شارجہ(اے پی پی) ایشین بریڈ مین اور سابق کرکٹر ظہیر عباس نے کہا ہے کہ نیوزی لینڈ کے خلاف ون ڈے سیریز میں قومی ٹیم کی شکست پر بے حد مایوسی ہوئی، امید ہے کہ کھلاڑی مستقبل میں غلطیاں نہیں دوہرائیں گے، ٹی20 سیریز میں قومی ٹیم کو نئی حکمت عملی کے ساتھ میدان میں اترنا ہو گا، اچھی ٹیمیں وہی ہوتی ہیں جو انٹرنیشنل مقابلوں کے لئے زیادہ سے زیادہ کھلاڑی تیار کریں، اسی طرح پاکستان کو بھی بہترین بیک اپ تیار کرنا چاہیے۔ ہفتے کو شارجہ کرکٹ اسٹیڈیم میں اے پی پی کو انٹرویو دیتے ہوئے انہوں نے کہا کہ نیوزی لینڈ کے ہاتھوں ٹیم کی شکست پر مایوسی ہوئی ہے، ہماری ٹیم میں زیادہ تر نئے کھلاڑی تھے جس کی وجہ سے ان سے غلطیاں ہوئیں، نیوزی لینڈ کی وکٹوں پر کھلاڑیوں کو سیکھنا پڑے گا۔

انہوں نے کہا کہ نیوزی لینڈ کی وکٹیں تیز ہیں، سیریز کی تیاری کیلئے پاکستان کرکٹ بورڈ کو وہاں کی کنڈیشنز سے ہم آہنگی حاصل کرنے کیلئے ٹیم کو جلد نیوزی لینڈ بھیجنا چاہیے تھا تاکہ اسے زیادہ سے زیادہ پریکٹس کا موقع مل سکتا، انہوں نے کہا کہ ٹی ٹونٹی سیریز میں ٹیم کو نئی حکمت عملی کے تحت میدان میں اترنا ہو گا، امید ہے کہ ٹیم سیریز جیت کر دوبارہ ٹریک پر آجائے گی۔

میلبورن (اے پی پی) عالمی نمبر ایک سیمونا ہالپ، اینجلیق کربر، کیرولینا پلسکووا، کیرولین گارسیا، کیرولین وزنائیکی اور میڈیسن کیز پیش قدمی کے تسلسل کو برقرار رکھتے ہوئے آسٹریلین اوپن ٹینس ٹورنامنٹ ویمنز سنگلز پری کوارٹر فائنل میں پہنچ گئیں، ماریا شرا پووا شکست کے بعد ٹائٹل کی دوڑ سے باہر ہو گئیں۔ آسٹریلیا میں جاری سال کے پہلے گرینڈ سلام کے سلسلے میں ہفتے کو کھیلے گئے ویمنز سنگلز لاسٹ 32 راﺅنڈ میچز میں سٹار رومانوی کھلاڑی ہالپ نے عمدہ کارکردگی کا مظاہرہ کرتے ہوئے امریکن کھلاڑی ڈیوس کو 4-6، 6-4 اور 15-13 سے ہرا کر پری کوارٹر فائنل میں جگہ بنا لی، جرمنی کی اینجلیق کربر روس کی گولڈن گرل شرا پووا پر حاوی رہیں، انہوں نے روسی کھلاڑی کو سٹریٹ سیٹس میں 6-1 اور 6-3 سے زیر کیا، جمہوریہ چیک کی پلسکووا بھی تیسری آزمائش میں سرخرو رہیں، انہوں نے ہم وطن کھلاڑی لوسی سفارووا کو شکست دی، فرانس کی کیرولین گارسیا نے ساسنووچ کو شکست دے کر ایونٹ سے باہر کر دیا، فتح کے ساتھ ہی گارسیا پری کوارٹر فائنل میں داخل ہو گئیں، دیگر کھیلے گئے میچز میں کیرولین وزنائیکی، میڈیسن کیز، اوساکا اور بربورا سٹرائیکووا اپنی اپنی حریفوں کو ہرا کر پری کوارٹر فائنل میں پہنچ گئیں۔

کراچی (نیوزایجنسیاں)قومی ٹیم کے آل راو¿نڈر شعیب ملک نیوزی لینڈ کے خلاف ٹی ٹوئنٹی سیریز سے باہر ہو گئے۔قومی ٹیم کے ہیڈ کوچ مکی آرتھر، کپتان سرفراز احمد، منیجر طلعت علی اور فزیو وی بی سنگھ پر مشتمل ٹور مینجمنٹ کمیٹی نے میٹنگ کے بعد فیصلہ کیا کہ آل راﺅنڈر شعیب ملک کو مزید آرام کی ضرورت ہے، اس لئے ٹی ٹوئنٹی سیریز میں شرکت کی بجائے انہیں وطن واپس بھیج دینا مناسب ہوگا۔یاد رہے کہ نیوزی لینڈ کیخلاف ون ڈے سیریز کے چوتھے میچ میں رن بناتے ہوئے کولن منرو کے تھرو پر گیند شعیب ملک کے سر سے ٹکرائی تھی، طبی امداد ملنے پر انہوں نے بیٹنگ شروع کردی تھی لیکن تھوڑی دیر بعد ہی آﺅٹ ہوگئے، بعد ازاں سر چکرانے کی شکایت پر انہیں گرین شرٹس کی فیلڈنگ کے دوران میدان میں نہیں اتارا گیا جب کہ آل راﺅنڈر پانچواں ون ڈے بھی نہیں کھیل سکے۔پی سی بی کے مطابق شعیب ملک کا نیوزی لینڈ میں میڈیکل پینل سے مکمل چیک اپ کروایا گیا تھا، جس میں یہ چیز سامنے آئی کہ بھاگ دوڑ کے دوران ان کا سر چکرانے کی شکایت سامنے آسکتی ہے لہٰذا ان کو وطن واپس بھجوانے کا فیصلہ کیا گیا جب کہ مینجمنٹ نے متبادل کے طور پر کسی کھلاڑی کو طلب نہیں کیا۔

ویلنگٹن(آئی این پی) نیوزی لینڈ اور پاکستان کی کرکٹ ٹیموں کے درمیان تین ٹی ٹونٹی انٹرنیشنل میچوں پر مشتمل سیریز کا پہلا میچ (کل)پیر کو ویلنگٹن میں کھیلا جائے گا، گرین شرٹس سیریز میں شکستوں کے داغ دھونے کیلئے پر عزم ہے، اس سے قبل کھیلی گئی ون ڈے سیریز میں میزبان نیوزی لینڈ نے پاکستان کو 5-0 سے وائٹ واش کیا تھا۔ون ڈے سیریز میں شاندار فتح کے بعد میزبان ٹیم کے کھلاڑیوں کے حوصلے بلند ہیں اور وہ ٹی ٹونٹی سیریز میں بھی عمدہ کارکردگی کے تسلسل کو برقرار رکھتے ہوئے سیریز اپنے نام کرنے کیلئے پر جوش ہیں تو دوسری جانب شکست خوردہ پاکستانی ٹیم جو کہ ٹی ٹونٹی کی خطرناک ٹیم شمار کی جاتی ہے، سیریز جیت کر ایک روزہ سیریز میں شکست کا بدلہ چکانے کی خواہاں ہے اسلئے دونوں ٹیموں کے درمیان کانٹے دار مقابلے کی توقع کی جا رہی ہے، دونوں ٹیموں کے درمیان دوسرا ٹی ٹونٹی 25 جنوری جبکہ تیسرا اور آخری ٹی ٹونٹی 28 جنوری کو کھیلا جائے گا۔