پشاور (مانیٹرنگ ڈیسک) پشاور کے حلقہ 08 سے نتخب رکن خیبر پختونخوا اسمبلی ارباب محمد وسیم خان پی ٹی آئی میں شامل ہو گئے۔ پاکستان تحریک انصاف نے اپنے سوشل میڈیا اکاﺅنٹ پر ارباب وسیم حیات کی پارٹی جوائن کرنے کی تفصیلات شیئرکی جس میں ان کا کہنا تھا پشاور سے تعلق رکھنے والے اکیلے مسلم لیگ ن کے ایم پی اے پی ٹی آئی میں شامل ہو گئے ہیں۔ ارباب وسیم نے پاکستان تحریک انصاف کو جوائن کرنے کا اعلان وزیراعلیٰ ہاﺅس میں کیا۔ اس موقع پر ان کا کہنا تھاکہ مسلم لیگ ن پاکستان نہیںبلکہ مسلم لیگ پنجاب ہے جس نے گزشتہ پانچ سال سے ہمارے صوبے میں کوئی کام نہیں کیا۔

لیہ(سٹی رپورٹر)الیکشن سے قبل ابن الوقت سیاستدانوں کی اڈاریاں ، پی پی پی کے ایم پی اے کی اڑان کے بعد لیگی ایم پی اے بھی اڑان کےلئے تیار ، ہمیشہ کی طرح اس بار بھی الیکشن سے قبل ابن الوقت سیاستدانوں نے اپنی وفاداریاں تبدیل کرنے کا سلسلہ شروع کردیاہے۔گزشتہ دنوں پاکستان پیپلزپارٹی کے ایم پی اے سردار شہاب الدین خان نے پارٹی کو خیرباد کہتے ہوئے پاکستان تحریک انصاف میں شمولیت اختیار کرلی ہے جبکہ لیہ سٹی حلقہ 266سے مسلم لیگ ن کے ایم پی اے چودھری اشفاق احمد نے بھی اڑان کی تیار کرلی ہے۔ذرائع کے مطابق لیگی ایم پی اے چودھری اشفاق احمد کے پاکستان پیپلزپارٹی کی مقامی قیادت سے متعدد ملاقاتیں ہوچکی ہیں۔ملاقاتوں میں لیگی ایم پی اے نے قومی اسمبلی کی نشست پر پاکستان پیپلزپارٹی کے پلیٹ فارم سے الیکشن میں حصہ لینے کی خواہش ظاہرکی ہے جس پر مقامی قیادت ن ے اعلیٰ قیادت سے مشاورت کے بعد حتمی فیصلہ کا عندیہ دیا ہے۔لیگی ایم پی اے چودھری اشفاق نے غلہ منڈی میں قائم پبلک سیکرٹریٹ سے آفس میں لگے لیگی جھنڈے اور قائدین کی تصاویر کے ساتھ ساتھ مسلم لیگ ن کے پینا فلیکس بھی اتارلیے ہیں جبکہ سوشل میڈیا پر لیگی ایم پی اے کے بھائیوں اور حلقہ احباب نے چودھری اشفاق کو بطور امیدوار ایم این اے کی پوسٹیں بھی شیئر کردی ہیں۔ضلعی جنرل سیکرٹری پاکستان پیپلزپارٹی ڈاکٹر جاوید اقبال کنجال نے لیگی ایم پی اے سے ملاقاتوں کی تصدیق کرتے ہوئے کہاکہ ہم پارٹی میں شمولیت کرنے والے تمام سیاستدانوں خوش آمدید کہیں گے جبکہ ٹکٹ کا فیصلہ اعلیٰ قیادت کرے گی۔چودھری اشفاق احمد نے متعدد بار رابطہ کی کوشش کی گئی مگر انہوںنے کال اٹینڈ نہیں کی۔
اڑان

اسلام آباد(صباح نیوز) محکمہ موسمیات نے ملک بھر میں بارشوں کی خوشخبری سنا دی ، آج (پیر)سے ملک کے مختلف علاقوں میں تیز ہواﺅں اور بارشوں کا امکان ہے ، بارشوں کا یہ سلسلہ جمعہ تک جاری رہے گا۔ محکمہ موسمیات نے ایک بار پھر ملک بھر میں بارشوں اور تیز ہواﺅں کی نوید سنا تے ہوئے کہا ہے کہ (آج ) پیر سے آئندہ جمعہ تک ملک کے مختلف اضلاع میں تیزہواﺅں اور بارشوں کا امکان ہے۔محکمہ موسمیات کے مطابق اسلام آباد، پنجاب، کوئٹہ، ژوب، قلات، خیبرپختونخوا، فاٹا، کشمیراورگلگت بلتستان میں میں بارشیں متوقع ہیں۔ جبکہ اسلام آباد، راولپنڈی، گوجرانوالہ ، سرگودھا، لاہور میں کہیں کہیں گرج چمک اور تیز ہواﺅں کے ساتھ بارشیں ہوسکتی ہیں۔ خیبر پختونخوا کے مختلف علاقوں میں موسلادھار بارشوں اور ژالہ باری کی وجہ سے پہاڑی علاقوں میں لینڈ سلائیڈنگ کے خدشات ہیں لہذا مقامی لوگ اور انتظامیہ نقصانات سے بچنے کیلئے احتیاطی تدابیر اختیار کریں۔کراچی کے حوالے سے محکمہ موسمیات کا کہنا ہے کہ گرمی کی شدت برقرار رہے گی، شہر میں جنوب مغربی علاقوں سے ہلکی رفتار میں ہوائیں چل رہی ہیں جب کہ ہوا میں نمی کا تناسب 81 فیصد ہے۔

