لاہور (ویب ڈیسک)ایک سنگاپورین ٹیوٹر نے تسلیم کیا ہے کہ اس نے سنہ 2016 میں چھ چینی طالب علموں کو نقل کرنے میں مدد فراہم کی تھی جبکہ استغاثہ کا کہنا ہے کہ یہ کام مکمل منصوبہ بندی کے ساتھ کیا گیا تھا۔
استغاثہ کا کہنا ہے کہ ٹین کیا یان نے پرائیویٹ امیدوار کے طور امتحان دیا تھا اور سوالات اپنے ساتھیوں کو فیس ٹائم کے ذریعے بھجوا دیے جنھوں نے طالب علموں کو کال کی اور جواب انھیں پڑھ کر سنائے۔طالب علموں نے امتحانات کے دوران چوری چھپے موبائل فون، بلوٹوتھ ڈیوائسز اورجلد کے رنگ والے ایئر فونز کا استعمال کیا۔ٹین کیا یان پر 27 الزامات عائد کیے گئے ہیں۔ دیگر تین افراد نے نقل کروانے کے الزامات کی تردید کی ہے۔یہ او لیول کے امتحانات تھے جو عموماً 16 سال کی عمر کے طالب دیتے ہیں۔استغاثہ کے مطابق نقل کا یہ منصوبہ اس وقت افشا ہوا جب نگران امتحان نے غور کیا کہ ایک طالب علم سے کچھ غیرمعمولی آوازیں آرہی ہیں۔اس طالب علم کو امتحان کے بعد الگ کیا گیا اور اس کو بنیان اتارنے کا کہا گیا۔ ایک موبائل فون، بلوٹوتھ ڈیوائس اور جلد کا ہم رنگ کانوں میں لگانے والا آلہ برآمد ہوا۔دیگر تین ملزمان میں سینٹر کے پرنسپل پوہ یوان نی اور ان کے دو ساتھی استاد فیونا پوہ من اور فینگ ریوین شامل ہیں۔پوہ یوان نی پر ایک چینی شہری سے 8000 سنگاپورین ڈالر لینے اور زیئس ایجوکیشن سینٹر بھجوائے گئے ہر طالب علم سے 1000 سنگاپورین ڈالر لینے کا الزام ہے۔اگر طالب علم امتحانات میں فیل ہو جاتے تو انھیں یہ رقوم واپس مل جانی تھیں۔

گلاسگو(ویب ڈیسک) اسکاٹ لینڈ میں مرچوں بھری آئس کریم متعارف کرائی گئی ہے، جسے کھانا ہر ایک کے بس کی بات نہیں۔اسکاٹ لینڈ کے شہر گلاسگو میں آلڈوچ (Aldwych) نامی کیفے نے مرچوں والی آئسکریم تیار کی ہے جسے کھا کر جہاں ٹھنڈک کا احساس ہوتا ہے وہیں تیز مرچیں بھی کانوں سے دھواں نکالنے کے لیے کافی ہیں۔اس آئس کریم کا نام Breath of the Devil یعنی ‘شیطان کی سانس’ رکھا گیا ہے۔مالکان کے مطابق اس آئسکریم کا آئیڈیا انہیں اٹلی سے آیا۔کیفے کے مالک مارٹن کے بھائی لی بندونی نے بتایا کہ ‘اٹلی میں ‘ڈیولز برج’ نام کی ایک جگہ ہے، جہاں اٹالین خاندان سال میں ایک دفعہ ملتے ہیں اور ایک دوسرے کو بتاتے ہیں کہ ان کا سال کیسا گزرا’۔انہوں نے بتایا کہ ‘اگر ان افراد میں کوئی ایسا شخص ہوتا، جس نے بہادری کا مظاہرہ کیا ہوتا تو اسے مرچوں والی آئسکریم کھانی پڑتی تھی، یہی وجہ ہے کہ ‘ڈیولز برج’ کی مناسبت سے اس آئسکریم کو ‘بریتھ آف دی ڈیول’ کہا جاتا تھا’۔لی بندونی نے مزید بتایا کہ ‘اس آئسکریم کی ترکیب انتہائی خفیہ ہے اور ہم میں سے بہت کم لوگ اس بارے میں جانتے ہیں’۔تاہم یہاں بتاتے چلیں کہ ہر کوئی یہ آئسکریم نہیں کھا سکتا، بلکہ اسے کھانے کے لیے 18 سال عمر کی شرط رکھی گئی ہے اور اسے کھانے سے پہلے ایک عہد نامے پر دستخط بھی کرنا پڑتے ہیں۔

