اسلام آباد(خصوصی رپورٹ) وزارت نیشنل فوڈ سکیورٹی اینڈ ریسرچ نے اپنے ذیلی اداروں میں دہری شہریت چھپانے والے افسران کے خلاف انضباطی کارروائی کا فیصلہ کیاہے ۔ذرائع نے بتایا کہ وزارت نیشنل فوڈ سکیورٹی اینڈ ریسرچ نے سپریم کورٹ کے احکامات کی روشنی میں اپنے تمام ماتحت اداروں کو ایک مراسلہ جاری کیاہے جس میں کہا گیا ہے کہ وہ افسران جنہوں نے دہری شہریت لے رکھی ہے اور ادارے کو نہیں بتایا انہیں ہدایت کی جاتی ہے کہ وہ ایک ہفتے کے اندر اپنے ادارے کی انتظامیہ کو دہری شہریت سے آگاہ کریں‘ اگر وہ اپنی دہری شہریت چھپائیں گے تو ان کے خلاف گورنمنٹ سرونٹس (ای اینڈ ڈی ) رولز 1973ءکے تحت انضباطی کارروائی کی جائے گی اور انہیں فارغ ہوکر گھر جانا ہوگا۔ ذرائع نے بتایا کہ وزارت نیشنل فوڈ سکیورٹی نے اپنے ایک ذیلی ادارے پاکستان آئل سیڈ ڈویلپمنٹ بورڈ کے ایک سائنٹیفک آفیسر جس نے کینیڈین سکلڈ ورکر پروگرام کے تحت دہری شہریت حاصل کررکھی ہے تاہم اپنی دہری شہریت ادارے سے چھپا رکھی تھی جس پر انہیں وزارت کی طرف سے ایک وضاحتی مراسلہ لکھا گیا ہے ۔ 2014ءمیں کینیڈین شہریت حاصل کی گئی ہے جس کو اپنے محکمے سے چھپا رکھا تھا لہٰذ ا ایک ہفتے کے اندراس کی وضاحت دی جائے۔ وضاحت نہ دینے کی صورت میں قواعد وضوابط کے تحت کارروائی عمل میں لائی جائے گی ۔

قصور(خصوصی رپورٹ)پولیس نے ابتک معصوم بچوں کی ہلاکت کے شبہ میں 2ہزار سے زائد افراو کو پکڑا جبکہ 600مشتبہ افراد کا ڈی این اے کروایا گیا، 4کو مبینہ مقابلے میں ہلاک کرکے ان پر بچیوں کی ہلاکت کا الزام لگایااس کے بارجود بچبیوں کی ہلاکتیں جاری رہی ، قصورمیں مختلف تنظیموں کے زیراہتمام زینب کی یاد میں معصوم بچی کے والد لواحقین اور چوہدری منظور جنرل سیکرٹری پنجاب پیپلز پارٹی نے شمعیں روشن کیں ،جائے وقوعہ پر انجمن تاجران ،سول سوسائٹی،علاقہ مکینوں کی بڑی تعداد نے ریلی نکالی اور شمعیں روشن کیں ،ریلی کے شرکا نے پولیس کیخلاف نعرے بازی کی ، اس موقع پر طلبا کی ایک کثیر تعداد نے ہاتھوں میں پلے کارڈ اٹھائے زینب کو انصاف دو کے نعرے بھی لگائے ،جمعہ کے خطبات میں علما اکرام اور مختلف تنظیموں نے اپنی تقریروں میں مرکزی ملزم کی گرفتاری تک چین سے نہ بیٹھنے کا اعلان کیا ۔

لاہور (خصوصی رپورٹ) آئی جی پنجاب کیپٹن (ر) عارف نواز نے ٹریفک پولیس کی وردی بھی تبدیل کر دی۔ ٹریفک وارڈن بھی اب اولیو گرین یونیفارم پہنیں گے۔ ٹریفک وارڈن‘ پٹرولنگ پولیس‘ ایلیٹ فورس اور سپیشل پروٹیکشن یونٹ اب سے اولیوگرین رنگ کی یونیفارم پہنیں گے۔
یونیفارم تبدیل

اسلام آباد (خصوصی رپورٹ ) ملک بھر میں حج درخواستوں کی وصولی کاعمل جاری ہے،بنکوں کی نامزدشاخیں درخواستوں کی وصولی کیلئے (آج) بھی کھلی رہیں گی۔وزارت مذہبی امور کے ترجمان کے مطابق اب تک ایک لاکھ بہتر ہزارحج درخواستیں وصول ہوچکی ہیں اوربنکوں کی نامزدشاخیں درخواستوں کی وصولی کیلئے (آج) اتوار کو بھی کھلی رہیں گی۔ عازمین حج بدھ تک درخواستیں جمع کراسکتے ہیں۔ عازمین حج کی درخواستوں کی قرعہ اندازی جمعے کوہوگی۔