لاہور(کرائم رپورٹر)جسٹس اعجاز الاحسن کے گھر پرفائرنگ کا معاملہ ، چار رکنی تحقیقاتی ٹیم تشکیل، ڈی آئی جی انوسٹی گیشن چوہدری سلطان احمد تحقیقاتی ٹیم کے سربراہ مقرر،دیگر ارکان میں ایس ایس پی انوسٹی گیشن لاہور ، ایس پی سی آئی اے ، ایس پی انویسٹی گیشن ماڈل ٹاﺅن شامل ہیں۔ ذرائع کے مطابق جسٹس اعجاز الاحسن کے گھر پر فائرنگ کے بعد آئی جی پنجاب کی طرف سے4رکنی تحقیقاتی ٹیم تشکیل دیدی گئی ہے جس کے سربراہ ڈی آئی جی انوسٹی گیشن چوہدری سلطان احمد کو مقرر کیا گیا ہے جبکہ دیگر اراکین میں ایس ایس پی انویسٹی گیشن غلام مبشر میکن ، ایس پی سی آئی اے ندیم عباس ایس پی انویسٹی گیشن ماڈل ٹاﺅن شاکر احمد شاہدشامل ہیں ۔ ٹیم اپنی تحقیقات مکمل کر کے آئی جی پنجاب کو رپورٹ پیش کرے گی ۔

اسلام آباد (آئی این پی) احتساب عدالت میں سابق وزیراعظم نواز شریف‘ مریم نواز اور کیپٹن صفدر کے لاف فیلڈ ریفرنس (لندن فلیٹس) کی سماعت آج ہوگی۔ استغاثہ کے گواہ واجد ضیاءپر مریم نواز اور کیپٹن صفدر کے وکیل امجد پرویز جرح کرینگے۔ کیس کی سماعت احتساب عدالت کے جج محمد بشیر کرینگے۔ نواز شریف‘ مریم نواز اور کیپٹن صفدر عدالت میں پیش ہونگے۔ کیس کی سماعت کے موقع پر جوڈیشل کمپلیکس کی سکیورٹی کو سخت کر دیا جائے گا۔ پولیس کی معاونت کیلئے ایف سی کے دستے تعینات کیے جائیں گے۔

اسلام آباد (ناصر کاظمی) سپریم کورٹ کے جسٹ اعجاز الاحسن لاہور میں واقع رہائش گاہ پر فائرنگ کے واقعہ کے باجود آج اسلام آباد کی پرنسپل سیٹ پر مقدمات کی سماعت میں شریک ہوں گے، وہ چیف جسٹس آف پاکستان میاں ثاقب نثار کی سربراہی میں جسٹس شیخ عظمت سعید کے ساتھ تین رکنی بنچ میں شامل ہوں گے، جو کمرہ نمبر ایک میں اہم مقدمات کی سماعت کرے گا، چیف جسٹس کی سربراہی میں جسٹس شیخ عظمت سعید اور جسٹس اعجازالاحسن پر مشتمل تین رکنی بنچ اسلام آبا دکے مختلف علاقوں میں قائم غیر قانونی شادی ہالز سے متعلق ازخود نوٹس کیس کے علاوہ میڈیا کمیشن رپورٹ کیس، چئیرمین پی ٹی آئی عمران خان کی جانب سے 2011ءمیں انتخابی فہرستوں سے جعلی ووٹ نکالنے سے متعلق درخواست اور دیگر کئی اہم مقدمات کی سماعت کرے گا،واضح رہے کہ ہفتہ اور اتوار کی درمیانی شب اور اتوار کی صبح کو نامعلوم افراد کی جانب سے جسٹس اعجالازالاحسن کے لاہور ماڈل ٹاﺅن میں واقعہ گھر پر دو فائر ہوئے، اطلاع پر چیف جسٹس آف پاکستان میاں ثاقب نثار ان کی رہائش گاہ پر پہنچ گئے اور پولیس حکام کو طلب کرلیاتھا ،فائرنگ کے واقعہ سے ججز اور وکلاءمیں سخت تشویش پائی جاتی ہے۔