لاہور (نیااخبار رپورٹ) مسلم لیگ ن کے صدر نواز شریف کے گزشتہ روز مری میں قریبی ساتھیوں سے مستقبل کے لائحہ عمل کے حوالے سے خصوصی مشاورت کی۔ پیر کے روز مری میں اپنی رہائشگاہ پر منعقدہ مشاورتی اجلاس میں انہوں نے نیب عدالت میں آج پیشی، سینٹ کی ٹکٹوں کی تقسیم اور 10 فروری کو چترال میں جلسہ کے حوالے سے صلاح مشورے کئے۔ اجلاس میں مریم نواز، پرویز رشید، طارق فاطمی اور سلیم ضیاءنے شرکت کی۔ معلوم ہوا ہے کہ نیب عدالت میں جاری کیس کے متوقع فیصلہ کے بارے اور اس پر مسلم لیگ ن کے رد عمل پر منصوبہ بندی کی گئی۔ نواز شریف نے ساتھیوں کو یقین دلایا کہ سینٹ میں مسلم لیگ ن کے ایسے امیدوار کامیاب کرائے جائیں گے جو ن لیگ کی قانونی و سیاسی جدوجہد میں مددگار ثابت ہو سکیں۔ انہوں نے کہا مسلم لیگ ن کی عوام میں پذیرائی بڑھ رہی ہے، چترال میں 10 فروری کو ہونے والے جلسہ کی بھی بھرپور تیاریاں کی جائیں تا کہ عوامی دباﺅ بڑھایا جا سکے۔

اسلام آباد: سپریم کورٹ نےکوہاٹ میں میڈیکل کالج کی طالبہ عاصمہ رانی کے قتل کی ازخود نوٹس کیس کی سماعت کے دوران پاکستان تحریک انصاف (پی ٹی آئی) کے ترجمان فواد چوہدری کو فوری طلب کرلیا۔چیف جسٹس آف پاکستان میان ثاقب نثار کی سربراہی میں سپریم کورٹ کا 3 رکنی بنچ عاصمہ رانی قتل کے ازخود نوٹس کیس کی سماعت کررہا ہے۔سماعت کے دوران چیف جسٹس نے ترجمان تحریک انصاف فواد چوہدری کو فوری طلب کرلیا۔چیف جسٹس نے ریمارکس دیئے کہ ‘فواد چودھری کہتے ہیں کہ ہماری پولیس بہت مثالی ہے، انہیں طلب کر لیتے ہیں تاکہ پتا چلے کہ خیبرپختونخوا کی پولیس کتنی مثالی پولیس ہے’۔سماعت کے دوران ڈائریکٹر جنرل فیڈرل انویسٹی گیشن ایجنسی (ایف آئی اے) بشیر میمن نے عدالت عظمیٰ کو بتایا کہ ‘ملزم مجاہد آفریدی دبئی میں ہے یا سعودیہ عرب میں معلوم نہیں’۔ساتھ ہی انہوں نے بتایا کہ ‘یہ تو لگتا ہے کہ ملزم نے مکمل منصوبہ بندی کے ساتھ قتل کیا’۔

