لاہور (نیا اخبار رپورٹ) وزیراعلیٰ پنجاب محمد شہبازشریف کی زےر صدارت اعلی سطح کا اجلاس ہوا، جس میں صوبے میں عےد مےلاد النبی کے حوالے سے تقریبات کے انتظامات اور امن عامہ کےلئے سکیورٹی پلان کا تفصیلی جائزہ لیا گیا- اجلاس مےں پنجاب بھر میں عےد مےلاد النبی کی تقریبات کو سرکاری طور پر بھرپور اور شاندار طریقے سے منانے کا فیصلہ کیا گیا- وزیراعلیٰ محمد شہباز شریف نے اجلاس سے خطاب کرتے ہوئے کہا ہے کہ پنجاب حکومت مذہبی خوش و خروش اور عقیدت و احترام سے عےد مےلاد النبی کی تقریبات منائے گی اور پنجاب کے ہر ضلع میں خصوصی تقریبات کا انعقاد کیا جائے گا- وزیراعلیٰ نے متعلقہ حکام کو ہدایت کی کہ عےد مےلاد النبی کے موقع پر پورے صوبے میں شاندار پروگرام ترتیب دیئے جائیں۔ انہوں نے کہا کہ مساجد، مزاروں اور عمارتوں میں چراغاں کیا جائے گا اور اس ضمن میں چراغاں کے بہترین انتظامات یقینی بنائے جائیں- وزےراعلیٰ نے ہداےت کی کہ گلیوں اور بازاروں میں صفائی کے خصوصی انتظامات کئے جائیں- انہوں نے کہا کہ پنجاب بھر میں نعت رسول مقبول، قر۱ت اور سیرت النبی پر مقالوں کے مقابلے کرائے جائیں گے اور مقابلے میں اچھی کارکردگی کا مظاہرہ کرنے والوں کو انعامات دئےے جائیں گے- محافل میلاد اور جلوسوں کے شرکاءکو بہترین سہولتیں فراہم کرنے کی ہداےت کرتے ہوئے وزےراعلیٰ نے کہا کہ عےد مےلاد النبی کے موقع پر سکیورٹی کے فول پروف انتظامات کو ہر صورت یقینی بنایا جائے- وضع کردہ پلان کے مطابق عےد مےلاد النبی کے جلوسوں کی سکیورٹی یقینی بنائی جائے- قانون نافذ کرنےوالے ادارے پوری طرح چوکس رہیں کےونکہ عوام کے جان و مال کے تحفظ اور قیام امن سے بڑھ کر کوئی ترجیح نہیں ہوسکتی- انہوں نے کہا کہ نبی پاک کے ولادت باسعادت کے بابرکت دن کو مذہبی جوش و خروش سے منایا جائے گا- نبی پاک کی تعلیمات اور اسوہ حسنہ ہمارے لئے مشعل راہ ہیں- حضور پاک نے اپنے کردار اور سیرت سے ایک انقلاب برپا کیا- امن، بھائی چارے، قومی یکجہتی، یگانگت اور اتحاد کا پیغام عام کرنا ہے۔ دریں اثناءوزیراعلیٰ پنجاب نے کہا کہ پاکستان ہماری آن اور شان ہے اور اسے ہم نے مل کر توانا اور خوشحال بنانا ہے۔ پاکستان ہماری شناخت ہے اور ہم نے اپنی اس شناخت کو مضبوط سے مضبوط تر بنانا ہے اور یہ منزل باہمی اتحاد سے ہی حاصل کی جاسکتی ہے۔ نفاق اور اختلافات سے قومیں اور معاشرے آگے نہیں بڑھتے۔ وزیراعلیٰ پنجاب محمد شہبازشریف نے کہا کہ ملک کسی محاذ آرائی کا متحمل نہیں ہوسکتا کیونکہ محاذ آرائی ملک کیلئے نقصان دہ بھی ہے اور ترقی کی راہ میں رکاوٹ بھی۔ نفاق اور انتشار سے قومی وحدت کو نقصان پہنچتا ہے اور ملک ترقی کی دوڑ میں پیچھے رہ جاتا ہے، اس لئے وقت کا تقاضا ہے کہ پوری قوم اتحاد کی قوت سے آگے بڑھے اور پاکستان کو صحیح معنوں میں قائدؒ اور اقبالؒ کا پاکستان بنانے کے لئے مل کر کام کیا جائے۔ انہوں نے کہا کہ ملک کی ترقی اور خوشحالی سے بڑھ کر اور کوئی ترجیح نہیں ہوسکتی۔ پاکستان مسلم لیگ (ن) کی حکومت نے ملک کو ترقی کی منزل سے ہمکنار کرنے کے لئے انتھک محنت اور جدوجہد کی ہے۔ ہم تمام تر توانائیاں ملک کی ترقی اور عوام کی خوشحالی کے لئے صرف کر رہے ہیں۔ انہوں نے کہا کہ صوبے کی تیز رفتار ترقی اور عوام کی فلاح و بہبود کے لئے بے مثال اقدامات کئے ہیں۔ عوام کو صحت، تعلیم اور دیگر سہولتوں کی بہتری کے لئے ہرممکن اقدامات کئے گئے ہیں اور ان شعبوں میں مکمل کئے گئے بڑے منصوبوں کو عوام کو سہولتیں اور ریلیف ملا ہے۔ وزیراعلیٰ پنجاب نے گجرات اور میانوالی میں ٹریفک حادثات میں قیمتی انسانی جانوں کے ضیاع پر افسوس کا اظہار کیا ہے۔ وزیراعلیٰ نے جاں بحق افراد کے لواحقین سے تعزیت کا اظہار کیا ہے۔ وزیراعلیٰ پنجاب نے سبی کے علاقے سانگان میں بارودی سرنگ کے دھماکے کی شدید مذمت کی ہے۔

اسلام آباد (مانیٹرنگ ڈیسک) دھرنے کے ختم ہونے کے اعلان کے ساتھ ہی 82 شہروں میں دھرنے ختم کر دیئے گئے لاہور دھرنے سے تعلق نہیں۔ ثالثوں نے ذمہ داری قبول کی ہے۔ فریق مکر جائیں گے تو ہم ضامن سے پوچھیں گے۔ سربراہ تحریک لبیک خادم حسین رضوی نے نجی ٹی وی کے پروگرام میں گفتگو کرتے ہوئے کہا ہے کہ ہماری تحریک نے اسلام آباد میں دھرنا ختم کیا تو اعلان کر دیا جس کے ساتھ ہی 82 شہروں میں جاری دھرنے ختم کر دیئے گئے۔ لیکن لاہور میں جاری دھرنے سے ہمارا کوئی تعلق نہیں۔ تحریک لبیک یا رسول اللہ ایک ہے میں اس کا سربراہ ہوں۔ تمام شوریٰ میرے ساتھ ہے۔ جلالی صاحب خود علیحدہ ہو گئے۔ ان کا ہم سے، ہمارا ان سے کوئی تعلق نہیں۔ دھرنا ہوا، ختم ہو گیا۔ معاملات طے ہو گئے۔ موصوف کو اعلان کے ساتھ اٹھ جانا چاہئے تھا کچھ لوگوں کو کریڈٹ لینے کی بیماری ہوتی ہے۔ یہ بیٹھے رہیں۔ ان کے پاس مواد تھا تو رانا ثناءسے بھی استعفیٰ لے کر اٹھتے۔ یہ اپنے مقاصد پر دھرنے میں بیٹھے ہیں۔ ایک شخص بار بار کہتا ہے کہ میں ختم نبوت پر ایمان رکھتا ہوں میرے ماں باپ میاں میر صاحب کے احاطے میں دفن ہیں۔ وہ بار بار کہتا ہے ہمیں ماننا پڑتا ہے۔ ہم نے ان سے کہا کہ اصل مجرم سامنے لے آئیں۔ ایک بندے کا 100 افراد لے کر دھرنا نہیں ہوتا۔ پورے ملک میں دھرنا کروا کر دکھائیں ثالثوں نے کہا کہ ہم ذمہ داری سے بات کر رہے ہیں۔ یہ پوری ہو گی۔ یقین کرنا پڑتا ہے لوگ تو کلمہ پڑھ کر کافر ہو جاتے ہیں۔ اگر وہ مکر گئے تو ہم ضامن سے پوچھیں گے۔ حکومت سے براہ راست رابطہ نہیں ہوا۔ ہماری کمیٹی کا بھی ثالثوں سے رابطہ ہوا۔ سربراہ تحریک لبیک یارسول اللہ پیر آصف اشرف جلالی نے کہا ہے کہ ہم نے 9 دن محاصرے میں گزارے جبکہ رضوی صاحب نے ایک دن بھی محاصرے میں نہیں گزارا۔ ہمارا پانی، دوائی دارو، روٹی پانی سب بند کردیا گیا۔ ان کے منہ سے ختم نبوت کے دھرنے والوں کےلئے دعا تک نہ نکلی۔ ان کا آپریشن ہوا تو ہم نے کال دی۔ ہمارے لوگ شہید ہوئے۔ یہ اسلام آباد سے اٹھنے سے قبل اپنے شہداءکی لاشیں وصول کرتے اور ایف آئی آر کٹواتے۔ ہم نے 20 دن کا وقت دیا تھا۔ انہوں نے وہاں جا کر 30دن دے دئیے۔ 22 مارچ 2017 کو تحریک صراط مستقیم ممتاز قادری(مرحوم) کے نام پر اٹھ کھڑی ہوئی خادم رضوی صاحب، اویس نعیم صاحب اور جامع نعیمیہ میں 70 علماءمشائخ نے مجھے ممتاز قادری تحریک کا سربراہ بنا کر آگے کر دیا۔ وہی تحریک آگے جا کر تحریک لبیک یارسول اللہ بن گئی۔ ان کے ساتھ من گھڑت شوریٰ ہے۔ رانا ثناءاللہ نے کافرانہ الفاظ بولے۔ انہوں نے قادیانیوں کے حق میں بیان دیا۔ اس نے حد کر دی اسلام آباد کے دھرنے والوں نے رانا ثناء اللہ سے پہلے دن سے استعفیٰ کیوں طلب نہیں کیا۔ ہم نے معاہدے میں لکھا ہے کہ رانا ثناءآئے گا تو ہم اسے الفاظ بتائیں گے اور اس پر حکم لگائیں گے۔ رضوی صاحب ہمیں لالی پاپ کہتے تھے۔ خود 30 دن دے کر آ گئے ہم نے تو 20دن دئیے تھے۔ شہدا کی لاشیں کہاں ہیں۔ کس نے غائب کر دیں۔ قوم ان سے ہر شہید بچے کا حساب لے گی۔ اگر زاہد حامد مجرم نہیں تھا تو انہوں نے اس سے استعفیٰ کیوں لیا۔ یہ معاہدہ کر آئے ہیں کہ ہم فتویٰ نہیں دینگے۔ تحقیق میں زاہد حامد قصور وار نکل آیا تو فتویٰ کس طرح دیں گے۔ انہوں نے کہا پوری حکومت گرا کر اٹھیں گے۔ پھر صرف ایک استعفیٰ لے کر آ گئے۔ دھرنا جاری ہے۔ 12ربیع الاول یہیں کریں گے۔ جلسوں سے بھی کہا ہے کہ یہاں ہم ختم نبوت کے سلسلے میں پارلیمنٹ اندر بھی آواز اٹھائیں گے۔نجی ٹی وی کے پروگرام کے دوران خادم حسین رضوی اور آصف اشرف جلالی کے درمیان سخت الفاظ کا تبادلہ خیال ہوا، دونوں جانب سے سخت الفاظ استعمال کئے گئے، جبکہ دونوں نے تحریک کا سربراہ ہونے کا دعویٰ کیا۔ گفتگو کے دوران ہی خادم حسین رضوی کا کیمرہ بند ہوگیا، جس کے دوران مذکورہ پروگرام کے اینکر نے بار بار اپنی ٹیم کے بارے تحفظات کا اظہار کیا اور خادم حسین رضوی کو مخاطب کرکے کہا کہ ہماری ٹیم کو وہاں سے بحفاظت جانے کا بندوبست کردیں۔

لاہور (مانیٹرنگ ڈیسک) وزیراعلی پنجاب شہبازشریف نے تحریک لبیک کے دو اراکین کو نصاب کمیٹی میں شامل کرنے کی تمام افواہوں کی تردید کردی ہے۔ تفصیلات کے مطابق وزیراعلی پنجاب شہبازشریف کی جانب سے ٹویٹر پر جاری پیغام میں کہا گیا ہے کہ سوشل میڈیا پر جو افواہیں چل رہی ہیں کہ تحریک لبیک کے دواراکین کو نصاب کمیٹی میں شامل کیا جائے گا ،یہ تمام افواہیں بے بنیاد ہیں ،تعلیم صوبائی معاملہ ہے اور حکومت کی جانب سے ایساکوئی اقدام نہیں اٹھایا گیاہے ۔شہبازشریف کی جانب سے یہ بیان ایسے وقت سامنے آیا ہے جب سوشل میڈیا پر یہ افواہیں گردش کر رہی ہیں کہ دھرنا ختم کرنے کیلئے جو معاہدہ طے پایا ہے اس میں یہ بھی شامل ہے کہ نصاب کمیٹی میں تحریک لبیک کے دو اراکین کو شامل کیا جائے گا۔

اسلام آباد (آئی این پی) سیکرٹری قومی اسمبلی اور چیئرمین این ایچ اے کو تبدیل کر دیا گیا ، طاہر حسین کو سیکرٹری قومی اسمبلی اور جواد رفیق ملک کو نیا چیئرمین این ایچ اے مقرر کر دیا گیا ہے ، جن کا باضابطہ نوٹیفکیشن جاری کردیا گیا ہے ۔ تفصیلات کے مطابق بدھ کو سیکرٹری کلائمنٹ چینج کے ایڈیشنل سیکرٹری طاہر حسین کو تبدیل کرکے سیکرٹری قومی اسمبلی تعینات کر دیا گیا ہے جب کہ سیکرٹری قومی اسمبلی جواد رفیق ملک کو تبدیل کرکے چیئرمین این ایچ اے تعینات کر دیا گیا ہے ۔ واضح رہے کہ چیئرمین این ایچ اے شاہد اشرف تارڑ فارن پوسٹنگ پر واشنگٹن جا رہے ہیں جہاں پر سپریم کورٹ کے سینئر جج جسٹس آصف سعید کھوسہ کے بھائی ناصر کھوسہ اس وقت تعینات ہیںجنھیں سابق وزیراعظم نوازشریف نے واشنگٹن میں ایک عالمی ادارے کے ایگزیکٹو ڈائریکٹر کے عہدے پر تعینات کرایا تھا۔ناصر کھوسہ نوازشریف کے پرنسپل سیکرٹری کے طور پر بھی فرائض سرانجام دے چکے ہیں ۔