کراچی(ویب ڈیسک)اسٹیٹ بینک نے بینک آف چائنا کو شیڈول بینک کا درجہ دینے کا نوٹی فکیشن جاری کردیا دوسری جانب دو ماہ کے دوران پاکستان میں 45 کروڑ 80 لاکھ ڈالر کی خطیر رقم کی بیرونی سرمایہ کاری ہوچکی ہے۔تفصیلات کے مطابق اسٹیٹ بینک پاکستان نے بینک آف چائنا کو کمرشل بینکنگ کے بعد شیڈول بینک کا درجہ بھی دے دیا ہے جس کے بعد بینک ا?ف چائنا جلد پاکستان کے تمام بڑے شہروں میں اپنیبرانچیں قائم کرے گا۔دوسری جانب اسٹیٹ بینک پاکستان کی جاری کردہ رپورٹ کے مطابق براہ راست بیرونی سرمایہ کاری میں 155 فیصد اضافہ ہوا ہے۔ اور گزشتہ 2 ماہ کے دوران پاکستان میں 45 کروڑ 80 لاکھ ڈالر کی براہ راست بیرونی سرمایہ کاری ہوئی ہے جو کہ نہایت خوشگوار اضافہ ہے.اضافہ سی پیک کی وجہ سے ہوا۔ذرائع اسٹیٹ بینک کا کہنا ہے کہ براہ راست بیرونی سرمایہ کاری میں اضافہ سی پیک کی وجہ سے ہوا ہے جس کے تحت چین سے 2 ماہ میں 25 کروڑ 80لاکھ ڈالر کی سرمایہ کاری پاکستان آئی ہے جب کہ امریکا سے 2 ماہ میں 20 کروڑ 20 لاکھ ڈالر اور ملائیشیا سے 2 ماہ میں 11 کروڑ ڈالر کی سرمایہ کاری پاکستان آئی.پاک چین اقتصادی راہداری جوں جوں پایہ تکمیل کو پہنچ رہی ہے ویسے ویسے پاکستان میں بیرونی سرمایہ کاری میں اضافہ ہورہا ہے اور بین الاقوامی سرمایہ کار پاکستان میں دلچسپی ظاہر کررہے ہیں.واضح رہے کہ یہ دوسرا چینی بینک ہے جسے پاکستان میں آپریٹ کرنے کی اجازت دی گئی۔اس سے قبل، انڈسٹریل اینڈ کمرشل بینک آف چائنا (آئی سی بی سی) نے 20 مئی 2011 کو اسلام آباد اور کراچی میں اپنی دو برانچز قائم کیں تھیں، آئی سی بی سی مختلف شعبوں میں سروسز فراہم کررہا ہے جس میں کوآپریٹ فنانس، بینکنگ سرمایہ کاری، غیر ملکی سرمایہ، قرضے اور ورکنگ کیپٹل لون شامل ہیں۔یاد رہے کہ رواں سال مئی میں اسٹیٹ بینکنے بینک آف چائنا کو لائسنس جاری کیا تھا۔بینک آف چائنا پاکستان میں بزنس بینکنگ کے حوالے سے اہم آپریشنل اور ریگولیٹری ضروریات پوری کرنے کی کوشش کرے گا۔بینک آف چائنا، چینی حکومت کے تحت سرمایہ کاری کے ادارے چائنا سینٹرل ہیوجن کا ذیلی ادارہ ہے۔

نئی دہلی (خصوصی رپورٹ) وزیراعظم نریندر مودی نے گجرات میں دنیا کے دوسرے اور ملک کے سب سے بڑے سردار سروور ڈیم کا افتتاح کردیا۔ یہ ڈیم 56سال کی مدت میں مکمل ہوا ہے اس سے علاقے کے 10لاکھ کسانوں کو فائدہ ہوگا۔ بھارتی میڈیا کے مطابق افتتاحی تقریب کے موقع پر وزیر اعظم کے ہمراہ وزیر ٹرانسپورٹ نتن گڈکری، گجرات کے وزیراعلیٰ وجے روپانی، نائب وزیراعلیٰ نتن پٹیل، سابق وزیراعلیٰ آنندی بین پٹیل موجود تھے۔ سردار سروور ڈیم کا منصوبہ سردار ولبھ بھائی پٹیل نے آزادی سے قبل 1946ءمیں شروع کیا تھا جبکہ 5اپریل 1961ءکو بھارت کے پہلے وزیراعظم پنڈت جواہر لال نہرو نے سنگ بنیاد رکھا۔ بعدازاں اس کی تعمیر کا کام 1987ءمیں شروع ہوا۔ اس ڈیم کی لمبائی 1.2کلومیٹر ہے جو ملک کا سب سے طویل ڈیم سمجھا جارہا ہے۔ اس پر 44ہزار کروڑ روپے خرچ ہوئے۔ اس کی اونچائی138.68میٹر ہے جس میں 4.73ملین کیوبک میٹر قابل استعمال جگہ ہے۔ گجرات کے اس منصوبے سے دیگر ریاستوں کی بہ نسبت زیادہ فائدہ ہوگا۔ قحط زدہ علاقوں میں پانی پائپ لائنوں کے ذریعے پہنچا کر تقریباً 18لاکھ ہیکٹر اراضی کو سیراب کیا جائے گا۔ اس ڈیم سے 10لاکھ کسانوں کو براہ راست فائدہ پہنچے گا۔ اس ڈیم میں نصب 2ٹاورزکے ذریعے 1200میگا واٹ بجلی پیدا ہوگی جس کا 57فیصد حصہ مہاراشٹر، 27فیصد مدھیہ پردیش اور 16فیصد گجرات کو ملے گا۔ اس کے ذریعے سالانہ تقریباً 1600کروڑ روپے زراعت سے آمدنی ہوگی جبکہ بجلی اور پانی کی سپلائی سے 175کروڑ روپے حاصل ہونگے۔

سربیا (خصوصی رپورٹ) سربیا کی وزیراعظم بلقان ممالک کے سربراہوں میں ایسی پہلی سربراہ ہیں جنہوں نے ہم جنس پرستوں کی پرائڈ پریڈ میں شرکت کی ہے۔ اینابرنابک پہلی ہم جنس پرست اور پہلی خاتون ہیں جو سربیا کی سربراہی کررہی ہیں۔ اس ملک میں عام طور پر ہم جنس پرستوں کی پرائڈ پریڈ ہمیشہ اچھی طرح منعقد نہیں ہوسکی ہے۔ سات سال قبل بلغراد میں منعقدہ ایک ریلی میں ہم جنس پرست مخالف لوگوں کے ایک حملے میں 100 سے زیادہ افراد زخمی ہوگئے تھے جن میں سے زیادہ تر پولیس والے تھے۔ اس کے بعد پانچ سال تک حکام اس کی اجازت دینے سے قاصر رہے۔ بہرحال 2014ءمیں سخت سکیورٹی کے دوران اسے پھر سے جاری کیا گیا لیکن ملک میں بااثر آرٹھوڈوکس چرچ نے اس تقریب کو تنقید کا نشانہ بنایا ہے اور سول سوسائٹی نے بتایا ہے کہ کئی لوگوں کی اس میں شرکت کرنے کی وجہ سے ملازمت چلی گئی ہے۔