اسلام آباد(ویب ڈیسک)سپریم کورٹ میں الیکشن ایکٹ 2017 میں ترمیم کے خلاف 6 درخواستوں پر سماعت کے دوران سابق وزیراعظم نواز شریف کی طرف سے کوئی پیش نہ ہوا جس پر عدالت عظمیٰ نے یکطرفہ کارروائی کرنے کا فیصلہ سنا دیا۔چیف جسٹس آف پاکستان میاں ثاقب نثار کی سربراہی میں سپریم کورٹ کا تین رکنی بنچ مذکورہ کیس کی سماعت کر رہا ہے۔سماعت کے دوران مسلم لیگ (ن) کے رہنما راجہ ظفرالحق پیش ہوئے اور عدالت عظمیٰ کو آگاہ کیا کہ سابق وزیراعظم نواز شریف نے اس کیس میں فریق بننے سے انکار کردیا ہے۔نواز شریف کی جانب سے موقف اختیار کیا گیا کہ یہ بل پارلیمنٹ نے پاس کیا اور انہیں ان کی پارٹی نے بطور پارٹی صدر منتخب کیا، انہوں نے کوئی درخواست نہیں دی تھی لہذا وہ اس کیس میں فریق نہیں بننا چاہتے۔جس پر جسٹس ثاقب نثار نے کہا کہ اگر نواز شریف حصہ نہیں بننا چاہتے تو یکطرفہ کارروائی جاری رکھیں گے۔چیف جسٹس نے مزید کہا کہ پبلک نوٹس جاری کردیا تھا جو انہوں (نواز شریف) نے وصول بھی کرلیا، اگر وہ کارروائی کا حصہ نہیں بننا چاہتے تو ان کی اپنی مرضی۔اس موقع پر چیف جسٹس نے لیگی رہنما راجہ ظفر الحق سے مکالمہ کرتے ہوئے کہا کہ وہ وعدہ ہی کیا جو وفا ہو۔

اسلام آباد(ویب ڈیسک) محکمہ موسمیات کا کہنا ہے کہ جمعے کے روز سے ملک بھر کے مختلف علاقوں میں بارشوں اور برفباری کا نیا سلسلہ شروع ہوجائے گا۔ محکمہ موسمیات نے پیش گوئی کی ہے کہ آئندہ جمعے سے ملک بھر میں موسم میں تبدیلی کا امکان ہے اور 9 فروری سے 13 فروری تک پاکستان کے مختلف علاقوں میں بارشیں اور برفباری ہوسکتی ہے۔محکمہ موسمیات کے مطابق 9 فروری سے ہواو¿ں کا سلسلہ ملک کے مغربی علاقوں میں داخل ہوجائے گا جس کے باعث بارشوں کا امکان بڑھ گیا ہے، پیر اور منگل کو مری و گلیات میں شدید برفباری ہوگی جب کہ جمعہ سے منگل تک بلوچستان کے بیشتر علاقوں میں موسلا دھار بارشیں اور کوئٹہ اور قلات ڈویڑن میں برفباری کا امکان ہے۔محکمہ موسمیات کا کہنا ہے کہ اتوار سے منگل تک کوہاٹ، مردان اور مالاکنڈ ڈویڑن میں، پیر اور منگل کو گوجرانوالہ، سرگودھا اور اسلام آباد میں موسلا دھار بارشوں، اتوار سے بدھ تک کشمیر اور گلگت بلتستان میں بارشوں اور پہاڑوں پر برفباری جب کہ مالاکنڈ اور ہزارہ ڈویڑن کے پہاڑوں پر شدید برفباری متوقع ہے۔دوسری جانب کراچی کا درجہ حرارت مزید 2 ڈگری سینٹی گریڈ گر گیا ہے، منگل کے روز کم سے کم درجہ حرارت 11 ڈگری سینٹی گریڈ ریکارڈ کیا گیا۔ 20 کلومیٹر فی گھنٹہ کی رفتار سے شمال مشرقی سمت سے چلنے والی ہوائیں چل رہی ہیں جب کہ ہوا میں نمی کا تناسب 35 فیصد ریکارڈ کیا گیا ہے۔محکمہ موسمیات کے ریجنل ڈائریکٹر شاہد عباس نے کہا ہے کہ کراچی میں موسم سرما کا دورانیہ یکم دسمبر تا 31مارچ تک ہے، آئندہ ایک ہفتے کے دوران کسی بڑی موسمی تبدیلی کا کوئی امکان نہیں تاہم فروری کے وسط اور مارچ کے اوائل میں مغربی سسٹم کراچی پر اثر اند از ہوسکتے ہیں اور اس دوران کراچی میں بارش کا امکان بھی دیکھ رہے ہیں۔

اسلام آباد (خصوصی رپورٹ)روس نے پاکستان کو مسافر بردار طیارے فروخت کرنے کی پیشکش کی اور اس ضمن میں ایک خصوصی طیارہ SSJ 100 اسلام آباد بھیجا ہے جس کا مشیر ہوا بازی سردار مہتاب نے معائنہ کرکے مشاورت کیلئے وقت مانگا ہے۔ شہری ہوا بازی کے ذرائع کے مطابق روس نے دنیا کا ایک جدید ترین درمیانی جسامت کا جیٹ طیارہ تیار کر لیا ہے جس میں سو نشستیں ہیں جب کہ روسی طیارہ ساز کمپنی سخوئی سپر جیٹ 100 نے اپنا جدید ترین طیارہ گزشتہ روز خصوصی انتظام کے ساتھ بینظیر انٹرنیشنل ایئرپورٹ پر لینڈ کرایا۔ خصوصی طیارے میں روسی طیارہ ساز کمپنی کے سنیئر عہدیدار روسی حکام بھی آئے، بینظیر بھٹو انٹرنیشنل ایئرپورٹ پروزیراعظم پاکستان کے خصوصی مشیر برائے ایوی ایشن ڈویژن سردار مہتاب خان نے اپنی ٹیم کے ہمراہ طیارے کا معائنہ کیا۔ وسی کمپنی کے چیف ایگزیکٹو سے سردار مہتاب خان اور ان کے رفقا کو جن میں وفاقی سیکرٹری ایوی ایشن ڈویژن عرفان الٰہی پی آئی اے کے چیف ایگزیکٹو آفیسر مشرف رسول پی آئی اے کے سنیئر پائلٹ سول ایوی ایشن اتھارٹی کے عہدیدار نے روسی وفد سے اس طیارے کے بارے میں مذاکرات کئے فریقین نے ایک دوسرے سے استفسارات کا جامع تسلی بخش جواب دیا۔ پاکستانی ٹیم کے سربراہ سردار مہتاب خان عباسی نے روسی وفد کے سربراہ سے کہا کہ ہمارے ماہرین اس طیارے کے تمام پہلوﺅں اور اپنی ضروریات کا ملحوظ رکھ کر حتمی فیصلہ کرینگے، اس کے ٹیکنیکل پہلوﺅں کا مطالعہ کرینگے۔روسی وفد نے وزیراعظم پاکستان کے مشیر برائے ایوی ایشن ڈویژن کے خیالات سے مکمل اتفاق کیا اور کہا کہ اپنے دوست ملک پاکستان کی قومی فضائی کمپنی پی آئی اے کے فضائی بیڑے میں پہلی بار روسی ساختہ مسافر بردار جیٹ طیارے کی شمولیت کے دل و جان سے خواہاں ہیں۔

اسلام آباد (خصوصی رپورٹ) گلگت بلتستان میں نرسنگ کے شعبہ پر حکمرانوں کی توجہ نہ ہونے کے باعث تقریباً 15 لاکھ کی آبادی کیلئے 56 تربیت یافتہ نرسز موجود ہونے کا انکشاف ہوا ہے۔ گلگت بلتستان میں علاج و معالجہ کیلئے اس وقت محض 463 ڈاکٹرز،34ڈینٹسٹ اور 56 نرسز موجود ہیں۔ بین الاقوامی معیار کے مطابق کسی بھی ملک کے شہریوں کو علاج و معالجہ کی بہترین سہولیات کی فراہمی کو یقینی بنانے کیلئے فی 1000 آبادی کیلئے دو ڈاکٹرز، ایک ڈینٹس اور آٹھ نرسز کا ہونا ضروری ہے لیکن اس کے برعکس اس وقت گلگت بلتستان میں فی تین ہزار 239 افراد کیلئے محض ایک ڈاکٹر دستیاب ہے جبکہ اس کے علاوہ 44 ہزار 117 افراد کیلئے ایک ڈینٹس اور 26 ہزار 785 افراد کیلئے محض ایک تربیت یافتہ نرس ہے۔ اس ضمن میں گلگت بلتستان کی محکمہ صحت کے ذمہ داران سے رابطہ کیا تو انہوں نے بتایا کہ گلگت بلتستان میں اس وقت فی 1000 ہزار افراد کیلئے ایک بیڈ دستیاب ہے۔