ممبئی (ویب ڈیسک)قدیم ہندوستان باقی دنیا سے بہت پہلے ٹیکنالوجی کے نئے محاذ پار کر چکا تھا، یہ دعویٰ تو نیا نہیں ہے لیکن پھر بھی ہر نئے ہوشربا ’انکشاف‘ کے بعد سنبھلنے میں تھوڑا وقت تو لگتا ہی ہے۔
اس مرتبہ ٹیکنالوجی کی جنگ میں نیا تیر شمال مشرقی ریاست تریپورہ کے وزیر اعلیٰ بپلب کمار دیو نے چلایا ہے جن کا کہنا ہے کہ انٹرنیٹ قدیم ہندوستان کی ایجاد ہے اور ہزاروں سال پہلے براہ راست نشریات کے لیے استعمال کیا جاتا تھا۔وزیر اعلیٰ نے کمپیوٹروں کے استعمال پر ایک کانفرنس سے خطاب کرتے ہوئے کہا کہ مہا بھارت کی جنگ کے دوران سنجے نے دھرت راشٹر کو جنگ کا آنکھوں دیکھا احوال سنایا تھا جس سے ثابت ہوتا ہے کہ اس وقت انٹرنیٹ بھی تھا اور سیٹلائٹ بھی۔ہندوو¿ں کا خیال ہے کہ مہا بھارت کی جنگ پانچ ہزار سال پہلے ہوئی تھی۔وزیر کا کہنا ہے کہ مہا بھارت کی جنگ کے دوران سنجے نے دھرت راشٹر کو جنگ کا آنکھوں دیکھا احوال سنایا تھا جس سے ثابت ہوتا ہے کہ اس وقت انٹرنیٹ بھی تھا اور سیٹلائٹ بھی اس سے پہلے یہ دعویٰ بھی کیا گیا تھا کہ ہوائی جہاز بھی انڈیا میں ہی ایجاد کیے گئے تھے۔
اس پس منظر میں ماہر اقتصادیات کوشک باسو نے ٹوئٹر پر کہا ہے کہ قوم پرستی اور مذہبی قدامت پسندی میں حد سے گزر جانے والوں کا مسئلہ یہ ہے کہ فلسفہ، ریاضی، سائنس اور ادب کے مطالعے میں وقت صرف کرنے کی بجائے وہ یہ ثابت کرنے میں اپنا وقت گزارتے ہیں کہ انڈیا میں پانچ ہزار سال پہلے لوگ سائنس اور فلسفہ پڑھتے تھے۔ٹوئٹر اور فیس بک کی ایجاد کے بارے میں تو فی الحال کوئی دعویٰ نہیں کیا گیا لیکن سوشل میڈیا کی ایجاد بھلے ہی مغربی دنیا میں ہوئی ہو لیکن لوگ اپنی رائے ظاہر کرنے سے کہاں باز آتے ہیں۔سینیئر وکیل سنجے ہیگڑنے نے ٹوئٹر پر لکھا: ’تریپورہ، مبارک ہو آپ نے مانک سرکار کے مقابلے میں بپلب داس کی بصارت کو ترجیج دی۔ (مانک سرکار لمبے عرصے سے تریپورہ کے وزیر اعلیٰ تھے لیکن مارچ میں ان کی پارٹی الیکشن ہار گئی تھی۔)امریکہ کی رٹگرز یونیورسٹی میں جنوبی ایشیا کی تاریخ کی نائب پروفیسر اوڈرے ٹروشکے نے ٹوئٹر پر یک بعد دیگرے پیغامات میں کہا ہے کہ مہا بھارت کے کردار ٹیکنالوجی کا زیادہ بہتر استعمال کر سکتے تھے اور (بھگوان) کرشن بھگوت گیتا کی فیس بک پر لائیو سٹریمنگ کر سکتے تھے۔
سپریم کورٹ کے سینیئر وکیل پرشانت بھوشن نے وزیر اعظم اور وزیر اعلیٰ کے دعووں کا ذکر کرتے ہوئے کہا ہے کہ انھیں نوبیل انعام دیا جانا چاہیے لیکن یہ واضح نہیں ہے کہ وہ ایجاد کرنے والوں کو انعام دلوانا چاہتے ہیں یا دعویٰ کرنے والوں کو۔بپلب دیو کی حمایت میں بہت سے لوگوں نے اپنی رائے ظاہر کی ہے۔کھیم چند شرما لکھتے ہیں: ’ہم وزیر اعلیٰ کی بھر پور حمایت کرتے ہیں۔ ویدک سائنس کی طاقت کا سب اعتراف کرتے ہیں، ہالی وڈ کی مشہور فلم ’اوتار‘ بنانے والوں نے بھی ہندوو¿ں کی قدیم کتابوں سے تحریک حاصل کی تھی بس ہم بھول گئے ہیں اس لیے دوبارہ تحقیق کی ضرورت ہے۔‘جب یہ تحقیق مکمل ہو جائے تو یہ بھی معلوم کرنا چاہیے کہ انٹرنیٹ ایجاد چاہے کسی کی بھی ہو، اس کی رفتار اب بھی اتنی سست کیوں ہے؟