مری (این این آئی)مسلم لیگ (ن)کے قائد سابق وزیر اعظم نواز شریف نے مری میں تعزیت کیلئے آنے والے لیگی کارکنوں سے گفتگو کرتے ہوئے کہا ہے کہ امید ہے خدا ہمارے ساتھ انصاف ضرور کریگا۔سابق وزیراعظم نواز شریف نے کہا ہے کہ بیگم کلثوم نواز مضبوط اعصاب کی مالک خاتون تھیں، لندن روانگی کے وقت نم آنکھوں کے ساتھ ہمیں دیکھا، بیماری کے دوران اور سانسوں کی رخصتی کے وقت ہم انکے ساتھ نہیں تھے، یہ دکھ زندگی بھر رہے گا۔ اللہ تعالیٰ کی ذات یہ سب کچھ دیکھ رہی ہے اور مجھے امید ہے رب العزت ہمارے ساتھ انصاف ضرور کرینگے۔لیگی عہدیداروں نے نواز شریف سے تعزیت کرتے ہوئے بیگم کلثوم نواز کی مغفرت اور درجات کی بلندی کیلئے دعا کی۔اس موقع پر میاں محمد نوازشریف نے تعزیت کرنے کیلئے آنے والوں کا شکریہ ادا کیا۔

لاہور (کورٹ رپورٹر) چیف جسٹس آف پاکستان کی سربراہی میں دو رکنی بنچ نے سابق سی سی پی او امین وینس کا آفس میں پراپرٹی اونے پونے داموں فروخت کے معاملہ پر اکبری سٹورز کی چار برانچوں کا تمام ریکارڈ طلب کر لیا ۔ عدالت نے سابق سی سی پی او امین وینس اور عمر ورک کے خلاف انکوائری کا حکم دے دیا ۔چیف جسٹس نے امین وینس اور عمر ورک کو انکوائری تک معطل کردیا ۔ فاضل چیف جسٹس نے ریمارکس دیئے کہ جو پولیس افسران وردی میں بندے مارتے ہیں ان کا حساب لینے کے لیے اللہ نے مجھے عہدہ دیا ۔ چیف جسٹس نے عمر ورک پر برہمی کا اظہار کرتے ہوئے کہا کہ عمر ورک آپ ابھی تک میری ڈکیتی کا ملزم تو پکڑ نہیں سکے ۔ مجھے معلوم ہے آپ کن وجوہات کی بنا پر اس مقام تک پہنچے ۔ فاضل چیف جسٹس نے دوران سماعت ریمارکس دیئے کہ مالدار شخص مرا تو سارے مامے چاچے اور کزن بن کر مال کھانے کے لیے گدھ بن گئے ۔اس ملک میں کیا یہ انصاف ہو رہا ہے ۔جس کے ہاتھ جو آیا لوٹ لے کھا گیا ۔ لوگ کہتے ہیں عمر ورک بندے مار دیتا ہے ۔ شہر ہر بڑے تنازعہ میں عمر ورک کا ہی نام کیوں آتا ہے ۔ عمر ورک نے بتایا کہ اکبری سٹور میں سی سی پی او امین وینس کے کہنے پر مداخلت کی ۔ عدالت نے اسٹور کے شیئر ہولڈر سابق چیف انجینئر شوکت شاہین سمیت دیگر کے اثاثوں کا ریکارڈ طلب کر لیا۔ چیف جسٹسں پاکستان جسٹس ثاقب نثار نے پنجاب بھر کی پرائیویٹ یونیورسٹیوں سے متعلق ازخود نوٹس لے کر ایڈووکیٹ جنرل پنجاب کو یونیورسٹیوں اور ملحقہ کالجز کی تفصیلات پیش کرنے کا حکم دے دیا۔چیف جسٹس ثاقب نثار کی سربراہی میں سپریم کورٹ کے2 رکنی بنچ نے لاہور رجسٹری میںنجی یونیورسٹی کے ملحقہ کالج کے طلبہ کو ڈگری نہ ملنے کے کیس کی سماعت کے دوران ازخود نوٹس لیا۔سماعت کے دوران ہائیر ایجوکیشن کمیشن کی جانب سے مو¿قف اختیار کیا گیا کہ نجی یونیورسٹی نے بغیر اجازت کالجز کے ساتھ الحاق کیا۔