نواز شریف کیخلاف تینوں ریفرنسزمیں الزامات مختلف 2گواہ مشترک

اسلام آباد (صباح نیوز) احتساب عدالت نے نوازشریف کی 3 نیب ریفرنسز کو یکجا کرنے کی درخواست مسترد کرنے کا 9 صفحات پر مشتمل تفصیلی فیصلہ جاری کردیا ہے۔ جمعہ کو اسلام آباد کی احتساب عدالت کے جج محمد بشیر نے نوازشریف کی 3 نیب ریفرنسز کو یکجا کرنے کی درخواست پر تحریری تفصیلی فیصلہ جاری کردیا ۔ 9 صفحات پر مشتمل فیصلے میں کہا گیا ہے کہ نوازشریف کے خلاف نیب کی جانب سے دائر کئے گئے تینوں ریفرنسز میں عائد کئے گئے الزامات مختلف ہیں، ریفرنسز میں صرف 2 گواہان مشترک ہیں، درخواست گزار نے اپنی آسانی کو مدنظر رکھتے ہوئے ریفرنسز کو یکجا کرنے کی استدعا کی۔ تفصیلی فیصلے میں کہا گیا ہے کہ درخواست گزار نے اپنی آسانی کو مدنظر رکھتے ہوئے ریفرنسز یکجا کرنے کی استدعا کی، عدالت نے دونوں فریقین کے وکلا کے دلائل بھی سنے جس کے بعد درخواست خارج کی، حکم نامے کے ذریعے ریفرنسز کر یکجا کرنے کی درخواست خارج کی جاتی ہے۔فیصلے میں مزید کہا گیا ہے کہ تینوں ریفرنسز میں عائد کیے گئے الزامات مختلف ہیں اور تینوں ریفرنسز میں صرف دو گواہان مشترک ہیں۔ واضح رہے کہ نوازشریف نے نیب ریفرنسز کے خلاف سپریم کورٹ میں درخواست دائر کی تھی جس میں مو¿قف پیش اختیار کیا گیا تھا کہ نیب نے مختلف اثاثوں پر احتساب عدالت میں 3 ریفرنسز دائر کئے جب کہ نیب سیکشن 9 کی ذیلی شق 5 کے تحت اثاثے جتنے بھی ہوں ریفرنس ایک ہی دائر ہوتا ہے اور نیب قانون کے تحت اثاثے جتنے ہوں جرم بھی ایک ہی تصور ہوتا ہے لہٰذا عدالت عظمی نیب کی جانب سے دائر کئے گئے 3 ریفرنسز کو ایک ریفرنس میں تبدیل کرنے کا حکم دے۔