا پر عائد کر دیئے ہیں ۔ سپریم کورٹ جو بھی فیصلہ کرے گی اس سے خوشحال پاکستان معرض وجود میں آئے گا ۔ وزیراعظم نے کرپشن چھپانے کے لئے تمام قومی اداروں کو یرغمال بنا رکھا ہے۔ سپریم کورٹ میں شریف خاندان پر واضح ہوا ہے کہ ان کے پاس منی ٹریل نہیں ہے۔ ان خیالات کا اظہار تحریک انصاف کے چیئر مین عمران خان نے سپریم کورٹ کے باہر صحافیوں سے گفتگو میں کیا۔ انہوں نے کہا کہ پانامہ میں جو انکشاف ہو رہے ہیں وہ اب قوم کے سامنے ہیں۔ اسمبلی تقریر میں واضح دستاویز پیش کرنے کا کہا گیا تھا لیکن سپریم کورٹ میں حکومتی وکیل کہتے ہیں کہ یہ تو بہت دیر کی بات ہے۔ کیش ٹرانزیکشن ہوئی تھی۔ یعنی کہ ایک کروڑ بیس لاکھ درہم گاڑیوں میں یہ لوگ لی کر گئے تھے۔ عمران خان نے کہا کہ اب کیس کے آگے چلتے ہی بیان بھی بدلتے جا رہے ہیں۔ دبئی سے جدہ اور پھر جدہ سے لندن پیسے بھیجنے کی کوئی دستاویز بھی نہیں ہے۔ اب سپریم کورٹ کو بتایا گیا ہے کہ قطری کو پیسے دیئے گئے اور پھر قطری نے پیسے لندن میں پہنچا دیئے۔ بیچ میں جدہ کا نام ہی اڑ گیا ہے۔ انہوں نے کہا کہ گلف سٹیل مل جس نے انڈے دیئے آج سپریم کورٹ میں اس پر بھی بات ہوئی ۔ ڈیڑھ کروڑ درہم گلف سٹیل مل نے نقصان کیا تھا تو پھر پیسہ آگے کیسے گیا۔ ان کے پاس کوئی جواب بھی نہیں تھا۔ عمران خان نے کہا کہ پھر پیسے ان لوگوں نے کیش دیئے بینکوں کے ذریعے بھی نہیں دیئے گئے ورنہ ان کے پاس منی ٹریل ہوتا۔ انہوں نے کہاکہ گلف کے پاس تو پیسے نہیں تھے وہ نقصان میں جا رہی تھی لیکن حقیقت میں اسحاق ڈار وعدہ معاف گواہ بن گئے تھے۔ وہ اصل منی ٹریل تھا اور انہوں نے خود کہا تھا کہ وہ نواز شریف کے لئے منی لانڈرنگ کرتے تھے۔ پھر کیس ہائی کورٹ میں چیئر مین نیب نے بری قرار دیا کیونکہ وہ چیئر مین نیب نواز شریف کا اپنا لگایا ہوا تھا اور اس نے آگے گواہ کو بھی بری کروا دیا۔ سپریم کورٹ نے ایسے پہلے وزیراعظم کی کبھی بھی تلاشی نہیں لی پہلی مرتبہ پاکستان کی تاریخ میں وزیراعظم کی تلاشی لی جا رہی ہے۔نواز اگر خود نیب کا چیئر مین بنائیں گے تو پھر وہ کیسے نواز شریف کے خلاف ایکشن لے گا۔ ایف بی آر شریف خاندان کو بچانے کے لئے دستاویز بنا رہی ہے۔ نیب ایف آئی اے، ایف بی آر تمام ادارے وزیراعظم کے نیچے ہوں گے تو پھر کس طرح وزیراعظم کی کرپشن کے خلاف ایکشن ہو گا۔ انہوں نے کہا کہ یہ تو اپوزیشن نے پانامہ انکشاف کے بعد ایکشن لیا ورنہ دو سو سال گزرنے کے بعد بھی یہ بات عیاں نہ ہوتی۔ عمران خان نے کہا کہ وقت گزرنے کے ساتھ بیانات بدل رہے ہیں، سارا کچھ میاں شریف پر ڈالا جارہا ہے، نواز شریف کو نہیں پتہ تھا کہ ان کو عدالت میں آنا پڑیگا، اسحاق ڈار کے اعترافی بیان میں ساری منی ٹریل موجود ہیں، ایک جھوٹ کو چھپانے کیلئے سو جھوٹ بولنے پڑتے ہیں، ملک میں کوئی ادارہ آزاد نہیں نیب کنٹرولر ادارہ ہے وہ مجرموں کو کیسے پکڑے گا، اسمبلی میں کہا گیا ثبوت ہیں اب بتائیں کہاں ہیں، عمران خان نے کہا کہ پاکستان کی تاریخ میں کبھی کسی طاقتور کی اس طرح سے تلاشی نہیں لی گئی، پوری دنیا میں جمہوریت میں جب بھی کسی وزیر یا وزیر اعظم کے خلاف تحقیقات ہوتی ہیں اسے استعفیٰ دینا پڑتا ہے کیونکہ اس کے نیچے ادارے کام کرتے ہیں۔

