لاہور(ویب ڈیسک)چیف جسٹس پاکستان جسٹس ثاقب نثار نے زینب قتل کیس میں پولیس تفتیش پر عدم اعتماد کا اظہار کردیا۔سپریم کورٹ لاہور رجسٹری میں چیف جسٹس آف پاکستان میاں ثاقب نثار کی سربراہی میں خصوصی بنچ نے قصور میں7 سالہ معصوم زینب سے زیادتی اور قتل کے از خود نوٹس کیس کی سماعت کی۔سماعت کے دوران متاثرہ بچوں اور بچیوں کے والدین بھی عدالت میں پیش ہوئے۔سماعت کے دوران مشترکہ تحقیقاتی ٹیم کے سربراہ محمد ادریس اور پنجاب فرانزک ڈپارٹمنٹ کے ڈائریکٹر جنرل نے چیف جسٹس کوملٹی میڈیا پر بریفنگ دی۔جے آئی ٹی کے سربراہ محمد ادریس نے عدالت میں رپورٹ پیش کرتے ہوئے بتایا کہ جون 2015 کے بعد سے یہ آٹھواں واقعہ ہے اور 800 کے قریب مشتبہ افراد کے ڈی این اے کے نمونے لیے گئے ہیں۔تاہم چیف جسٹس نے پولیس تفتیش پر عدم اطمینان کا اظہار کرتے ہوئے کہا کہ آپ صرف ایک ہی رخ پر تفتیش کر رہے ہیں، پولیس ڈی این اے سے باہر نکل کر روایتی طریقے اپنائے۔چیف جسٹس کا مزید کہنا تھاجو پولیس کر رہی ہے، اس طرح تو 21 کروڑ لوگوں کا ڈی این اے کرنا پڑے گا۔سماعت کے دوران چیف جسٹس نے ریمارکس دیے کہ 2 تھانوں کی حدود میں مسلسل واقعات ہوئے، کسی نے انکوائری کیوں نہیں کی؟ اتنے واقعات پر پولیس کیا کر رہی تھی؟جسٹس ثاقب نثار نے مزید کہا کہ اگر پولیس 2015 میں اتنی سنجیدہ ہوتی تو آج 8 بچیاں زیادتی کے بعد قتل نہ ہوتیں۔سماعت کے دوران پنجاب فرانزک کے ڈائریکٹر جنرل ڈاکٹر طاہر اشرف بھی عدالت میں پیش ہوئے اور کہا کہ جو ویڈیو ہم نے دیکھی، یقین نہیں ہے کہ یہ اسی بچی کی ہے۔

