ہوبارٹ (اے پی پی) انگلش ٹیم کے کپتان اور جارح مزاج بلے باز آئن مورگن نے ٹی ٹونٹی انٹرنیشنل کرکٹ میں کرس گیل کے زیادہ رنز کا ریکارڈ توڑ دیا، اسطرح مورگن زیادہ رنز بنانے والے دنیا کے 13ویں بلے باز بن گئے ہیں۔

، مورگن نے گزشتہ روز سہ ملکی ٹی ٹونٹی سیریز میں آسٹریلیا کے خلاف میچ میں 22 رنز کی اننگز کھیل کر گیل کے زیادہ رنز کا ریکارڈ توڑا، گیل نے 55 میچز میں 2 سنچریوں اور 13 نصف سنچریوں کی مدد سے 1589 رنز بنا رکھے تھے جبکہ مورگن نے 71 میچز میں 8 نصف سنچریوں کی مدد سے 1598 رنز بنا لئے ہیں، برینڈن میک کولم 2140 رنز بنا کر سرفہرست ہیں۔

کیپ ٹاﺅن (اے پی پی) بھارتی ٹیم کے کپتان اور سٹار بلے باز ویرات کوہلی نے جنوبی افریقہ کے خلاف تیسرے ایک روزہ بین الاقوامی کرکٹ میچ میں شاندار سنچری داغ دی، یہ ان کے کیریئر کی 34ویں سنچری ہے، کوہلی بطور کپتان زیادہ سنچریاں بنانے والے بھارت کے پہلے اور دنیا کے تیسرے کپتان بن گئے، انہوں نے سابق ہم وطن کھلاڑی سارو گنگولی کی بحیثیت کپتان ملک کی طرف سے زیادہ سنچریوں اور جنوبی افریقہ کے خلاف بڑی اننگز کھیلنے کا ریکارڈ توڑ دیا، گنگولی نے 11 سنچریاں بنا رکھی تھیں جبکہ کوہلی نے بطور قائد 12ویں سنچری بنا کر سنگ میل عبور کیا، ایک روزہ کرکٹ کی تاریخ میں بطور کپتان زیادہ سنچریاں بنانے کا عالمی اعزاز سابق آسٹریلوی کرکٹر رکی پونٹنگ کو حاصل ہے جنہوں نے 22 جبکہ جنوبی افریقہ کے سابق کپتان اے بی ڈی ویلیئرز نے بحیثیت کپتان 13 ون ڈے سنچریاں بنا رکھی ہیں۔ انہوں نے بحیثیت کپتان پروٹیز کے خلاف بڑی اننگز کھیلنے کا گنگولی کا ریکارڈ بھی توڑ دیا۔

گنگولی نے 2000ءمیں پروٹیز کے خلاف 141 رنز کی اننگز کھیلی تھی جبکہ کوہلی نے 160 رنز کی ناقابل شکست اننگز کھیلی، اس کے ساتھ ساتھ کوہلی نے سابق سری لنکن بلے باز اروندا ڈی سلوا کے زیادہ رنز کا ریکارڈ بھی توڑ دیا، ڈی سلوا نے 9284 رنز بنا رکھے تھے جبکہ کوہلی نے 205 میچز میں 9344 رنز بنا رکھے
.

ممبئی(آن لائن)ویرات کوہلی نے علیم ڈار کے نئے ریستوران ڈار ڈیلائٹو کے لئے نیک خواہشات کا اظہار کر دیا ۔تفصیلات کے مطابق بھارتی کرکٹ ٹیم کے کپتان ویرات کوہلی نے علیم ڈار کے نئے ریستوران ڈار ڈیلائٹو کے لیے مبارکباد کا پیغام دے دیا ۔

سٹار بلے باز نے اپنے ویڈیو پیغام میں کہا کہ امید کرتا ہوں آپ نے جیسے انٹرنیشنل ایمپائرز میں اپنا نام بنایا ویسے ہی ریستوران بھی عمدہ ہوگا۔کوہلی کا مزید کہنا تھا کہ ریستوران کی آمدن سے معذور افراد کو عطیہ دینا بڑے دل کی بات ہے۔

لاہور ( این این آئی) پاکستان کرکٹ بورڈ کے چیئرمین نجم سیٹھی نے کہا ہے کہ ملک میں بین الاقوامی کرکٹ کی مکمل بحالی میں 2سال کا عرصہ لگے گا،پی ایس ایل نے قومی ٹیم کو محدود اوور کی کرکٹ کے لیے تیار کر دیا تاہم ایک روزہ اور ٹیسٹ کرکٹ کے لیے مزید تیاری درکار ہے۔ایک انٹرویو کے دوران انہوں نے کہا کہ نیوزی لینڈ کے خلاف شکست کی وجوہات کا صحیح تعین کوچ اور مینیجر کی رپورٹ آنے کے بعد کیا جا سکے گا۔پاکستان کے پرانے اسٹار کھلاڑی اب بوڑھے ہو رہے ہیں اس لیے ہمیں ایک نئی ٹیم تیار کرنی پڑ رہی ہے اور نئے کھلاڑیوں کو اسٹار بنانے میں وقت لگتا ہے۔انہوں نے کہا کہ ٹیسٹ کرکٹ میں ہماری کارکردگی تسلی بخش ہے لیکن ایک روزہ کرکٹ میں کمزور ہیں اور اب ہماری تمام تر توجہ ورلڈ کپ پر ہے اور اس کی تیاری کر رہے ہیں۔نجم سیٹھی نے کہا کہ ہمارے پاس اچھے کھلاڑی موجود ہیں اور مڈل آرڈر میں متبادل بھی مل گئے ہیں جنہیں میچور ہونے میں تھوڑا وقت لگے گا۔کھلاڑیوں کے جدید طرز کی کرکٹ نہ کھیلنے کے سوال پر انہوں نے کہا کہ ماڈرن کوچز ہیں اور اچھے کھلاڑی ہیں سب اچھا ہو جائے گا۔ایک اور سوال پر نجم سیٹھی نے کہا کہ آئی سی سی کی ٹیم میں بین الاقوامی کھلاڑی پاکستان آ چکے ہیں جب کہ سری لنکا اور زمبابوے کی ٹیمیں یہاں آئیں اور اب مارچ میں ویسٹ انڈیز کی ٹیم آرہی ہے۔ چیئرمین پی سی بی کا مزید کہنا تھا کہ جو نقصان ہونا تھا وہ ہوگیا اور اب ہم اسے واپس کر رہے ہیں، آئندہ 12 ماہ میں آپ کو کوئی نئی جھلک بھی دکھائیں گے۔

