کراچی (ویب ڈیسک ) شہر قائد میں شدید گرمی کی لہر برقرار ہے پارہ 42 ڈگری کو چھو گیا۔کراچی میں آج بھی شدید گرمی کی لہربرقرارہے، دوپہر 12 بجے کراچی کا درجہ حرارت 42 ڈگری سینٹی گریڈ تک جا پہنچا جب کہ گرمی کی شدت (ہیٹ انڈیکس)45 ڈگری محسوس کی جارہی ہے اور ہوامیں نمی کا تناسب 15 فیصد سے بھی کم ریکارڈ گیا۔ سمندری ہوائیں بند ہیں جبکہ شمال کی جانب سے ہلکی ہوائیں چل رہی ہیں۔ شدید حبس اور گرمی کے باعث شہریوں کا جینا عذاب ہوگیا ہے۔ جب کہ اتوار کے روز شہر کا درجہ حرارت 45 ڈگری تک جانے کاامکان ہے۔شدید گرمی، ہوا، پانی کی بندش اورکے الیکٹرک کی جانب سےفنی خرابیوں کے نام پر طویل اور غیر اعلانیہ لوڈشیڈنگ نے رمضان المبارک کے ابتدائی ایام میں لوگوں کیلئے مشکلات بڑھادیں۔ گرم موسم کے باعث شہر میں ویرانی اور سڑکوں پر سناٹا چھایاہوا ہےشہریوں نے گرمی سے بچنے کیلئے خود کو گھروں تک محدود کرلیاہے۔محکمہ موسمیات19 سے23مئی تک ہیٹ ویو الرٹ جاری کرچکا ہے، گزشتہ روز بھی کراچی کا درجہ حرارت 42 ڈگری سینٹی گریڈ ریکارڈ کیا گیا تھا۔ طبی ماہرین نے شہریوں کو دھوپ میں جانےسے گریز کرنےکامشورہ دیتے ہوئے کہا ہے کہ اگر مجبوراً جانا بھی پڑے تو چھتری استعمال کریں اورسرپرگیلاکپڑارکھیں۔ جب کہ صوبائی حکومت نے صورت حال سے نمٹنے کیلئے کراچی کی مقامی انتظامیہ کو خصوصی ہدایت کررکھی ہیں اس کے علاوہ ہیٹ اسٹروک کے پیش نظر شہر کے سرکاری ہسپتالوں میں ایمر جنسی نافذ ہے۔