ہائر ایجوکیشن کمیشن کا مزید کہنا تھا کہ ‘صرف ڈگری نہیں، ادارے میں اساتذہ کا ہونا بھی ضروری ہے، اس موقع پر چیف جسٹس نے ریمارکس دیئے کہ لوگوں کے ساتھ فراڈ کر رہے ہیں جبکہ تعلیم کا بیڑا غرق کر دیا گیا ہے، نجی یونیورسٹیوں کی جانب سے دکھاوے کے بورڈ لگا دیئے جہاں غیر معیاری تعلیم دی جا رہی ہے۔ چیف جسٹس نے استفسار کیا کہ ‘بتایا جائے یہ یونیورسٹیاں کب سے کام کر رہی ہیں اور فیس کیا لیتی ہیں؟اس کے ساتھ ہی جسٹس ثاقب نثار نے کہا کہ خلافِ قانون کیمپس کھولنے پر فوجداری مقدمات درج کیے جائیں گے اور میں دیکھوں گا کہ کون اب ان کی ضمانت لیتا ہے۔چیف جسٹس نے مزید ریمارکس دئیے کہ چند پیسوں کی خاطر آپ لوگوں نے تعلیم کو برباد کر دیا، چیف جسٹس نے اسفتسار کیاکہ یونیورسٹیاں کب سے کام کر رہی ہیں اور فیس کیا لیتی ہیں؟،چیف جسٹس نے ریمارکس دیئے کہ یہ لوگوں کے ساتھ فراڈ کر رہے ہیں، انہوں نے تعلیم کا بیڑا غرق کر دیا ہے، عدالت نے قرار دیا کہ ہائر ایجوکیشن کمیشن نے نجی یونیورسٹیوں کو نوٹس دے کر آنکھیں بند کر لیںہیں لیکن اب بچوں کے مستقبل کا عدالت جائزہ لے گی، ڈگریاں نہ ملنے پر طالبعلم سڑکوں پر خوار ہو رہے ہیں، عدالت نے سینئیر قانون دان میاں ظفر اقبال کلانوری اور عزیز بھنڈاری ایڈووکیٹ کو عدالتی معاون مقرر کر تے ہوئے ایڈووکیٹ جنرل پنجاب کو تمام یونیورسٹیوں کی تعداد انکے سات ملحقہ کالجز کی تفصیلات پیش کر نے کا حکم دے دیا۔

نیویارک (مانیٹرنگ ڈیسک) وزیر خارجہ شاہ محمود قریشی نے کہا ہے کہ پاکستان اپنی خود مختاری پر کسی قسم کا سمجھوتہ نہیں کرے گا۔ پاکستان کی عوام نے تبدیلی کے لیے ووٹ دیا ہے۔پاکستانی حکومت کی اولین ترجیح عوام کی فلاح ہے۔وقت آگیا ہے لوٹی ہوئی دولت عوام تک پہنچائی جائے۔کرپشن کرنیوالا اور اسکی معاونت کرنیوالا دونوں مجرم ہیں۔ اقوام متحدہ کی جنرل اسمبلی سے خطاب کرتے ہوئے وزیر خارجہ نے کہ کہ ایسا مضبوط پاکستان چاہتے ہیں جو عالمی برادری سے تعلقات استوار کرے۔ عمران خان کی قیادت میں نئے پاکستان کی داغ بیل ڈال دی ہے۔ اقوام عالم کیساتھ ملکر نئے اہداف کے تعین میں کوشاں رہیں گے۔ پاکستان قومی سلامتی اور ملکی مفادات پر سودے بازی نہیں کرے گا۔ دنیا دوراہے پر کھڑی ہے ۔ سامراجیت کی نئی شکلیں پروان چڑھ رہی ہیں۔ آج عالمی اصول متزلزل دکھائی دیتے ہیں۔ دنیا میں اندھی طاقت کی عمل داری قائم ہوتی جا رہی ہے۔ تجارتی جنگ کے بادل دنیا پر چھائے ہوئے ہیں۔ عصر حاضر ایک قائدے کا متلاشی ہے۔ پاپولزم آئسولیشن ازم کی قوتیں غالب نظر آتی ہیں۔ مشرق وسطی ٰ کے حالات تشویشناک ہیں۔ مسئلہ فلسطین اپنی جگہ موجود ہے۔ انہوں نے کہا کہ گستاخانہ خاکوں کے منصوبے سے امت مسلمہ کو شدید ٹھیس پہنچی۔اسلام دشمنی کا مقابلہ کرتے رہیں ۔ پاکستان نے غلامی میں جکڑی افریقی مسلمان قوموں کی حمایت کی۔ پاکستان بھارت کے ساتھ برابری اور احترام کا رشتہ قائم کرنے پر تیار ہے۔کشمیریوں کو حق رائے دہی نا دینا مسئلے کی وجہ ہے مسئلہ کشمیر حل نہ ہونا پائیدار امن میں بڑی رکاوٹ ہے۔مسئلہ کشمیر 70 سال سے سلامتی کونسل کے ایجنڈے پر ہے۔ دہشتگردی کی آڑ میں بھار ت مقبوضہ کشمیر میںمظالم اور قتل و غارت چھپا نہیں سکے گا۔بھارت نے مقبوضہ کشمیر میں ریاستی دہشتگردی کو فروغ دیا۔ انسانی حقوق کی حالیہ رپورٹ کا خیر مقدم کرتے ہیں۔ ہم اقوام متحدہ کی رپورٹ پر جلد عمل درآمد کی حمایت کرتے ہیں۔اقوام متحدہ کی قراردادوں کے مطابق جب تک مسئلہ کشمیر حل نہ ہوا امن نہیں آسکتا۔بھارتی وزیر اعظم مودی نے سیاست کو امن پر فوقیت دی۔نیو یارک میں ملاقات اچھا موقع تھا۔ مودی حکومت کے منفی رویے نے تیسری بارمذاکرات کا موقع گنوا دیا۔ پاکستان اس خظے میں ہے جہاں نوآبادیاتی نظام اور سرد جنگ نے اپنے اثر چھوڑے ہیں۔ پاکستان دہشتگردی کیخلاف نبرد آزما ہے۔دو لاکھ افواج کی مدد سے دہشتگردی کیخلاف کامیاب آپریشن کیا۔ پاکستان نے دہشتگردی کے خلاف بڑے آپریشن کیے جن کی وجہ سے آج ہمارے شہروں کی رونقیں لوٹ آئی ہیں۔ فوج اور عوام کی سے وجہ دہشتگردی کا زور ٹوٹ چکا۔بھارتی جاسوس کلبھوشن یادھو نے بھارتی حکومت کی ایما پر پاکستان میں دہشتگردی کی پلاننگ کی۔ جسکا اس نے اعتراف کیا ہے۔ بھارت تمام ہمسایہ ممالک کے خلاف دہشتگردی کی معاونت اور مالی مدد فراہم کر رہا ہے ۔ کلبھوشن کی پاکستان میں گرفتاری اس کا ثبوت ہے۔ سانحہ اے پی سی اور سانحہ مستونگ کے ذمہ دار دہشتگردوں کو بھارت کی پشت پناہی حاصل تھی۔پاکستان اے پی ایس پشاور حملہ کبھی نہیں بھولے گا۔سمجھوتہ ایکسپریس کے بے گناہ پاکستانیوں کو کبھی نہیں بھولیں گے۔ جسکے ثبوت پاکستان نے اقوام متحدہ کو پہلے ہی فراہم کر دئیے تھے۔ بھارت کنٹرول لائن پر مسلسل جنگ بندی معاہدے کی خلاف ورزی کرتا آرہا ہے ۔ بھارت کو ہمارے صبر کا امتحان نہیں لینا چاہئے۔ بھارتی جارہیت کا بھرپور جواب دیں گے۔ پاکستان کے پاس اپنے دفاع کے لیے کم از کم دفاعی صلاحیت ناگزیر ہے۔ اقوام متحدہ گفتگو کے ذریعے معاملات حل کرنے کا فارم ہے۔پاکستان اسلحے کے دوڑ کم کرنے کے لیے بھارت کیساتھ بات چیت کے لیے تیار ہے۔مربوط مذاکرات کے ذریعے تمام مسائل کا حل چاہتے ہیں۔ افغانستان کی جنگ 17 سال نہیں جیتی جا سکی۔ افغان پناہ گزینوں کی جلد واپسی کے خواہاں ہیں۔سلامتی کونسل کو مزید مضبوط اور جمہوری دیکھنا چاہتے ہیں۔ پاکستان ہمیشہ اقوام متحدہ کا فعال رکن رہا ہے اور امن مشن میں سرفہرست ہے۔ آلودگی میں پاکستان کا حصہ بہت کم ہے مگر پاکستان موسمیاتی تبدیلی سے متاثر ممالک میں شامل ہے۔ موسمیاتی تبدیلی ایک سنگین مسئلہ ہے۔ پاکستان نے 5 سالوں کے دوران ایک ارب درخت لگانے کی پلاننگ کی ہے۔ سی پیک پاکستان کی جغرافیائی اہمیت کو معاشی ثمرات میں تبدیل کرے گا۔وسط ایشیا کو سمندر تک راہداری دیں گے۔ دہشتگردی کے مرض کی سب سے پر اثر دوا ترقی ہے۔

لاہور (نیوز رپورٹر) پنجاب حکومت نے سانحہ ماڈل ٹاﺅن کیس کے حوالے سے بڑا فیصلہ کرتے ہوئے انسداددہشتگردی عدالت میں استغاثہ کی ٹیم کوتبدیل کردیا ۔پنجاب حکومت نے سانحہ ماڈل ٹاﺅن میں دہشت گردی عدالت میں دائرمقدمات کا جلد فیصلہ کرنے کے لیے پراسیکیوشن ٹیم تبدیل کردی ہے، پنجاب حکومت نے ڈپٹی پراسیکیوٹرجنرل حافظ اصغر، شیخ سعید اوروقارعابد بھٹی کی جگہ ڈپٹی پراسیکیوٹرجنرل عبدالرﺅف وٹو، امتیازسپرا اورآزر سلطان کا نوٹیفکیشن جاری کردیا ہے۔وزیراعظم عمران خان نے گزشتہ دنوں پاکستان عوامی تحریک کے سربراہ ڈاکٹرطاہرالقادری سے ٹیلی فونک گفتگوکی تھی جس میں انہوں نے سانحہ ماڈل ٹاﺅن کے لواحقین کو جلد انصاف فراہم کرنے کے عزم کا اعادہ کیا تھا۔

راولپنڈی (ہیلپ لائن) قصور کی طرح راولپنڈی میں بھی ایک ننھی زینب وحشی درندے کی جنسی ہوس کا نشانہ بن گئی اور پولیس متاثرہ بچی کے والدین کی مدد کرنے اور ملزم کو گرفتار کرنے میں نہ صرف تاحال بری طرح ناکام ہے بلکہ مبینہ طور پر جنسی تشدد کی میڈیکل رپورٹ بدلنے اور ملزموں کی پشت پناہی کرنے میں بھی ملوث ہے اسلئے اہالیانِ علاقہ نے چیف جسٹس آف پاکستان جسٹس ثاقب نثار سے اپیل کی ہے کہ وہ اس سفاک واقعہ کا ازخود نوٹس لیں اور متاثرہ خاندان کی دادرسی کرنے اور بچی کیساتھ جنسی تشدد کرنے والے ملزمان کو قرار واقعی سزا دلوانے کیلئے متعلقہ پولیس افسران کو احکامات صادر کریں۔ تفصیلات کے مطابق مبینہ ملزم ارسلان عرف حسنین ولد جاوید خان سکنہ کوہاٹی بازار راولپنڈی نے شادی کی ایک تقریب میں شریک آٹھ سالہ (ز) کو ورغلا کر جنسی زیادتی کا نشانہ بنایا اور فرار ہو گیا جس کے بعد اہالیانِ محلہ اور بچی کے رشتہ داروں کے پرزور احتجاج پر متعلقہ پولیس نے واقعہ کی رپورٹ تو درج کرلی لیکن مبینہ طور پربھاری رشوت کے عوض میڈیکل رپورٹ اور تفتیشی رپورٹ بدل ڈالی جو کہ انصاف کا مذاق اڑانے کے مترادف ہے۔ ننھی (ز) کے گھر والے ملزمان اور پولیس کی جانب سے ہونے والی اس زیادتی پر چیف جسٹس سے انصاف کے طلب گار ہیں اور اپیل کرتے ہیں کہ سووموٹو ایکشن لے کر ذمہ داران کے خلاف کارروائی کی جائے۔