اسلام آباد/ لاہور( این این آئی) چیئرمین نیب جسٹس (ر)جاوید اقبال نے افسران و ملازمین کی سیاسی شخصیات سے ملاقاتوں پر پابندی عائد کردی ۔نجی ٹی وی کے مطابق افسران و ملازمین کی سیاسی شخصیات سے ملاقاتیں ضابطہ اخلاق کے خلاف ہیں۔چیئرمین نیب کی پیشگی منظوری کے بغیر سیاسی شخصیات سے ملاقاتیں ٹی سی ایس رولز 2002 کی بھی خلاف ورزی ہے۔نیب ٹی سی ایس رولز کی خلاف ورزی پر متعلقہ افسر یا ملازم کو برطرف کیا جاسکتا ہے۔ کسی بھی سیاسی شخصیت کی جانب سے ملاقات کیلئے رابطہ کرنے پر چیئرمین نیب سے منظوری لازمی حاصل کی جائے۔واضح رہے کہ چیئرمین نیب کی ہدایت پر تمام بیوروز کو مراسلہ ارسال کردیا گیا ہے۔

قصور (بیورو رپورٹ) سرحد عبور کر کے بھارت سے پاکستان میں داخل ہونیوالے قریباً چھ فٹ لمبے لنگور نے قصور کے دیہی علاقہ جات میں ہر طرف خوف وہراس پھیلا دیا روزنامہ خبریں کے صفحہ اول پر ضلعی انتظامیہ محکمہ وائلڈ لائف اور دیگر اداروں کی نااہلی اور مجرمانہ لاپرواہی کی تفصیلات شائع ہونے کے بعد محکمہ وائلڈ لائف پنجاب کے افسران بالآخر چوتھے روز حرکت میں آئے اور خبر کی اشاعت کے بعد انہوں نے ہاتھ پر ہاتھ دھر کر بیٹھے ہوئے محکمہ وائلڈ لائف قصور کے افسران کو طلب کر کے ایک ایسی جدید ساخت کی رائفل فراہم کی ہے جس سے نکلنے والی گولی زیادہ دور تک نشانہ لے سکتی ہے اور اس گولی میں لگا ہوا مادہ متعلقہ جانور کو بیہوش کر دیتا ہے تاہم چوتھے روز بھی پولیس یا ضلعی انتظامیہ کے کسی ادارے نے خوف وہراس کی علامت بن جانیوالے لنگور کی تلا ش کے لیے کچھ نہیں کیا گزشتہ رات ٹاور پر چڑھ جانیوالامذکورہ لنگور رات گئے اندھیرے میں غائب ہوگیا بہت سے لوگوں کا یہ کہنا ہے کہ انہوں نے لنگور کو قصور شہر کی طرف جاتے ہوئے دیکھا ہے دوسری طرف کچھ تجزیہ نگاروں کا خیال ہے کہ بھارتی خفیہ ایجنسیوں نے کہیں اس لنگور کو کسی سازش کے تحت تو پاکستانی حدود میں داخل نہیں کیا؟ تاکہ وہ مبینہ طور پر اپنے جسم پر لگے ہوئے آڈیو یا ویڈیو آلات کے ذریعے ریکارڈنگ کرنے کا ذریعہ بن رہا ہو کیونکہ کچھ عرصہ قبل پاکستان سے ایک کبوتر سیہون بھارت کی حدو د میںداخل ہوگیا تو بھارتی ایجنسی راءنے اس کبوتر کو باقاعدہ گرفتار کرلیا اور یہ الزامات عائد کیے جاتے رہے کہ یہ کبوتر جاسوسی کرنے کی خاطر بھارت بھجوا یا گیا ہے ممتاز تجزیہ نگار اور قانوندان محمد افضل انصاری کا کہنا ہے کہ پاکستان کے تحقیقاتی اداروں کو ان امور پر بھی توجہ دینی چاہیے اور پولیس سمیت دیگر اداروں کی نااہلی پر سخت نوٹس لینا چاہیے۔

اسلام آباد (این این آئی‘ مانیٹرنگ ڈیسک) وفاقی حکومت نے اسمگل شدہ موبائل فونز کے خلاف اقدامات اٹھانے کا فیصلہ کرتے ہوئے کہا ہے کہ 1 دسمبر کی مہلت کے بعد اسمگل ہونے والے موبائل فون بند ہو جائیں گے ¾ مقامی طور پر بننے والے موبائل فونز کی پیداوار کو فروغ دیا جائے گا ¾کرتارپور بارڈر کھولنا پاکستان کا اہم اقدام ہے ¾ 28نومبر کو وزیراعظم عمران خان کرتارپور کا دورہ کریں گے ¾ پاکستان اور بھارت کے درمیان کرتارپور بارڈر پوائنٹ کھولنے کی تقریب ہوگی ¾مسئلہ کشمیر کے حل کے لیے مثبت پیشرفت انتہائی ضروری ہے۔ جمعہ کو وزیراعظم عمران خان کی زیر صدارت ہونے والے وفاقی کابینہ کے اجلاس میں ملک میں امن و امان اور سیاسی و معاشی صورت حال کا جائزہ لیا گیا۔ذرائع کے مطابق وزیراعظم عمران خان کی زیر صدارت ہونے والے وفاقی کابینہ کے اجلاس میں کراچی میں چینی قونصل خانے پر ہونے والے حملے کی بھرپور الفاظ میں مذمت کی گئی۔ذرائع کے مطابق چینی قونصل خانے پر حملہ ناکام بنانے پر پولیس اور رینجرز کے جوانوں کو خراج تحسین پیش کیا گیا اور شہید اہلکاروں کے لیے فاتحہ کی گئی۔وفاقی کابینہ نے عارف عثمانی کو نیشنل بینک کا نیا صدر مقرر کرنے اور اسمگل شدہ موبائل فونز کا استعمال روکنے کا نظام نافذ کرنے کی منظوری دیدی اس کے علاوہ وفاقی کابینہ کے اجلاس میں 100 روزہ پلان اور ہاو¿سنگ سے متعلقہ ٹاسک فورس کے بارے میں امور بھی زیر غور آئے۔ذرائع کے مطابق تمام وزارتوں، ڈویڑنز اور اداروں کو 100 روزہ پلان پر عمل درآمد رپورٹ فوری پیش کرنے کی ہدایت کی گئی۔وفاقی کابینہ کے اجلاس کی صدارت کرتے ہوئے اپنے ابتدائی کلمات میں وزیراعظم نے کہاکہ ہماراعزم ہے کہ اس ملک کو غیر مستحکم کرنے کے لئے دہشت گردوں کو باہرسے جو بھی معاونت مل رہی ہے انشاءاللہ ہم ان سب کے پیچھے جائیں گے۔ وزیر اعظم نے کراچی میں چینی قونصل خانے کے باہر اور اورکزئی ایجنسی میں دہشت گردی کی کارروائیوں کا حوالہ دیتے ہوئے کہا کہ ہمیں پہلے سے اس قسم کی کچھ اطلاعات تھیں کہ پاکستان کو غیر مستحکم کرنے کی کوشش کی جائےگی لیکن یہ پتہ نہیں تھاکہ یہ کارروائیاں کدھر کی جائیں گی۔ وزیراعظم نے اپنے چین کے دورے اور وہاں بے مثال معاہدوں پر دستخط کا بالخصوص ذکر کرتے ہوئے کہا کہ یہ کارروائیاں چین کے دورے کا رد عمل ہیں۔ انہوں نے کہاکہ دورہ چین کے معاہدے خفیہ ہیں اور ہم عوام کے سامنے ان کی تفصیلات بیان نہیں کرسکتے لیکن آزادانہ رائے رکھنے والے افراد اور دنیا کو پتہ ہے کہ دورہ چین کے دوران چین کے ساتھ پاکستان کے جس قسم کے معاہدے ہوئے ہیں دنیا میںکسی اور ملک سے نہیں ہوئے۔ اس کے بعد خدشہ تھا کہ وہ طاقتیں پاکستان کو کمزور دیکھناچاہتی ہیں اور غیر مستحکم کرنا چاہتی ہیں۔ ان کو ان سمجھوتوں کے بارے میں فکر تھی، اس کے علاوہ جیسے جیسے معیشت مستحکم ہو رہی ہے انتشار پھیلانے والی قوتیں متحرک ہونے کا بھی خدشہ تھا۔ وزیر اعظم نے خاص طورپر ان شہداءکو داد دی جنہوں نے دہشت گردوں کا راستہ روکا اور ان کی مستعدی اور بہادری کے نتیجے میں قونصل خانے میں کسی چینی اہلکار کو نقصان نہیں پہنچا۔ انہوں نے کہاکہ سکیورٹی فورسز بڑی مستعدی سے وہاں پہنچیں اور دہشت گردوں کو ناکام بنایا ورنہ اگر وہ عمارت کے اندر چلے جاتے تو بڑا حادثہ ہوسکتا تھا۔ انہوں نے کہاکہ اللہ کا شکر ہے کہ ہماری انٹیلی جنس اور سکیورٹی فورسز نے انسداد دہشت گردی کی جنگ کامیابی سے لڑی، بے مثال قربانیاں دیں، کسی اور ملک نے دہشت گردی کے خلاف جنگ میں ایسی کامیابیاں حاصل نہیں کیں۔ وزیر اعظم نے اورکزئی ایجنسی میں دہشت گردی کی کارروائی کا ذکر کرتے ہوئے کہا کہ یہ بڑامنصوبہ تھا۔ اطلاعات کے مطابق یہ خود کش حملہ نہیں بلکہ یہ ڈیوائس رکھی گئی تھی جس کا مقصد صرف انتشار پھیلانا تھا۔ وفاقی کابینہ کے اجلاس کے بعد میڈیا کو بریفنگ دیتے ہوئے وفاقی وزیر اطلاعات چودھری فواد حسین نے کہاکہ کابینہ کے اجلاس باقاعدگی سے ہو رہے ہیں۔ چوہدری فواد نے کہاکہ نواز شریف کے دور میں جب کابینہ کا اجلاس کبھی کبھار ہوتا تھا تو ان کے وزرا ہفتہ ہفتہ ہاتھ نہیں دھوتے تھے۔ چوہدری فواد نے کہا کہ وزیر خارجہ شاہ محمود قریشی نے نے چینی حکام کو اعتماد میں لیا۔ چوہدری فواد نے کہا کہ چین کے وزیر خارجہ نے بھی شاہ محمود قریشی سے تعاون کی یقین دہانی کرائی۔انہوںنے کہاکہ بڑھتے ہوئے پاک چین تعلقات کو دشمن قوتیں ہضم نہیں کر پا رہیں ¾انہوںنے بتایا کہ قونصل خانے میں موجود عملے کے 21چینی سفارتی اہلکار محفوظ رہے۔چوہدری فواد نے کہا کہ کچھ قوتیں پاکستان اور چین کی دوستی کو نقصان پہنچانا چاہتی تھیں۔ چوہدری فواد نے کہاکہ دہشتگردی کے واقعہ میں قونصلیٹ کا عملہ محفوظ رہا۔ چوہدری فواد نے کہا کہ پلاننگ کے ساتھ دہشتگردی کے لیے جمعہ کا دن چنا گیا۔ چوہدری فواد نے کہا کہ ہنگو میں بھی دھماکہ ہوا جس کی جتنی مذمت کی جائے کم ہے۔ چوہدری فواد نے کہا کہ پاکستان ترقی کے راستے پر گامزن رہے گا۔ انہوںنے اعلان کیا کہ عارف عثمانی نیشنل بینک کے نئے صدر ہونگے۔ وزیر اطلاعات نے کہاکہ 82 ملین کے موبائل فونز پر ٹیکس ادا ہو رہا ہے۔ چوہدری فوادنے کہاکہ ڈھائی ارب روپے کے موبائلز غیر قانونی طریقے سے آ رہے ہیں جن ہر ٹیکس ادا نہیں ہو رہا۔ چوہدری فواد نے کہاکہ اسمگل شدہ موبائل فونز کے خلاف اقدامات کا فیصلہ کیا ہے۔انہوںنے بتایا کہ ڈی آئی آر بی ایس سسٹم کا نفاذ عمل میں لایا جائے گا۔ چوہدری فواد نے کہا کہ 31 دسمبر کی مہلت کے بعد اسمگل ہونے والے موبائل فون بند ہو جائیں گے۔ چوہدری فواد نے کہا کہ مقامی طور پر بننے والے موبائل فونز کی پیداوار کو فروغ دیا جائے گا۔ وزیر اطلاعات نے کہا کہ وفاقی کابینہ نے ای سی سی کے فیصلوں کی توثیق کی۔ انہوںنے کہاکہ کرتارپور بارڈر کھولنا پاکستان کا اہم اقدام ہے ۔چودھری فواد حسین نے کہا کہ کرتار پور بارڈر سیاسی نہیں انسانی مسئلہ ہے ۔وزیر اطلاعات نے کہ کہ کرتار پور سکھ برادری کیلئے انتہائی اہمیت کا مذہبی مقام ہے۔انہوںنے کہاکہ ہم سکھ برادری کے مذہبی عقائد کا احترام کرتے ہیں۔چودھری فواد حسین نے کہاکہ 28نومبر کو وزیراعظم عمران خان کرتارپور کا دورہ کریں گے۔وزیر اطلاعات نے کہا کہ بھارتی صحافیوں کے لیے بھی ویزے کا حصول آسان بنا رہے ہیں۔انہوںنے کہاکہ مسئلہ کشمیر کے حل کے لیے مثبت پیشرفت انتہائی ضروری ہے۔ ایک سوال پر انہوں نے کہا کہ جب عمران خان نے 30 سال پہلے گھربنانا شروع کیا تو بنی گالا جنگل اور بیابان تھا، عمران خان نے اس وقت کے قوانین کے مطابق بنی گالا کا گھر بنایا۔