لاہور(این این آئی)قومی کرکٹ ٹیم کے بلے باز اظہر علی نے کہا ہے کہ نیوزی لینڈ میں اپنی صلاحیتوں سے کم کھیلے جس کی وجہ سے ون ڈے سیریز ہار ے،ہمارااگلا ٹارگٹ ورلڈ کپ ہے۔ میڈیا سے گفتگو کرتے ہوئے قومی کر کٹ ٹیم کے کھلاڑی اظہر علی نے کہا کہ پی ایس ایل کرکٹ کے فروغ کے لیے بہترین ذریعہ ہے، اس ٹورنامنٹ میں بہتر ٹیلنٹ سامنے آئے گا۔انہوں نے کہا کہ کرکٹ ٹیم کا ٹارگٹ اگلا ورلڈ کپ ہے جس کے لیے اجتماعی اور انفرادی تیاریاں شروع کردی گئیں ہیںاورانگلینڈ سے ہونے والی سیریز میں بہتر کارکردگی دکھائیں گے۔

کراچی(آن لائن) پاکستان سپر لیگ(پی ایس ایل)تھری کے شیڈول فائنل کے میزبان نیشنل اسٹیڈیم کراچی میں فل ڈریس ریہرسل کا جائزہ لینے کیلئے غیرملکی سیکیورٹی ماہرین ریگ ڈکسن اوربریگیڈیئر رچرڈ ڈینس ہفتے کو کراچی میں پہنچے گے۔سکیورٹی ماہرین کے کراچی پہنچنے کے بعد پی سی بی آفیشلز کی آئی جی سندھ سے ملاقات شیڈول ہے، پاکستان سپرلیگ (پی ایس ایل) سیزن 3 کے انتظامات کو مکمل کرنے کیلئے تیاریاں شروع کردی گئی ہیں۔چھے ٹیموں میں ملتان سلطانز ،کراچی کنگز ،پشاور زلمی ، لاہور قلندر اسلام آباد یونائیٹڈ اور کوئٹہ گلیڈی ایٹرز شامل ہیںلیگ کے چار وینیوز میں مجموعی طور پر 34 میچز کھیلے جائیں گے۔تمام لیگ میچز اور ایک پلے آف دوبئی اور شارجہ میں منعقد ہوں گے جبکہ دو پلے آف لاہور میں فائنل کے کراچی میں انعقاد کیلئے تیاریاں کی جارہی ہیں۔ انٹرنیشنل کرکٹرز کی نمائندہ تنظیم کے ایگزیکٹیو چیئرمین ٹونی آئرش نے کہاکہ کہاں ٹی ٹوئنٹی لیگز کھیلنی ہیں یہ کھلاڑیوں کا انفرادی فیصلہ ہوتا ہے، ہم انھیں ماہرانہ مشاورت فراہم کرتے ہیں تاکہ فیصلے سے قبل معلومات کے حصول میں مدد ملے، ہمارے سیکیورٹی ماہرین ان دنوں اس حوالے سے نئی رپورٹ تیارکر رہے ہیں۔تفصیلات کے مطابق پی سی بی نے پی ایس ایل فائنل کا انعقاد25 مارچ کو نیشنل اسٹیڈیم کراچی میں کرنے کا اعلان کیا،ان دنوں اسٹیڈیم میں تعمیراتی کام جاری ہے، شہرقائد میں کئی برسوں بعد پہلے بڑے میچ سے قبل اتوار کو فل ڈریس ریہرسل ہونی ہے، اس کا جائزہ لینے کیلئے سیکیورٹی کنسلٹنٹ ریگ ڈکسن اوربریگیڈیئر رچرڈ ڈینس ہفتے کو کراچی پہنچ رہے ہیں۔ورلڈالیون کے لاہور میں میچز سے قبل بھی ڈکسن نے سیکیورٹی پر مشاورت فراہم کی تھی۔ پی سی بی کے کرنل (ر)اعظم اور ارشد خان کی سیکیورٹی معاملات پر آئی جی سندھ سے بھی ملاقات ہونی ہے۔ دوسری جانب فیڈریشن آف انٹرنیشنل کرکٹرز ایسوسی ایشن (فیکا)کے ایگزیکٹیو چیئرمین ٹونی آئرش نے کراچی میں فائنل پر کہنا ہے کہ کہاں ٹی ٹوئنٹی لیگز کھیلنی ہیں یہ کھلاڑیوں کا انفرادی فیصلہ ہوتا ہے،فیکا انھیں ماہرانہ مشاورت فراہم کرتی ہے تاکہ فیصلے سے قبل معلومات کے حصول میں مدد ملے،ہمارے سیکیورٹی ماہرین ان دنوں اس حوالے سے نئی رپورٹ تیار کر رہے ہیں۔