لاہور : (ویب ڈیسک)بھارت اور امریکا کے مسلسل دباو¿ کے بعد پاکستان میں جماعت الدعوہ کے سربراہ حافظ محمد سعید پر عائد پابندیوں کا جائزہ لینے کے لیے اقوام متحدہ کی سلامتی کونسل کی ٹیم دو روزہ دورے پر اسلام آباد پہنچ رہی ہے۔ذرائع کیمطابق سلامتی کونسل کی پابندی کمیٹی 1267 کی مانیٹرنگ ٹیم برائے حافظ سعید 25 اور 26 جنوری کو اسلام آباد پہنچے گی۔دوسری جانب متعلقہ حکام نے اس تاثر کو رد کیا ہے کہ ٹیم جماعت الدعوہ پر عائد پابندیوں کا جائز لینے آرہی ہے، ان کا کہنا تھا کہ مذکورہ دورہ روز مرہ کے امور پر مشتمل ہے۔واضح رہے کہ امریکی اسٹیٹ ڈپارٹمنٹ کی ترجمان ہیتھرو نوریٹ نے جمعہ (19 جنوری) کو پریس بریفنگ میں کہا تھا کہ امریکا نے حافظ سعید سے متعلق اپنے تحفظات کا اظہار کرتے ہوئے پاکستان سے ان کے خلاف بھرپور قانونی کارروائی کا مطالبہ کیا ہے۔اس موقع پر انہوں نے بتایا تھا کہ حافظ سعید کا نام اقوام متحدہ کی تیار کردہ دہشت گردوں کی فہرست میں شامل ہے۔حافظ سعید کے حوالے سے امریکا کا ردعمل اس وقت سامنے آیا تھا جب پاکستان میں وزیراعظم شاہد خاقان عباسی نے ٹی وی انٹرویو میں کہا تھا کہ پاکستان میں حافظ سعید کے خلاف کوئی کیس موجود نہیں ہے تاہم اگر کیس ہوتا تو بھرپور کارروائی کی جاتی۔پابندی کمیٹی کے دورے کے اعراض و مقاصد تاحال سامنے نہیں آئے تاہم سینکشن کمیٹی 1267 کے جنرل مینڈیٹ میں شامل ہے کہ وہ مطلوبہ افراد یا اداروں کے منجمد مالی اثاثوں اور پر نظر رکھنے کے علاوہ ان کو دستیاب وسائل کی جانچ پڑتال کرتی ہے۔ٹیم جائزہ لینے کے بعد اپنی رپورٹ کے ذریعے مختلف امور کے بارے میں کمیٹی کو آگاہ کرے گی اور اس دوران رکن ریاستوں کو مشورے بھی فراہم کرے گی تاکہ وہ خطے میں اس پر عملدرآمد کو یقینی بنا سکیں۔پاکستانی حکام نے مذکورہ دورے کو مثبت قرار دیتے ہوئے کہا کہ ٹیم کو حکومت کی جانب سے اٹھائے گئے اقدامات کے بارے میں مکمل آگاہی دی جائے گی۔واضح رہے کہ فروری 2017 میں اقوام متحدہ میں ایک مفصل رپورٹ جمع کرائی گئی تھی، جس میں پاکستان نے غیر قانونی نقل و حرکت، اسلحہ اور خام تیل کی ترسیل پر پابندیوں کے علاوہ سلامتی کونسل کے تحت نامزد دہشت گرد یا کالعدم اداروں کے فنڈز، مالی اثاثے اور تجارتی وسائل پر عائد پابندیوں کا جائزہ تھا۔

لاہور : (ویب ڈیسک)پیپلز پارٹی کے چئیرمین بلاول بھٹوزرداری کا کہنا ہے کہ ججز انصاف کے سوا دیگر سارے کام کررہے ہیں اور ان کی زیادہ توجہ سیاسی معاملات پر ہے۔سماجی رابطے کی ویب سائٹ ٹویٹرپر اظہارِخیال کرتے ہوئے چئیرمین پیپلزپارٹی بلال بھٹو زرداری کا کہنا تھا کہ چیف جسٹس کی سربراہی میں لاریفارمزکمیشن قائم ہے اور چاروں صوبوں کے چیف جسٹس اس کمیشن کے رکن ہیں، قانون کے مطابق کمیشن نے سال میں 4 بار اجلاس کرنے ہوتے ہیں لیکن 2015 سے اب تک لاریفارمز کمیشن کا کوئی اجلاس ہی نہیں ہوا۔بلاول بھٹوزرداری کا کہنا تھا کہ ججز انصاف کے سوا دیگر سارے کام کررہے ہیں بلکہ ان کی زیادہ توجہ سیاسی معاملات پر ہے، ججز سیاست دانوں والا کردار ادا کررہے ہیں اور ان کی اپنے کام کے سوا دیگر کاموں پر توجہ کے باعث انصاف متاثر ہورہا ہے۔

اسلام آباد (صباح نیوز) لندن فلیٹس ریفرنس کے سلسلے میں نیب لاہور نے نواز شریف کے خلاف ضمنی ریفرنس تیار کرلیا، چیئرمین نیب کی منظوری کے بعد دائر کیا جائے گا۔ذرائع کے مطابق برطانیہ سے ملنے والی اہم معلومات، نواز شریف اور بچوں کے خلاف نئے گواہان کو ضمنی ریفرنس کا حصہ بنایا گیا ہے۔ ضمنی ریفرنس چیئرمین نیب کی منظوری کے بعد احتساب عدالت میں دائر کیا جائے گا۔ اس سے پہلے نیب احتساب عدالت کی جانب سے مریم نواز اور کیپٹن(ر) صفدر کے ریفرنسز میں جعلی دستاویزات کی دفعات نکالنے کے حوالے سے اسلام آباد ہائی کورٹ میں دائر درخواست بھی واپس لے چکا ہے۔ نیب نے موقف اختیار کیا تھا کہ مریم نواز اور کیپٹن صفدر کے خلاف ضمنی ریفرنس دائر کیا جائے گا۔

