پشاور (ویب ڈیسک) خیبرپختونخواہ اسمبلی میں احتساب کمیشن ختم کرنے کا بل منظورکرلیا گیا ہے جس کے بعد اب ملازمین کی نوکریاں ختم کردی جائیں گی۔تفصیلات کے مطابق خیبر پختونخواہ اسمبلی کے آج ہونے والے اجلاس میں صوبائی وزیر قانون سلطان محمد کی جانب سے احتساب کمیشن کے خاتمے کا بل پیش کیا گیا۔صوبائی اسمبلی نے احتساب کمیشن کے خاتمے کا بل کثرت ِ رائے سے منظور کرتے ہوئے اس کے تمام اثاثے اینٹی کرپشن کے حوالے کرنے کافیصلہ کیا ہے۔بل کے مطابق احتساب کمیشن کے کنٹریکٹ ملازمین کی نوکریاں ختم ہوجائیں گی اور مستقل ملازمین کوسرپلس پول میں رکھاجائےگا جبکہ مستقل ملازمین کو گولڈن ہینڈ شیک دینے کی تجویز پر بھی غور کیا جارہا ہے۔واضح رہے کہ قوانین کے مطابق احتساب کمیشن پانچ کروڑ سے زائد کی کرپشن پر ہی کارروائی کرسکتا تھا ، اس سے کم پر کارروائی کا دائرہ اختیار اینٹی کرپشن کا تھا۔ اب احتساب کمیشن کو ختم کرنے سے اینٹی کرپشن کا دائرہ اختیار بڑھانا ہوگا تاکہ وہ پانچ کروڑ سے زائد کی کرپشن کے خلاف بھی کارروائی کرسکے۔خیبر پختونخواہ کے محکمہ اینٹی کرپشن کی استعداد بڑھانے کیلئے احتساب کمیشن کے تمام تر اثاثے بھی بل کے ذریعے اینٹی کرپشن کے حوالے کئے جا رہے ہیں۔

گھوٹکی(ویب ڈیسک)وزیراعلیٰ سندھ مراد علی شاہ نے وزیراعظم عمران خان پر تنقید کرتے ہوئے کہا ہےکہ اگر عمران خان کو مسلط کرنا تھا تو حکومت کرنا ہی سکھادیتے۔گھوٹکی میں جلسے سے خطاب کرتے ہوئے مراد علی شاہ نے وفاقی حکومت کو تنقید کا نشانہ بنایا۔انہوں نے کہا کہ جب حکومت نہیں چلاسکتے تو یہی کرتے ہیں جو کررہے ہیں، یہ سو دن یا جتنے دن بھی رہیں، ان سے کچھ نہیں ہوگا، سندھ کے لوگوں سے دشمنی کی جارہی ہے، صرف پیپلزپارٹی ہی آکر لوگوں کی خدمت کرے گی۔وزیراعلیٰ سندھ کا کہنا تھا کہ وفاقی حکومت نے دو تین ماہ میں اپنا کام ظاہر کردیا ہے، عمران خان کو مسلط کرنا تھا تو حکومت کرنا تو سکھا دیتے، عمران خان کو ان کی بیوی یاد دلاتی ہیں کہ وہ وزیراعظم ہیں، تو پیرنی سے کہو انہیں بتا بھی دے کہ حکومت کیسے کرتے ہیں۔

راولپنڈی (ویب ڈیسک ) آرمی چیف جنرل قمر جاوید باجوہ نے 22 دہشتگردوں کی سزائے موت کی توثیق کردی۔آئی ایس پی آر کے مطابق آرمی چیف کی جانب سے جن 22 دہشتگردوں کی سزائے موت کی توثیق کی گئی ہے وہ سنگین نوعیت کی کارروائیوں میں ملوث تھے۔ سزائے موت پانے والے دہشتگردوں 176سکیورٹی اہلکاروں اورشہریوں کوشہیدکیا۔ ان کی کارروائیوں میں 217 شہری اور اہلکار زخمی بھی ہوئے ہیں۔آئی ایس پی آر کے مطابق آرمی چیف نے 15 دہشتگردوں کو قید کی سزا کی توثیق بھی کی ہے جبکہ دہشتگردی کے الزام میں گرفتار 2 ملزمان کو بری بھی کیا گیا ہے۔ تمام دہشتگردوں کو فوجی عدالتوں نے سزائیں سنائی تھیں۔

