اسلام آباد(ویب ڈیسک) وفاقی وزیراطلاعات فواد چوہدری نے کہا ہے کہ اشتہارات پر حکومتی کنٹرول ختم کر رہے ہیں جب کہ زیراعظم نے وزارتِ اطلاعات کو میڈیا ہاﺅسز کے بقایا جات ادا کرنے کی ہدایت کی ہے۔ذرائع کے مطابق وزیراعظم عمران خان کی زیر صدارت میڈیا کے معاملات سے متعلق اجلاس ہوا۔ اجلاس میں وزیر اطلاعات فواد چوہدری، وفاقی سیکریٹری اطلاعات، پنجاب اور خیبرپختون خوا کے صوبائی وزرا اور بلوچستان کے ڈی جی پی آر نے شرکت کی۔اجلاس سے متعلق وزیر اطلاعات فواد چوہدری کا کہنا تھا کہ پچھلی حکومت کے فیصلوں سے میڈیا انڈسٹری متاثر ہوئی، گزشتہ حکومت نے اشتہارات کو سیاسی آلہ کار کے طور پر استعمال کیا، ہم اشتہارات کے سیاسی فوائد کے حق میں نہیں، اشتہارات پر حکومتی کنٹرول ختم کر رہے ہیں اور اشتہارات کے اجراء کے لیے میرٹ پر مبنی پالیسی بنا رہے ہیں۔فواد چوہدری نے کہا کہ گزشتہ چند ماہ سے میڈیا ہاﺅسز کے مالی بحران کے شکار ہونے اور میڈیا سے درجنوں افراد کو برطرف کرنے کی خبریں زیرِ گردش ہیں جب کہ وزیراعظم کا کہنا تھا کہ ہم نے عوام سے روزگار فراہم کرنے کا وعدہ کیا تھا جس کے بعد وزیراعظم نے میڈیا ہاﺅسز کے بقایا جات فوری طور پر ادا کرنے کی ہدایت کی ہے۔

اسلام آباد(ویب ڈیسک)سپریم کورٹ آف پاکستان نے شریف فیملی کی سزا معطلی کیخلاف نیب کی اپیل سماعت کیلئے منظور کر لی۔چیف جسٹس ثاقب نثار کی سربراہی میں 3 رکنی بنچ نے شریف فیملی کی سزا معطلی کیخلاف نیب کی اپیل کی سماعت کی ،دوران سماعت چیف جسٹس پاکستان نے نوازشریف کے وکیل خواجہ حارث سے مکالمہ کرتے ہوئے کہا کہ جب آپ پیش ہوتے ہیں میرے دل کی دھڑکن بڑھ جاتی ہے،چیف جسٹس نے کہا کہ گزشتہ سماعت پر میرے معالج کمرے میں موجود تھے،مجھے انہوںنے بتایا کہ خواجہ حارث کے آنے پر میرے دل کی دھڑکن بڑھ جاتی ہے ،اس پر عدالت میں قہقہے لگ گئے۔

ملتان (خصوصی رپورٹ) ملتان کے دو بڑے صنعتی گروپ کے مالکان کی دبئی سمیت یورپین ممالک میں جائیدادیں موجود ہیں، ذرائع کے مطابق جنوبی پنجاب سے تعلق رکھنے والے ایک ہزار سے زائد افراد جن میں سیاسی شخصیات، صنعتکار اور زمیندار شامل ہیں نے دبئی سمیت دیگر ممالک میں قیمتی فلیٹس اور دیگر جائیدادیں خرید رکھی ہیں، تحقیقاتی اداروں نے ائیرپورٹس سے مسلسل ایک ملک کیلئے سفر کرنے والے افراد کی فہرست بھی تیار کی ہے جن کے بارے میں بیرون ملک کاروبار ہونے کا شبہ ہے جو چھپایا جارہا ہے۔

لاہور (خصوصی رپورٹ) پبلک پارکس میں شادی کی تقریبات کا معاملہ، سینئر وزیر عبدالعلیم خان کا نوٹس، پارکوں میں شادیوں پر ضلع حکام اور پی ایچ اے کو فوری کارروائی کرنے کے احکامات جاری کر دیے۔ سینئر صوبائی وزیر عبدالعلیم خان نیڈ پٹی کمشنر اور ڈی جی پی ایچ اے کو ہدایات جاری کی ہیں کہ پارکوں میں شادیوں پر ضلعی حکام اور پی ایچ اے فوری کارروائی کریں، عبدالعلیم خان کے مطابق عوامی مقامات کی خوبصورتی خراب نہیں ہونی چاہیے، سینئر وزیر نے کہا کہ پودوں اور گھاس کو نقصان پہنچانا کسی طور پر درست نہیں، پارکوں میں تقریبات کے انعقاد پر پابندی کے فیصلے پر عملدرآمد کرایا جائے۔ عبدالعلیم خان کا کہنا تھا کہ ادارے اپنی ذمہ داریاں پورکی کریں، کسی جگہ سڑک بند کر کے یا پارک میں شادی کی تقریب خلاف قانون ہے۔ قومی املاک کو نقصان پہنچانے والے مرتکب افراد کو گرفتار کر کے بھاری جرمانہ کیا جائے گا ۔