پشاور(ویب ڈیسک)چیف جسٹس پاکستان جسٹس میاں ثاقب نثار نے خیبرپختونخوا میں مناسب لیباریٹری نہ ہونے کی وجہ سے پشاور کا پانی پنجاب سے ٹیسٹ کرانے کا حکم دے دیا۔چیف جسٹس ثاقب نثار نے سپریم کورٹ پشاور رجسٹری میں دوسرے روز بھی اتائی ڈاکٹروں اورصاف پانی کی فراہمی سمیت مختلف کیسز کی سماعت کی۔ اس دوران چیئرمین ہیلتھ کیئر کمیشن پیش ہوئے۔چیف جسٹس نے چیئرمین ہیلتھ کیئر کمیشن سےاستفسار کیا آپ کی ڈیوٹی ہے کہ ایکشن لیں، آپ تنخواہ کتنی لیتے ہیں؟ چیف جسٹس کے استفسار پر چیئرمین ہیلتھ نے جواب دیا 5 لاکھ روپے، جس پر چیف جسٹس نے ان کی سرزنش کرتے ہوئے کہا تنخواہ آپ کی 5 لاکھ روپے اور کام صفر ہے، ہیلتھ کیئر کمیشن کیا کام کر رہا ہے؟ اگر ہیلتھ کیئر کمیشن کام نہیں کرسکتا تو استعفیٰ دے۔صاف پانی کی فراہمی سے متعلق کیس کی سماعت کرتے ہوئے چیف جسٹس نےہدایت کی کہ پانی بھریں اور لیبارٹری سے چیک کروائیں ،چیف جسٹس نے استفسار کرتے ہوئے کہا آپ کے پاس نہ لیب ہے، نہ اعلیٰ مشینری تو کیسے پانی ٹیسٹ کرواتے ہیں؟ اس کے ساتھ ہی چیف جسٹس نے پشاور کے مختلف مقامات سے پانی کے نمونے لینے کا حکم دیتے ہوئے پشاور کا پانی پنجاب سے ٹیسٹ کروانے کا حکم دے دیا۔

مظفر آباد (ویب ڈیسک ) آزاد جموں و کشمیر میں لائن آف کنٹرول (ایل او سی) پر بھارتی فوجیوں کی فائرنگ سے زخمی ہونے والی پاکستانی لڑکی جاں بحق ہوگئی۔ضلع پونچھ کے ڈپٹی کمشنر راجا طاہر ممتاز نے ڈان کو بتایا کہ 18 اپریل کو بٹل سیکٹر کی تحصیل ہجرا میں ایل او سی سے 200 فٹ دور ایک گھر کی 15 سالہ آمنہ مسکین بھارتی فوجی کی فائرنگ سے زخمی ہو گئی تھی۔انہوں نے مزید بتایا کہ ‘لڑکی صبح 5 بجے اپنے گھر کی صحن میں آئی تو بھارتی فوجیوں نے اسنائپر سے اسے نشانہ بنایا‘۔راجا طاہر نے بتایا کہ زخمی آمنہ مسکین کو اسلا آباد کے ہسپتال میں منتقل کیا گیا لیکن ڈاکٹروں کی کوششوں کے باوجود وہ جانبر نہ ہو سکی بعد ازاں متوفی کی گزشتہ روز تدفین بھی کردی گئی۔واضح رہے کہ بھارتی فوجیوں کی جانب سے مارٹر اور آرٹلری شیلنگ کے علاوہ روزمرہ کے امور انجام دینے والے آباد کاروں کو اسنائپر سے نشانہ بنایا جاتا ہے۔