اسلام آباد (ویب ڈیسک) وزیر اعظم عمران خان کا کہنا ہے کہ ملکی تاریخ کا سب سے بڑا غربت مٹاو¿ پروگرام لے کر آ رہے ہیں۔ منی لانڈرنگ کسی صورت برداشت نہیں کی جائے گی ، منی لانڈرنگ کرنے والوں کی چیخیں سن رہاہوں۔اکنامک رپورٹرز سے گفتگو کرتے ہوئے وزیر اعظم عمران خان نے کہاکہ ملک میں کسی قسم کاکوئی بحران نہیں بلکہ چیلنجز کا سامنا ہے، تمام مسائل کی وجہ بد انتظامی ہے۔ ملکی تاریخ کا سب سے بڑا غربت مٹاو¿ پروگرام لے کر آ رہے ہیں۔انہوں نے کہا کہ ڈالر کےلئے آئی ایم ایف پروگرام کی ضرورت نہیں اور نہ ہی آئی ایم ایف سے ڈکٹیشن لیتے ہیں۔ منی بجٹ عوام دشمن نہیں ہوگا، اس میں کاروبار کا فروغ چاہتے ہیں۔وزیر اعظم نے واضح کیا کہ منی لانڈرنگ کسی صورت برداشت نہیں کی جائے گی اور منی لانڈرنگ کرنے والوں سے رعایت نہیں برتی جائے گی۔ ڈالر کی سمگلنگ کرنے والے اپنے دن گننا شروع کردیں۔ منی لانڈرنگ کیخلاف تاریخ کی سب سے بڑی کارروائی کی جارہی ہے، منی لانڈرنگ کرنے والوں کی چیخیں سن رہاہوں۔عمران خان کا کہنا تھا کہ ایف اے ٹی ایف کے تمام اقدامات پاکستان کے حق میں ہیں۔ ایف اے ٹی ایف منی لانڈرنگ روکنے کا کہتا ہے ، وہ مسلح گروپوں کی روک تھام چاہتاہے، مسلح گروپوں کاخاتمہ نیشنل ایکشن ٹاسک فورس کابھی مطالبہ ہے۔

لاہور (ویب ڈیسک) راحیل شریف جلد پاکستان کے صدر کا عہدہ سنبھال لیں گے، روحانی پیشوا کا دعویٰ ہے کہ پاکستان میں صدارتی نظام نافذ ہو جائے گا جبکہ سابق آرمی چیف کو  ملک کا صدر بنا دیا جائے گا۔ تفصیلات کے مطابق پاکستان کے سابق آرمی چیف راحیل شریف کی پاکستان کی سیاست میں انٹری سے متعلق آئے روز کوئی نہ کوئی خبر سامنے آتی رہی ہے۔تاہم راحیل شریف نے کبھی بھی پاکستان کی سیاست میں انٹری سے متعلق کسی قسم کی خواہش کا اظہار نہیں کیا۔ پاکستان کے سب سے مقبول آرمی چیف قرار دیے جانے والے راحیل شریف ان دنوں سعودی عرب میں قیام پذیر ہیں۔ سابق آرمی چیف راحیل شریف سعودی عرب میں اسلامی اتحادی فوج کے کمانڈر ان چیف کا عہدہ سنبھالے ہوئے ہیں۔راحیل شریف کو پاکستان میں دہشت گردوں کیخلاف تین برس کے اندر کامیاب جنگ لڑنے اور ملک میں بہت حد تک امن کے قیام کا کریڈٹ دیا جاتا ہے۔ب راحیل شریف کی پاکستانی سیاست میں انٹری سے متعلق قومی اخبار  کی ایک رپورٹ میں دلچسپ دعویٰ کیا گیا ہے۔ قومی اخبار کی ایک رپورٹ کے مطابق پیر پنجر نے راحیل شریف کے صدر پاکستان بننے کی پیشن گوئی کی ۔ پیر پنجر نے پیشن گوئی کی ہے کہ پاکستان میں جلد صدارتی نظام حکومت نافذ کر دیا جائے گا۔ جبکہ سابق آرمی چیف راحیل شریف پاکستان واپس آئیں گے اور انہیں صدر پاکستان بنا دیا جائے گا۔ جبکہ دوسری جانب پیپلز پارٹی کے کچھ سینئر رہنما بھی گزشتہ کچھ روز کے دوران یہ کہہ چکے ہیں کہ انہیں پاکستان صدارتی نظام حکومت کی جانب بڑھتے ہوئے دکھائی دے رہا ہے۔ اس حوالے سے پیپلز پارٹی کے سینیٹرر فرحت اللہ بابر نے دعویٰ کیا تھا کہ انہیں ایسا لگ رہا ہے کہ پاکستان میں پارلیمانی نظام حکومت ختم کرکے صدارتی نظام حکومت نافذ کر دیا جائے گا۔