اسلام آباد(آئی این پی ) صدر ممنون حسین اور وزیرا عظم محمد نواز شریف نے قومی معیشت، بدعنوانی میں کمی کے بارے میں عالمی اداروں کی رپورٹ اور عوام کے معیار زندگی میں بہتری کے لیے حکومت کی کوششوں،پاک چین اقتصادی راہداری منصوبے پر جاری پیش رفت پر اطمینان کا اظہار کرتے ہوئے دہشتگردی اور انتہاپسندی کے خاتمے کیلئے کارروائیاں جاری رکھنے کے عزم کا اعادہ کیاگیا اور اس بات پر اتفاق کیاگیا کہ دہشتگردی اور انتہا پسندی کی مکمل بیخ کنی تک چین سے نہیں بیٹھا جائے گا، تعلیم اور صحت کی سہولتوں کو بہتر بنانے کی حکومتی پالیسی جاری رہے گی اور حکومت ترقیاتی ایجنڈے سے اپنی توجہ نہیں ہٹائے گی،مت ترقیاتی عمل کے دوران قومی سرمائے کے درست اور شفاف استعمال کو ہر صورت میں یقینی بنائے گی اور بدعنوانی کو کسی بھی سطح پر برداشت نہیں کیا جائے گا، پاک چین اقتصادی راہداری کے عظیم الشان منصوبہ سے تمام صوبوں اور خطوں کو یکساں فوائد حاصل ہوں گے۔ پیر کو صدر مملکت ممنون حسین سے وزیر اعظم محمد نواز شریف نے ایوان صدر میں ملاقات کی۔ملاقات میں دونوں رہنماوں نے قومی اور بین الاقوامی امور پر با ت چیت کی۔وزیرا عظم نواز شریف نے صدر مملکت ممنون حسین کو غیر ملکی دورے سمیت قومی امور پر حکومت کے فیصلوں سے آگاہ کیا۔ ملاقات میں دونوں رہنماوں نے قومی معیشت، بدعنوانی میں کمی کے بارے میں عالمی اداروں کی رپورٹ اور عوام کے معیار زندگی میں بہتری کے لیے حکومت کی کوششوں پر اطمینان کا اظہار کیا۔ صدر مملکت نے کہا کہ قومی معیشت کے استحکام کے سلسلے میں حکومت کی پالیساں درست سمت میں ہیں۔انھوں نے مزید کہا کہ وزیر اعظم اور ان کی اقتصادی ٹیم اپنی مضبوط حکمت عملی کے تحت قومی معیشت کی بہتری کے لیے قابِل قدر کردار ادا کر رہی ہے جس کو بین الاقوامی سطح پر بھی سراہا گیا ۔ملک میں پاکستان اسٹاک ایکسچینج کی بہتر کارکردگی پر بھی ا ظہار اطمینان کیا گیا۔دونوں رہنماوں نے اس عزم کا اظہار کیا کہ ملک سے دہشت گردی اور انتہا پسندی کے خاتمے تک کارروائیاں جاری رہیں گی اور ان کی بیخ کنی تک چین سے نہیں بیٹھا جائے گا۔ قومی صحت پروگرام پر عمل درآمد کے بارے اجلاس سے خطاب کرتے ہوئے وزیراعظم محمد نواز شریف نے کہاکہ عوام کو طویل عرصے تک ان کے حقوق سے محروم رکھا گیا ‘ عوام کو صحت کی معیاری سہولتوں تک رسائی ان کا بنیادی حق ہے‘ وفاقی حکومت پورے ملک میں صحت پروگرام پر عمل درآمد یقینی بنائے گی‘ وسائل کی کمی کو پروگرام کی راہ پر حائل نہیں ہونے دیں گے‘ پروگرام کی کامیابی کے لئے اداروں کا تعاون قابل تعریف ہے‘ اقتصادی اور سماجی محاذوں پر اپنی تمام صلاحیتیں استعمال کرنا ہوں گی۔ وزیراعظم نے کہا کہ عوام کو صحت کی معیاری سہولتوں تک رسائی ان کا بنیادی حق ہے۔ انہوں نے کہا کہ بہترین صلاحیتوں کے ذریعے ہی قوم کو صحت کی معیاری سہولتیں فراہم کرسکتے ہیں۔ نادار افراد کو جامع پیکج کے ذریعے صحت کی خدمات فراہم کرنا چاہتے ہیں۔ بیماریاں اور غربت نادار خاندانوں کے لئے مہلک ثابت ہوتی ہیں۔دریں انثاءوزیراعظم سے پاک بحریہ کے سربراہ ایڈمرل ذکاءاللہ نے ملاقات کی، ایڈمرل ذکا اللہ نے وزیراعظم کو پاک بحریہ کے پیشہ وارانہ امور پر بریفنگ دی ۔ملاقات کے دوران گفتگو کرتے ہوئے وزیراعظم نے کہاکہ ملکی دفاع کیلئے پاک بحریہ کا کردار انتہائی اہم ہے،پاک بحریہ کی استعداد کار بڑھانے کیلئے ہرممکن اقدامات کریںگے۔ اس موقع پر نیول چیف نے کہاکہ پاک بحریہ سمندری حدود کی حفاظت اور ہرقسم کے خطرے سے نمٹنے کیلئے تیار ہے۔ رکن قومی اسمبلی غلام بی بی بھروانہ نے وزیراعظم محمد نواز شریف سے ملاقات کی اس موقع پر وزیراعظم نے کہا کہ موجودہ حکومت کی ترقیاتی اور فلاحی سکیمیں پاکستان کے عوام کی خدمت اور ملک میں دستیاب مواقع سے بھرپور استفادہ کے لئے اسے صحیح سمت میں گامزن رکھنے کے لئے ہیں۔ ملاقات میں غلام بی بی بھروانہ نے کہا کہ ملک میں سیکورٹی کی مجموعی صورتحال میں نمایاں بہتری آئی ہے جس سے وزیراعظم کی قیادت میں اقتصادی استحکام کی راہ ہموار ہوئی۔ انہوں نے کہا کہ ملک کے طول و عرض میں رابطے کے منصوبہ جات اور بجلی کے شعبہ میں خطیر سرمایہ کاری سے ملک کی معاشی صورتحال میں مزید بہتری آئے گی۔