ممبئی (شوبز ڈیسک) بھارتی سنسر بورڈ کی طرف سے فلم کے کچھ سین نامناسب قرار دینے کے بعد بالی ووڈ کے سنجے دت کی فلم بھومی ریلیز سے قبل ہی مشکلات کا شکار ہوگئی ۔بالی ووڈ کے منا بھائی سنجے دت ان دنوں اپنی فلم بھومی کی تشہیر میں مصروف ہیں ، یہ فلم سنجے دت کے کیرئیر کے لیے نہایت اہم ہے کیونکہ جیل سے رہائی کے بعدسنجے دت اس فلم کے ذریعے طویل عرصے بعد دوبارہ فلموں میں جلوہ گر ہورہے ہیں تاہم بھارتی سنسر بورڈ نے سنجےدت کی خوشیوں پر پانی پھیرتے ہوئے فلم کے کچھ مناظر نامناسب قراردیتے ہوئے انہیں فلم سے ہٹادیا ہے۔بھارتی میڈیا کے مطابق فلم بھومی کی کہانی باپ اور بیٹی کے رشتے کے گرد گھومتی ہے جس میں سنجے دت باپ اور آدیتی را حیدری ان کی بیٹی کاکردار نبھارہی ہیں تاہم فلم میں کچھ مکالمے اور سینز پر اعتراض کرتے ہوئے بھارتی سنسر بورڈ نے انہیں فلم سے خارج کرنے کا حکم دیاہے۔ ، کل ملا کر سنسر بورڈ نے فلم میں 12 سینز کاٹے ہیں جس کے باعث سنجے دت اور فلم کے ہدایت کار امنگ کمار کی پریشانیوں میں اضافہ ہوگیا ہے۔بھومی 22 ستمبر کو ریلیز کی جانی تھی۔

ممبئی (شوبز ڈیسک) بالی وڈ اداکارہ جیکولین فرنینڈس نے سلمان خان کے ساتھ فلم ”جڑواں 2 “کی تشہیر شروع کر دی۔ بھارتی ذرائع کے مطابق اداکارہ جیکولین فرنینڈس نے انسٹاگرام پر فلم ”جڑواں 2 “ کی تشہیر کے ساتھ ساتھ لندن اور برمنگھم میں سلمان خان کے دبنگ ٹور میں پرفارم کرنے کے دوران لی گئی تصاویر شیئر کی ہیں جس میں انہوں نے ”جڑواں 2“ کے گانوں ”اونچی ہے بلڈنگ “ پر ڈانس کیا۔فلم کی ہدایات ڈیوڈ دھون جبکہ پیشکش ساجد نادیہ والانے دی ہے۔فلم 29 ستمبر کو ریلیز کی جائے گی۔یاد رہے کہ جڑواں ٹو کی کاسٹ میں سلمان خان شامل نہیں ہیں،ان کا کردار ورون دھون نے ادا کیا ہے۔

ممبئی (شوبز ڈیسک) بالی وڈ اداکارہ کرینہ کپور خان نے فلم ویرے دی ویڈنگ کے لئے ڈانس ریہرسل شروع کر دی۔ بھارتی ذرائع کے مطابق اداکارہ کرینہ کپور خان کی فلم ویرے دی ویڈنگ کی عکسبندی نئی دہلی میں جاری ہے، فلم میں گانے کے لئے کرینہ کپور کی ڈانس ریہرسل کے دوران لی گئی تصویر سوشل میڈیا پر شیئر کی گئی ہے۔ گانے کی کوریو گرافی فیروز خان جبکہ کرینہ کی سٹائیلنگ ابو جانی اور سندیپ کھوسلا دیں گے۔ فلم میں سونم کپور اور سوارا بھاسکر بھی شامل ہیں، فلم کی پیشکش ریا کپور دیں گی۔