کراچی(ویب ڈیسک) متحدہ قومی موومنٹ کے سابق رہنما اور سابق رکن اسمبلی علی رضا عابدی کے قتل میں اہم پیش رفت ہوئی ہے ، حملہ ا?وروں کی شناخت ہوگئی ہے جبکہ ایک اہم ملزم کو ایئرپورٹ سے بیرون ملک فرار ہونے کی کوشش کرتے ہوئے گرفتار کرلیا گیا۔ حراست میں لیے جانے والے ملزم نے دورانِ تفتیش ملزم کی نشاندہی پر کراچی کے مختلف علاقوں میں چھاپے مار کر مزید تین افراد کو حراست میں لیا گیا ہے۔ گرفتار ہونیوالے یہ چاروں افراد کسی نہ کسی طرح علی رضا عابدی کے قتل سے منسلک ہیں، زیر حراست تمام افراد سے تفتیش جاری ہے اور انہیں نامعلوم مقام پر منتقل کیا گیا ہے۔قانون نافذ کرنےوالےادارے سی سی ٹی وی فوٹیج کو تکنیکی مدد سے واضح کر کے ملزمان تک پہنچے ہیں،سی سی ٹی وی فوٹیج کی مددسےملزمان کےچہرےشناخت کرلیےگئے ہیں۔ذرائع کا کہنا ہے کہ تیس بورپستول سے دس دسمبر کو لیاقت ا?باد میں احتشام نامی نوجوان کو قتل کیا گیا تھا، اسی پستول سے علی رضا عابدی کو بھی نشانہ بنایا گیا ہے۔لیاقت آباد میں قتل ہونے والے احتشام نامی نوجوان جرائم پیشہ شخص کے بارے میں پتا چلا ہے کہ وہ عرفان نامی ایک شخص کی سابقہ اہلیہ سے شادی کرنا چاہتا تھا۔احتشام کے قتل میں عرفان کے ملوث ہونے کے شبہات ہیں، قوی امکان ہے کہ یہ کام عرفان نے کرائے کے قاتلوں کے ذریعے انجام دیا تھا۔ احتشام کے قتل والے واقعے کے بعد سے عرفان غائب ہے اور پولیس کو اطلاعات ہیں کہ وہ ایران چلا گیا ہے۔یاد رہے کہ سندھ پولیس علی رضا عابدی کے قتل کی تحقیقات میں جدید ذرائع کو استعمال کرتے ہوئے آگے بڑھ رہی ہے، ان کے قتل میں استعمال ہونے والے اسلحے کے قتل کے ایک اور واقعے میں بھی استعمال ہونے کے شواہد پہلے ہی مل چکے ہیں۔

اسلام آباد (ویب ڈیسک) پاکستان مسلم لیگ (ق) کے سربراہ چوہدری شجاعت حسین نے وزیراعظم عمران خان سے ملاقات کی ہے جس میں اپوزیشن کے منفی روئیے کا مقابلہ کرنے سے متعلق تبادلہ خیال کیا گیا۔تفصیلات کے مطابق سینئر سیاستدان اور سابق وزیراعظم چوہدری شجاعت حسین نے وزیراعظم عمران خان سے ملاقات کی جس دوران سپیکر پنجاب اسمبلی چوہدری پرویز الٰہی اور ممبر قومی اسمبلی چوہدری مونس الٰہی بھی موجود تھے۔ ذرائع کے مطابق ملاقات کے دوران دونوں جماعتوں میں تعاون بڑھانے پر زور دیا گیا جبکہ اپوزیشن کے منفی روئیے کا مقابلہ کرنے سے متعلق بھی تبادلہ خیال کیا گیا۔