اسلام آباد (خصوصی رپورٹ) خیبر پختونخوا میں اقوام متحدہ کے زیرانتظام سکولوں میں طلبہ کو پاکستان مخالف نصاب پڑھانے کا انکشاف ہوا ہے۔ اخبار کے مطابق اقوام متحدہ کے ادارہ برائے مہاجرین (یو این ایچ سی آر) کی جانب سے خیبر پختونخوا میں نصاب تعلیم میں تبدیلی کی گئی ہے، یو این ایچ سی آر کی جانب سے افغان مہاجرین کے کیمپوں میں کمیونٹی پرائمری سکول قائم کیے گئے ہیں جن کا سلیبس صوبائی اور وفاقی حکومت کی اجازت کے بغیر تبدیل کردیا گیا جس پر وفاقی حکومت نے شدید تشویش کا اظہار کیا گیا ہے جبکہ وزارت داخلہ نے خیبر پختونخوا حکومت کے ذریعے یو این ایچ سی آر سے وضاحت طلب کرلی۔ ذرائع کے مطابق سلیبس میں پاکستان کی پالیسی اور نظریے کیخلاف تبدیلیاں کی گئی ہیں۔ معاشرتی علوم کی کتاب میں گلگت، بلتستان اور متنازعہ کشمیر کو بھارت کا حصہ دکھایا گیا ہے، پاک افغان بارڈر کو ڈیورنڈ لائن بتایا گیا ہے اور بھارت کو قریبی دوست ملک لکھا گیا ہے۔ ذرائع کے مطابق انگلش کی کتاب پر افغانستان کا جھنڈا ہر صفحہ پر موجود ہے۔ وزارت داخلہ نے خیبرپختونخوا حکومت کے ذریعے یو این ایچ سی آر سے وضاحت طلب کرلی ہے۔

اسلام آباد ( آن لائن)سابق وزیراعظم اور مسلم لیگ ن کے صدر میاں محمد نواز شریف نے ن لیگ کے دو سینئر رہنماو¿ں چوہدری نثار علی خان اور پرویز رشید کے درمیان لفظی جنگ میں اپنا وزن سینیٹر پرویز رشید کے پلڑے میں ڈال دیا ہے اور وزیر اعلی پنجاب شہباز شریف کے مفاہمتی پیغام کے باوجود نوازشریف نے ہفتہ کو سابق وزیر داخلہ چوہدری نثار علی خان سے ملاقات نہیں کی جبکہ شہباز شریف نے چوہدری نثار علی کو راضی کرلیا تھا کہ وہ نواز شریف سے ملاقات کرکے اپنے پرویز رشید بارے تحفظات سے انھیں آگاہ کریں۔ذرائع نے مزید بتایا کہ پرویز رشید کے حالیہ بیانات پر نواز شریف خوش ہیں اسی لیے ان کی راولپنڈی میں چوہدری نثار سے ملاقات منسوخ ہو گئی زرا ئع نے بتایا کہ اس ملاقات کا اہتمام بھی شہباز شریف نے کیا تھامگر نواز شریف پرویز رشید کو لے کر ہری پور پہنچ گئے اور انہوں نے پرویز رشید کو نثار کے معاملے پر ہتھ ہولا رکھنے کے لیے تو کہا ہے مگر منع نہیں کیا ۔ذرائع نے مزید بتایا کہ اب نواز نثار ملاقات کسی اور وقت میں ہو گی مگر کوئی نیا شیڈول جاری نہیں کیا گیا۔