لاہور (خصوصی رپورٹ) عوامی تحریک کے سربراہ طاہر القادری نے کہا ہے کہ پورے یقین سے کہتا ہوں شہباز حکومت دو ماہ سے بھی پہلے اپنے انجام کو پہنچ جائے گی۔ پیپلز پارٹی اور تحریک انصاف کے ایک دوسرے سے گلے شکوے دور کرانے کی کوشش کرونگا۔ صحافیوں سے غیر رسمی گفتگو میں انہوں نے کہا کہ احتیاطا دو ماہ کی بات کی ہے، سانحہ ماڈل ٹاﺅن کے ذمہ داروں سے بہت پہلے نجات مل جائے گی۔ پیپلز پارٹی اور تحریک انصاف اپنے اپنے موقف پر درست ہیں دونوں جماعتیں شہدا کے قصاص کے لیے ہمارے ساتھ کھڑی ہیں۔ ایم کیو ایم پاکستان رابطے میں ہے اگلے فیز میں ساتھ ہو گی۔ مال روڈ جلسہ ہماری حکمت عملی کے عین مطابق اور کامیاب جلسہ تھا۔ انتخابات کے حوالے سے کبھی اجلاسوں میں ایک بات تک نہیں ہوئی۔ مانیٹرنگ ڈیسک کے مطابق انہوں نے مال روڈ جلسہ میں خالی کرسیوں کو حکمت عملی قرار دیا۔

لاہور (کرائم رپورٹر)چیف ٹریفک آفیسر لاہور رائے اعجاز احمد نے کہاکہٹریفک سگنلز کو گداگری کی لعنت سے پاک کرنے اور چوکوں،چوراہوں میں ٹریفک کی روانی کو بغیر کسی رکاوٹ جاری رکھنے کےلئے عادی گداگروں اور بھکاریوں کےخلاف گرینڈ آپریشن شروع کیا گیا ہے،اس سلسلہ میں ایک ٹریفک رسپانس یونٹ بھی قائم کیا گیا ہے جو شہر بھر کی اہم اور مصروف شاہراﺅں پرایسے افراد کےخلاف کاروائی کر رہا ہے ۔ایک ماہ کے دوران 300سے زائد افراد کو پکڑ کے مقامی پولیس کے حوالہ کیا گیا اور ان کےخلاف مقدمات بھی درج کروائے گئے،جبکہ20سے زائد بچوںکو پکڑ کر چائلڈ پروٹیکشن یونٹ کے حوالے کیا گیا تاکہ وہ ان کے والدین کو بلا کر ان کی اصلاح کریں۔رائے اعجاز احمد نے شہریوں سے اپیل کی کہ وہ گداگری کی لعنت سے پاک معاشرہ کےلئے سٹی ٹریفک پولیس کا ساتھ دیں اورٹریفک سگنلز پر ایسے افراد کو بھیک نہ دیں اور ان کی ہر لحاظ سے حوصلہ شکنی کی جائے ۔ اس سے نہ صرف معاشرے میں بہتری آئےگی بلکہ چوکوں،چوراہوں پر بغیر تعطل ٹریفک کی روانی برقرار رہے گی۔

لاہور (خصوصی رپورٹ) سرکاری سکولوں کی سکیورٹی کی ذمہ داری ضلعی انتظامیہ اور پولیس کے سپرد کر دی گئی۔ بتایا گیا ہے کہ پنجاب بھر کے سرکاری سکولوں میں دہشت گردی کے خدشات کے باوجود سکیورٹی کے ناقص انتظامات کے انکشاف پر چیکنگ کی ذمہ داری سکول ایجوکیشن ڈیپارٹمنٹ کے افسروں سے لے کر کمشنرز اور ریجنل پولیس افسروں کے حوالے کر دی گئی۔ وزیراعلیٰ مانیٹرنگ ٹیم برائے سکول کی رپورٹ میں اس بات کا انکشاف ہوا ہے کہ سکولوں کی مانیٹرنگ اور سکیورٹی ایس او پیز پر عملدرآمد کرانے کیلئے سکول ایجوکیشن ڈیپارٹمنٹ کے افسر ناکام ہو گئے ہیں۔ کئی مرتبہ احکامات کے باوجود ابھی تک سکولوں میں سکیورٹی کے انتظامات کو مکمل نہیں کیا گیا۔ سکیورٹی ایس او پیز پر عملدرآمد کیلئے ڈویژنل کمشنرز اور ریجنل پولیس افسروں کو ذمہ داری دی گئی ہے وہ سکولوں کی مانیٹرنگ کیلئے کمیٹیاں بنائیں۔ مراسلے میں یہ بھی کہا گیا ہے کہ اے اور اے پلس کیٹیگری کے حامل اداروں کے قریبی علاقوں میں کوئیک رسپانس فورس کے دستے بھی تعینات کئے جائیں۔ مراسلے میں اس بات کا خدشہ ظاہر کیا گیا ہے کہ سکولوں میں دہشت گردی کے سنگین خطرات موجود ہیں۔
سکول سکیورٹی