لاہور (ویب ڈیسک )شاعری میں جداگانہ اسلوب رکھنے والے اردو اور پنجابی زبان کے معروف شاعر منیر نیازی کا آج 90 واں یوم پیدائش منایا جارہا ہے۔9 اپریل 1928 کو مشرقی پنجاب کے ضلع ہوشیارپور کے ایک گاو¿ں میں پیدا ہونے والے منیر نیازی نے بی اے تک تعلیم حاصل کی اور اس کے بعد بھارتی بحریہ میں بھرتی ہوئے لیکن جلد ہی ملازمت چھوڑ کر واپس آگئے۔قیام پاکستان کے بعد آپ لاہور آگئے اور یہاں وہ کئی اخبارات و ریڈیو اور بعد میں ٹیلی ویڑن سے وابستہ رہے اور آپ بیک وقت شاعر، ادیب اور صحافی بھی تھے۔آپ اردو اور پنجابی دونوں زبانوں میں شاعری کرتے تھے اور اردو میں ان کے 13 شعری مجموعے شائع بھی ہوئے، جن میں تیز ہوا اور تنہا پھول، جنگل میں دھنک، دشمنوں کے درمیان شام، سفید دن کی ہوا، سیاہ شب کا سمندر، ماہ منیر، چھ رنگین دروازے، آغاز زمستاں اور ساعت سیار شامل ہیں۔اس کے علاوہ کلیات منیر کی اشاعت بھی ہوئی، جس میں ان کا مکمل کلام شامل ہے جبکہ پنجابی زبان میں بھی ان کے 3 شعری مجموعے شائع ہوئے۔منیر نیازی سرتاپا شاعر تھے اور حقیقت یہ ہے کہ قدرت نے ان کو صرف شاعری کے لیے پیدا کیا تھا۔

پاکستان (ویب ڈیسک) ایپل کے آئی فون مارکیٹ میں دستیاب مہنگے ترین اسمارٹ فونز میں سے ایک ہوتے ہیں مگر کیا آپ اس کمپنی کی سستی ڈیوائس خریدنا پسند کریں گے؟اگر ہاں تو اچھی خبر یہ ہے کہ یہ کمپنی بہت جلد اپنے بجٹ فون آئی فون ایس ای کا نیا ورڑن متعارف کرانے کا ارادہ رکھتی ہے۔مگر آئی فون ایس ای 2 ہی نہیں بلکہ آئی فون ایکس کا سستا ماڈل بھی متعارف کرائے جانے کا امکان ہے۔جی ہاں ایسا آئی فون ایکس جس کی قیمت 550 ڈالرز تک ہوسکتی ہے جس کا گزشتہ سال کا ماڈل 999 ڈالرز سے شروع ہوتا ہے۔ایپل کے حوالے سے مختلف پیشگوئیاں کرنے والی کمپنی کے جی آئی سیکیورٹیز کی جانب سے ایک رپورٹ کے مطابق آئی فون ایکس جیسے متعدد فیچرز والا 6.1 انچ نیا آئی فون متعارف کرایا جاسکتا ہے مگر اس کی قیمت 50 فیصد تک کم ہوگی۔ایپل نے گزشتہ دنوں یور ایشین اکنامک کمیشن میں پیٹنٹ جمع کرایا ہے جس میں 11 مختلف نمبروں کا ذکر ہے۔ایپل کی جانب سے کسی ایک آئی فون کے لیے متعدد ماڈل نمبر دینا عام ہے، تو یہ کہنا تو مشکل ہے کہ یہ کتنے آئی فونز ہوسکتے ہیں مگر وہ کم از کم 2 ضرور ہوسکتے ہیں۔مگر ماہرین کا ماننا ہے کہ ایپل سستے آئی فون ایس ای 2 کو متعارف کرانے کا ارادہ رکھتی ہے جس کا پہلا ورڑن مارچ 2016 میں متعارف کرایا گیا تھا۔دیگر آئی فونز کے برعکس جن کی قیمتوں میں اضافہ ہوتا رہتا ہے ، ایس ای 4 انچ اسکرین کے ساتھ ہے جس کی قیمت 349 ڈالرز سے شروع ہوتی ہے۔