لندن(صباح نیوز)وزیراعظم شاہد خاقان عباسی نے کہا ہے کہ وزیر خارجہ خواجہ آصف کا گھر کی صفائی سے متعلق بیان درست ہے میں بھی اس موقف کا حامی ہوں کہ اپنے گھر کی صفائی ہونی چاہیے ۔ لندن میں ایک نجی ٹی وی کے ساتھ خصوصی گفتگو میں انہوںنے کہا کہ خواجہ آصف کا موقف بالکل درست ہے ہم یہ سمجھتے ہیں کہ ہم سب کو اپنے اپنے گھر اور اپنی اپنی جگہ صفائی کی ضرورت ہے ۔ انہوں نے کہا کہ گزشتہ روز حلقہ این اے 120کے انتخابات سے ثابت ہوا ہے کہ پاکستان کے عوام کیا چاہتے ہیں اور میاں نوازشریف کی قیادت ہی اس ملک کی ترقی اور خوشحالی کی ضامن ہے ۔ انہوںنے کہا کہ احتساب کا عمل اتنا شفاف نہیں ہے اس پر اپنی ایک خاص حکمت عملی بنا رہے ہیں جس پر بڑی جلدی قوم کو اعتماد میں لیں گے ۔ ایل این جی کیس میں حاضر ہوں میرا دامن صاف ہے عدالت میں سب کچھ سامنے آجائے گا۔ شیخ رشید کے الزامات جھوٹے ثابت ہوں گے میں کہیں نہیں جاﺅں گا۔ مجھے علم ہے بنگلہ دیش سمیت پوری دنیا میں جہاں بھی ایل این جی ہے ان سب سے سستے نرخوں پر لی ہے ۔ شاہد خاقان عباسی نے کہا کہ پاکستان نے امریکہ کے سامنے اپنی قومی پالیسی واضح کر دی ہے، نیویارک میں پاکستان کا دہشت گردی کے حوالے کردار پر دنیا کو بتائیں گے۔وزیراعظم شاہد خاقان عباسی نیویارک پہنچ گئے پاکستانی سفیر اعزاز چودھری اور ملیحہ لودھی نے ایئرپورٹ پر ان کا استقبال کیا ہے وہ پرسوں اقوام متحدہ کی جنرل اسمبلی سے خطاب کریں گے۔

اسلام آباد(مانیٹرنگ ڈیسک) چیئرمین تحریک انصاف عمران خان نے کہا ہے کہ این اے120 میں عوام کا فیصلہ سامنے آیا ہے، تمام تر حکومتی اختیارات اور مسائل کے استعمال کے باوجود ن لیگ کا30 فیصد ووٹ کم ہونا بتاتا ہے کہ اس پارٹی میں بڑا ڈینٹ پڑچکا ہے، آرٹیکل62.63 مجھ پر لگانا ناممکن ہے، اگلا الیکشن تحریک انصاف جیتے گی، ضمنی الیکشن میں اخلاقی فتح عدالت کی ہوئی ہے، خصوصی انٹرویو دیتے ہوئے انہوں نے کہا کہ ن لیگ نے اتنا زور جنرل الیکشن میں نہیں لگایا جتنا ضمنی الیکشن میں لگایا گیا، وزیر مشیر حلقہ میں کمپین کرتے رہے جبکہ ہمارے ارکان اسمبلی کو بھی وہاں جانے سے روکا گیا، ن لیگ اور الطاف کی ایم کیو ایم میں کوئی فرق نہیں ہے، تمام تر حربے استعمال کرنے کے باوجود ن لیگ کا ووٹرز نے انکا ساتھ نہ دیا، کیونکہ باشعور طبقہ ان کی عدلیہ مخالف مہم کے خلاف ہے، ن لیگ تو کرپشن کو جائز سمجھتی ہے، قومیں جنگ میں ہار کر تو دوبارہ کھڑی ہوسکتی ہیں لیکن اخلاقیات تباہ ہوجائیں تو نہیں بچ سکتیں، صادق اور امین ہونا تو لیڈر شپ کیلئے ضروری ہے کیونکہ عوام کا پیسہ کسی کرپٹ کو نہیں سونپا جاسکتا، حدیبیہ کیس میں ہر چیز واضح ہے، شریف فیملی منی لانڈرنگ میں ملوث رہی، عمران خان نے کہا کہ تسلیم کرتا ہوں کہ ہم ضمنی الیکشن میں مزید ووٹ حاصل کرسکتے تھے، لیکن ہم نے کمپین شروع کرنے میں تاخیر کردی، یاسمین راشد ووٹرز کو داد دیتا ہوں جنہوں نے بڑی استقامت سے مقابلہ کیا، شریف خاندان اور ن لیگ کی سوچ یہ ہے کہ فوج مدد نہ کرے تو اسے اپنے خلاف سمجھتے ہیں،2013ءالیکشن میں فوج نے ان کی مدد کی، این اے120 الیکشن میں3 یونین کونسلز کو چیک کررہے ہیں، باقی الیکشن میں دھاندلی نہیں ہوئی، دھرنے اور سوشل میڈیا نے عوامی شعور کو بڑھایا ہے، اگلے الیکشن میں جیت ہماری ہوگی، آج سندھ حیدر آباد میں جلسہ ہے تبدیلی کیا آئی لوگ خود دیکھیں گے، ن لیگ کے گڑھ میں ان کا30 فیصد ووٹ کم ہوا ہے، باقی سارے ملک میں ان کا ووٹ مزید کم ہوگا، لیگی رہنما مجھ سے رابطے میں ہیں، تاہم وہ ان کی انتقامی کارروائیوں سے ڈرتے ہیں، کیونکہ ن لیگ سیاسی پارٹی نہیں بلکہ ایک مافیا ہے، چودھری نثار سے کوئی رابطہ نہیں ہے، تاہم ان کو داد دونگا کہ یہ تو کہا کہ مریم نواز کی قابلیت کیا ہے، چودھری نثار سے رابطہ نہیں ہے بلکہ ان پر دھرنے کے دوران شیلنگ کرانے پر آج بھی غصہ ہے۔ انہوں نے کہا کہ آرٹیکل62/63 کا اطلاق مجھ پر نہیں ہوسکتا، جو شخص باہر سے پیسے کما کر پاکستان لاتا ہے اسے کیسے نااہل قرار دیا جاسکتا ہے، الیکشن کمیشن میں آج پارٹی کی تمام فارن فنڈنگ کی تفصیل جمع کرادی ہے،40 ہزار لوگوں کے نام دیئے ہیں، الیکشن کمیشن غیر جانبدار نہیں ہے، اگر ہائیکورٹ نے مجھے ریلیف نہ دیا اور الیکشن کمیشن پیش ہونے کا کہا تو پیش ہوجاو¿ں گا، الیکشن کمیشن ن لیگ کا طفیلی بنا ہوا ہے، ضمنی الیکشن میں ترقیاتی کام ہوئے، وزیر کمپین کرتے نظر نہیں آتے لیکن عمران خان کی بڑی تکلیف ہے اور اس کے وارنٹ جاری ہورہے ہیں، عمران خان نے کہا کہ کرپشن کی بات ہو اور زرداری کا نام نہ آئے ایسا کیسے ہوسکتا ہے، نواز شریف اور زرداری نے کرپشن کیلئے ادارے تباہ کردیئے، ملک کے ساتھ جو سلوک کیا وہ کوئی دشمن بھی نہیں کرسکتا، ان دونوں نے انتقامی کارروائیوں کیلئے پولیس کے نظام کو تباہ کردیا، پیسہ بنانے کیلئے ادارے تباہ کردیئے، ریگولیٹری اداروں کو تباہ کردیا۔