لاہور(ویب ڈیسک) پیر آف سیال شریف پیر حمید الدین سیالوی نے حکومت کو سات روز میں شریعت نافذ کرنے کی مہلت دیتے ہوئے کہا ہے کہ اگر ہمارا مطالبہ تسلیم نہ کیا گیا تو پنجاب کے بازار، گلیاں اور کوچے بند کر دیں گے جبکہ ڈاکٹر اشرف آصف علی جلالی نے 27جنوری سے جیل بھرو تحریک شروع کرنے کا اعلان کرتے کہا ہے کہ شہباز شریف آستانوں کو خریدنے کا کام بند کرو ،آئندہ عام انتخابات ختم نبوت کے وفاداروں اور غداروں کے درمیان ہوں گے ، چند مولویوں سے بیان دلوانے سے کام نہیں چلے گا۔اہل سنت جماعتوں اور تنظیموں کے زیر اہتما م داتا دربار کے باہر ختم نبوت کانفرنس ﷺ کا انعقاد کیا گیا ۔کانفرنس میں کارکنوں کی بڑی تعداد نے شرکت کر کے حکومت کے خلاف اور لبیک یارسول اللہ کے نعرے لگائے ۔ اس موقع پر سکیورٹی کے انتہائی سخت انتظامات کئے گئے تھے اور شرکاء کو مختلف مقامات پر جامع تلاشی کے بعد اجتماع گاہ میں داخل ہونے دیا گیا ۔پیر حمید الدین سیالوی نے خطاب کرتے ہوئے کہا کہ ختم نبوت کانفرنس ﷺمیں شرکت کرنے والوں کے پائوں کوہاتھ لگا کر ان کا شکریہ ادا کرتا ہوں ۔ ہم ناموس رسالت ﷺکی حفاظت کے لئے حاضر ہوئے ہیں ، ہم ناموس رسالت کے لئے ایک بار نہیں سو ،سو بار بھی اپنی جانیں قربان کرنے کے لئے تیار ہیں۔ انہوں نے کہا کہ حکومت کو سات دن کی مہلت دے رہے ہیں کہ شریعت کا قانون نافذ کرو ورنہ پنجاب کے بازار، گلیاں اور کوچے بند کر دیں گے ۔انہوںنے کہا کہ مشائخ عظام یہ اعلان کر چکے ہیں کہ (ن) لیگ کو ووٹ نہیں دینا لیکن میں کہتا ہوںہر اس شخص کو ووٹ نہیں دینا جو نبی کریم ﷺ کا غلام نہ ہو ۔ انہوں نے کہا کہ آج کے اجتماع کو دیکھ کر یقین ہو گیا ہے کہ ابھی نبی کریمﷺ کے غلام زندہ ہیں ۔ شرکاء اسے میری نصیحت اور وصیت سمجھیں کہ اس تحریک کوختم نہیں ہونے دینا ۔ انہوں نے کہا کہ رانا تم اپنے بد معاشوں کو بندوقیں پکڑائو ہمارے سینے حاضر ہیں ،ہم دیکھتے ہیں نبی کریم ﷺ کے غلام زیادہ ہیں یا تمہارے بد معاش زیادہ ہیں۔ڈاکٹر اشرف آصف جلالی نے نے کہا کہ نبی کریم کا غدار اسلا م کا حقدار نہیں ، ختم نبوت کے معاملے پر دو ہر ی پالیسی نہیں چلے گی جو بھی ختم نبوت کو میلی آنکھ سے دیکھے گا اسے نشان عبرت بنا دیا جائے گا،گھبرائو نہیں جلد پردہ چاق کرو نگا ، انشاء اللہ داتا کے دیس سے اہل سنت اپنی سیٹیں جیتے گی، پیر سیالوی کی عظمت کو سلام پیش کرتے ہیں ، رانا ثنا ء اللہ کے استعفے کے معاملے پرپیر سیالوی کا بھر پور ساتھ دینگے۔ انہوں نے کہا کہ آئندہ عام انتخابات ختم نبوت کے وفاداروں اور غداروں کے درمیان ہوں گے ،شہباز شریف سے کہتا ہوں کہ آستانوں کو خریدنے کا کام بند کرو،چند مولویوں سے بیان دلوانے سے کام نہیں چلے گا۔