اسلام آباد (مانیٹرنگ ڈیسک) وفاقی وز یراطلاعات فواد چودھری نے کہا ہے کہ خادم رضوی کو حفاظتی تحویل میں لیکر مہمان خانے منتقل کیا گیا، موجودہ کارروائی کا آسیہ بی بی کیس سے کوئی تعلق نہیں ہے۔ تحریک لبیک مذہب کی آڑ میں سیاست کر رہی ہے اور عوام کے جان و مال کیلئے خطرہ بن گئی ہے۔ نجی ٹی وی سے گفتگو میں انہوں نے کہا کہ عوام کے جان ومال کی حفاظت حکومت کی اولین ترجیح ہے۔ خادم رضوی کو حفاظتی تحویل میں لیا گیا ہے۔ اس کارروائی25 نومبر کی کال کو واپس لینے کیلئے نہیں کی گئی۔ صورتحال مکمل کنٹرول میں ہے عوام پرامن رہیں اور حکومت سے تعاون کریں۔

لاہور (کرائم رپو رٹر)تحریک لبیک یارسول اللہ کی جانب سے 25نومبر کواحتجاج کی کال کے بعد رات گئے پولیس اور قانون نافذ کرنے والے اداروں کا چوک یتیم خانہ میں آپریشن، خادم حسین رضوی گرفتار ، ڈاکٹر اشرف آصف جلالی کے استاد بھی مانگا منڈی سے گرفتار، دوران آپریشن پولیس اور تحریک لبیک کے کارکنوں کے دمیان جھڑپ ، مظاہرین نے ایس پی صدراور پولیس کی نفری پراینٹیں برسائیں ، ایس پی ماڈل ٹاﺅن کو یرغمال بنالیا ،ایس پی اقبال ٹاﺅن اورانکے گن مین کو یرغمال بنالیا،دیگر نفری نے کاروائی کرتے ہوئے مغوی ا فسران کو بازیاب بھی کروایا اور متعدد کارکنان کو گرفتار بھی کیا ۔ ذرائع کے مطابق امیر تحریک لبیک یارسول اللہ خادم حسین رضوی کی جانب سے 25نومبر کو احتجاج کی کال دی تھی جس حوالے سے ایس پی ماڈل ٹاﺅن ، ایس پی اقبال ٹاﺅن سید علی مذاکرات کیلئے یتیم خانہ چوک گرینڈ بیٹری سٹاپ مسجد رحمت العالمین میںگئے جہاں تحریک لبیک کے کارکنان نے مشتعل ہوگئے اور انھوں نے ایس پی ماڈل ٹاﺅن ، ایس پی اقبال ٹاﺅن سید علی اور گن مین کویرغمال بنا لیا جس کے بعد ایس پی صدرعلی رضا یرغمال ایس پیز اور دیگر ملازمین کو بازیاب کروانے کیلئے بھاری نفری کے ہمراہ یتیم خانہ چوک پہنچے تو مشتعل مظاہرین نے پولیس پارٹی پر اینٹوں سے حملہ کر دیا جس سے ایس پی صدر علی رضا بھی شدید زخمی ہوگئے تاہم پولیس نے تمام یرغمالیوں کو بازیاب کروانے کے ساتھ ساتھ خادم حسین رضوی کو بھی حراست میں لے لیا اور نامعلوم مقام پر منتقل کر دیا ۔ خادم حسین رضوی کی گرفتاری کے بعد ممکنہ جلاﺅ گھیراﺅ اور کشیدہ حالات کے پیش نظرلاہور سمیت پنجاب کے مختلف علاقوں میں تحریک لبیک پاکستان کے متحرک کارکنان کیخلاف پولیس اور دیگر قانون نافذ کر نے والے اداروں نے کریک ڈاﺅن شروع کر دیا جو کہ رات گئے تک جاری رہا ۔ اس آپریشن کے دوران پولیس نے کارکنوں کے مدرسوں اور گھروں میں چھاپے مارتے ہوئے متعدد افراد کو حراست میں لے لیا ۔ ذرائع کا مزید کہنا ہے کہ اشرف جلالی سمیت بعض قائدین اور دیگر رہنماﺅں کوبھی پنجاب پولیس نے گرفتار کر لیا ہے تاہم ان کی تصدیق نہیں ہوسکی جبکہ ڈاکٹر اشرف آصف جلال کے استاد مفتی ظہور جلال کو بھی مانگا منڈی سے گرفتارکرنے کی اطلاعات موصول ہوئی ہیں ۔لاہور میں خادم حسین رضوی کی گرفتاری کے بعد پولیس اور دیگر قانون نافذ کر نے والے ادار وں کی جانب سے وفاقی حکومت کے احکامات پر تحریک لبیک کے کارکنوں کیخلاف ملک بھر میں کریک ڈاﺅن شروع کر دیاگیا۔