لاہور (شوبز ڈیسک) فلمسٹار نور اور گلوکار و اداکار ولی حامد کے درمیان طلاق کا فیصلہ کل ( بدھ ) متوقع ہے ۔ تفصیلات کے مطابق اداکارہ نور نے ولی حامد کے ساتھ 14فروری 2016ءکو پسند کی شادی کر کے اپنا گھر بسایا تھا مگر شادی کے چند ماہ بعد ہی دونوں کے درمیان اختلافات شروع ہو گئے جو بڑھتے بڑھتے اس نوعیت پر پہنچ گئے کہ اداکارہ نور نے اپنے شوہر ولی حامد سے طلاق کے لئے عدالت سے رجوع کر لیا ۔ گزشتہ سماعت 13ستمبر کو مقام عدالت میں ہوئی جس میں فاضل عدالت نے دونوں کو سوچنے کے لئے سات دن کا وقت دیا تھا ۔ ذرائع کے مطابق اداکارہ نور نے ولی حامد سے طلاق لینے کے لئے حتمی فیصلہ کر رکھا ہے اور توقع کی جا رہی ہے کہ کل ( بدھ ) کو ہونے والی سماعت میں نور اور ولی حامد کے درمیان طلاق کا فیصلہ ہو جائے گا ۔ یاد رہے کہ اداکارہ نور اس سے قبل تین ناکام شادیاں کر چکی ہیں اور اب کی ولی حامد کے ساتھ چوتھی شادی بھی طلاق کی صورت میں ختم ہو جائے گی ۔

ممبئی(شوبز ڈیسک)زندگی میں ہنسی مذاق اورموج مستی کرنے والی ناموربالی ووڈ اداکارہ کاجول کو سوشل میڈیا پسند نہیں۔کاجول کا شمار بالی ووڈ کی ہنس مکھ اورزندہ دل اداکاراں میں ہوتا ہے کاجول فلم کے سیٹ پرہوں یا میڈیا سے گفتگو کررہی ہوں ہمیشہ ہنستی مسکراتی رہتی ہیں تاہم زندگی سے بھرپورکاجول کو سوشل میڈیا پسند نہیں، کاجول کا کہنا ہے کہ انہیں سوشل میڈیا پر لوگوں سے باتیں کرنے سے سخت کوفت ہوتی ہے۔بھارتی میڈیا کے مطابق کاجول نے ایک انٹرویو کے دوران سوشل میڈیا کے حوالے سے بات کرتے ہوئے کہا کہ انہیں یہ دیکھ کر حیرت ہوتی ہے کہ کیسے سوشل میڈیا لوگوں کی زندگیوں میں اس حد تک حاوی ہوگیاکہ انہیں کسی بھی چیز کا ہوش نہیں رہتا،۔ تاہم خود انہیں سوشل میڈیا ایک حد تک پسند ہے۔ کاجول نے کہا کہ وہ بھی سوشل میڈیا استعمال کرتی ہیں یہ مداحوں سے رابطے میں رہنے کا اچھا ذریعہ ہے لیکن وہ اسے روزانہ استعمال نہیں کرتیں کیونکہ انہیں سوشل میڈیا کا روزانہ استعمال ایک بوجھ لگتا ہے اور روزانہ ٹوئٹر، فیس بک وغیرہ پر لوگوں سے بات کرنے میں انہیں بہت کوفت محسوس ہوتی ہے۔کاجول نے مزید کہا کہ پہلے لوگوں کو اداکاروں کے بارے میں ہر بات جاننے کا تجسس ہوتا تھا لیکن انہیں صرف وہ ہی بات پتہ چلتی تھی جو ہم چاہتے تھے لیکن اب وقت بدل گیا ہے اداکار لوگوں کے ساتھ سوشل میڈیا کے ذریعے رابطے میں رہتے ہیں اب اداکاروں کی زندگی کھلی کتاب کی مانند ہوگئی ہے جس کے بارے میں ہر کوئی جانتا ہے۔