لاہور (خصوصی رپورٹ) سینٹ انتخابات کی صف بندی کے لئے پیپلزپارٹی اور مسلم لیگ ن میں رابطے بحال ہوگئے۔ پیپلزپارٹی نے رحمن ملک کو اپوزیشن لیڈر نامزد کرنے کی شرط پر چیئرمین سینٹ کے لئے مسلم لیگ ن کے نامزد کردہ امیدوار کی حمایت کی یقین دہانی کرادی۔ مسلم لیگ ن کی جانب سے مشاہد اللہ خان یا نہال ہاشمی کو چیئرمین سینٹ کے لئے امیدوار نامزد کئے جانے کا امکان ہے۔ سینٹ انتخابات کے لئے پیپلزپارٹی اور مسلم لیگ ن میں اعلیٰ سطحی رابطہ ہوا اور دونوں جماعتوں نے ایک بار پھر یہ طے کیا ہے کہ سینٹ کا آئندہ چیئرمین بھی صوبہ سندھ سے ہوگا جبکہ پیپلزپارٹی اور مسلم لیگ ن کے مابین مشاورت میں چیئرمین سینٹ کا عہدہ مسلم لیگ ن اور اپوزیشن لیڈر کا عہدہ پیپلزپارٹی کو دینے کے لئے بیشتر امور پر اتفاق ہوگیا۔ معتمد ترین ذرائع کا کہنا ہے سینٹ انتخابات 2018ءکے لئے پیپلزپارٹی اور مسلم لیگ ن میں اہم امور طے کرلئے گئے ہیں اور سینٹ انتخابات کے انعقاد کی صورت میں مارچ 2018ءکے الیکشن میں مسلم لیگ (ن) سینٹ میں 38 ممبران کے ساتھ اکثریتی جماعت کے طور پر سامنے آئے گی اور ممکنہ طور پر پیپلزپارٹی 14 جبکہ پی ٹی آئی 12 نشستوں کے ساتھ تیسری بڑی سیاسی جماعت ہوگی۔ مسلم لیگ ن اور پیپلزپارٹی کے مابین نئے چیئرمین سینٹ کے لئے مشاورت کراچی میں اہم سیاسی شخصیت کی رہائش گاہ پر ہوئی جس میں مسلم لیگ ن کی جانب سے ایک تاجر شخصیت نے پیپلزپارٹی کے ایک سینئر رہنما کو لیگی قیادت کا پیغام اور معاہدہ یاد دلایا جو موجودہ چیئرمین سینٹ میاں رضا ربانی کے انتخاب کے وقت دونوں جماعتوں کے مابین ہوا تھا کہ اکثریتی جماعت کے مینڈیٹ کا احترام کرتے ہوئے سیاسی تعاون کیا جائے گا۔ معتمد ترین ذرائع کے مطابق نئے چیئرمین سینٹ کے انتخابات کے معاملہ پر پیپلزپارٹی اور مسلم لیگ ن میں ایک بار پھر رابطے بحال ہونے سے معاملات افہام و تفہیم اور مشاورت سے حل ہونے کی امید ہے۔ یہ بھی معلوم ہوا ہے کہ پیپلزپارٹی کے شریک چیئرمین آصف علی زرداری سابق وزیراعظم نوازشریف سے ایک بزنس مین ٹائی کون شخصیت کے ذریعے رابطے میں ہیں۔ پیپلزپارٹی کا کہنا ہے کہ مسلم لیگ ن کی طرف سے سینٹ چیئرمین کے لئے وفاقی وزیر برائے موسمی تغیرات مشاہد اللہ خان یا نہال ہاشمی میں سے کسی ایک کو امیدوار نامزد کئے جانے کا امکان ہے اور اس کے لئے وہ پیپلزپارٹی اور دیگر جماعتوں کی حمایت حاصل کرنے کی کوشش کررہے ہیں جبکہ حتمی امیدوار کا فیصلہ میاں نوازشریف کریں گے۔

کوئٹہ (بیورو رپورٹر) بلوچستان اسمبلی کے اراکین کی جانب سے وزیراعلی بلوچستان نواب ثنا اللہ زہری کے خلاف تحریک عدم اعتماد جمع کروائے جانے کے بعد وزیر داخلہ بلوچستان سرفراز بگٹی کو وزارت سے الگ کو کر دیا گیا۔ وزیر ماہی گیری بلوچستان میر سرفراز چاکر ڈومکی نے وزیراعلی بلوچستان کو اپنا استعفی پیش کردیا ہے۔ اس سے قبل بلوچستان اسمبلی کے اراکین نے وزیراعلی بلوچستان کے خلاف عدم اعتماد جمع کرائی تھی۔ بلوچستان اسمبلی کے 14 اراکین کی جانب سے وزیراعلی کے خلاف عدم اعتماد کی تحریک جمع کرائی گئی۔ تحریک عدم اعتماد رکن اسمبلی عبدالقدوس بزنجو اور سید آغارضا کی جانب سے جمع کرائی گئی جس پر 14 اراکین اسمبلی کے دستخط ہیں۔ عدم اعتماد کی تحریک پر رکن اسمبلی میر قدوس بزنجو، میر کریم نوشیروانی، آغا رضا، میر خالد لانگو، نوابزادہ طارق مگسی، ڈاکٹر رقیہ سعید ہاشمی، محمد اختر مگسی، زمرد خان اچکزئی، حسین بانو، شاہدہ رف، خلیل الرحمان، عبدالمالک کاکٹر اور امان اللہ نوتیزئی شامل ہیں۔ خیال رہے کہ وزیراعلی بلوچستان نواب ثنااللہ زہری کا تعلق مسلم لیگ (ن) سے ہے اور ان سے قبل نیشنل پارٹی سے تعلق رکھنے والے عبدالمالک بلوچ وزیراعلی بلوچستان کے عہدے پر فائز تھے۔ رکن صوبائی اسمبلی میرعبدالقدوس بزنجونے سیکرٹری بلوچستان اسمبلی کے پاس وزیراعلی نواب ثنا اللہ زہری کے خلاف تحریک عدم اعتماد پیش کرنے کی درخواست جمع کرادی۔ درخواست میں 14ارکان اسمبلی کے دستخط موجود ہیں۔ تحریک عدم اعتماد جمع کرانے کے بعد میڈیا سے بات کرتے ہوئے میرعبدالقدوس بزنجو نے کہا کہ گزشتہ بجٹ میں ہمارے تحفظات تھے جنہیں دورنہیں کیا گیا، جس کی وجہ سے ہم نے نواب ثنا اللہ زہری کے خلاف تحریک عدم اعتماد پیش کرنے کا فیصلہ کیا۔ واضح رہے کہ بلوچستان اسمبلی 65 ارکان پر مشتمل ہے، جن میں سے 52حکومتی اتحاد میں شامل ہیں۔

اسلام آباد(خصوصی رپورٹ) صوبائی وزیر قانون رانا ثناءاللہ نے اپنے باس وزیر اعلی پنجاب شہباز شریف کا حکم رد کرتے ہوئے مستعفی ہونے سے انکار کر دیا ہے اور پارٹی صدر میاں نواز شریف پر واضح کیا ہے کہ وہ ان کے استعفے کے حوالے سے فیصلہ کر دیں وہ صرف ان کا حکم مانیں گے مگر پیر حمید الدین سیالوی کے مطالبے اور وزیر اعلی کی ہدایت پر بھی وہ مستعفی نہیں ہونگے۔ ذرائع کا کہنا ہے کہ وزیر اعلی پنجاب شہباز شریف چاہتے تھے کہ رانا ثنا ءاللہ مستعفی ہو جائیں تاکہ پیر حمید الدین سیالوی کے میدان میں آنے کی وجہ سے جو مذہبی ووٹ ن لیگ سے دور ہو رہا ہے وہ نہ ہو اور آئندہ عام انتخابات میں مسلم لیگ ن اس مذہبی ووٹ سے کہیں محروم نہ ہو جائے شہباز شریف چونکہ ن لیگ کے آئندہ عام انتخابات کے بعد وزارت اعظمی کے امیدوار ہونگے اس لئے وہ اس مذہبی ووٹ کی کسی اور کے حق میں تقسیم نہیں چاہتے اور رانا ثناءاللہ کو اسی لئے انہوں نے مستعفی ہونے کا کہا تھا لیکن رانا ثناءاللہ نے یکسر انکار کر دیا اور ذرائع نے انکشاف کیا ہے کہ چند دن قبل رائے ونڈ میں ہونے والے ایک اجلاس میں بھی یہ معاملہ زیر غور آیا تھا اور شہباز شریف سمیت بعض رہنماﺅ ں کی رائے تھی کہ رانا ثنائ اللہ مستعفی ہو جائیں ورنہ مذہبی اور دینی ووٹ کی تقسیم سے ن لیگ کو آئندہ انتخابات میں نقصان ہوگا اس موقع پر رانا ثناءاللہ نے موقف اختیار کیا کہ وہ بلیک میل ہو کر استعفی نہیں دینگے میرے استعفے کا فیصلہ پارٹی قائد نواز شریف کر دیں میں انھیں مکمل اختیار دیتا ہوں کہ وہ جب چاہیں میرے استعفے کے حوالے سے اعلان کر دیں مگر کسی اور کے کہنے پر مستعفی نہیں ہون گا جس پر شہباز شریف اور رانا ثناءمیں ناراضگی بھی ہو گئی تھی تاہم نواز شریف نے معاملے کو سنبھالا اور کہا کہ وہ پارٹی کے سینئر رہنماﺅ ں سے مشاورت کے بعد رانا ثناءکے استعفے پر حتمی فیصلہ کرینگے تاہم ایسی روایت نہیں ڈالنی چاہیے کیونکہ وفاقی حکومت پہلے ہی ختم نبوت کے معاملے پر زاہد حامد سے استعفی لے چکی اس لئے رانا ثناءاللہ سے استعفی مانگنا درست نہیں تاہم وہ ایک دو دن میں اس حوالے سے واضح فیصلہ کرینگے اور رانا ثناءاللہ کے موقف کو بھی سنا جائے گا ۔