ٹوکیو(ویب ڈیسک) ہمارے ہاں زمین کی قیمتیں اتنی بلند ہو چکی ہیں کہ غریب آدمی کے لیے اپنا گھر بنانے کا سوچنا بھی محال ہے مگر ایک ملک ایسا ہے جہاں لوگوں کو بالکل مفت مکان دیئے جا رہے ہیں اور یہ ملک بھی کوئی ایسا ویسا نہیں بلکہ جاپان ہے۔سی این بی سی کے مطابق جاپان میں گزشتہ کئی دہائیوں سے آبادی تیزی سے کم ہوتی جا رہی ہے اور جاپانیوں کی اکثریت بھی عمررسیدہ ہے۔ چنانچہ مختلف قصبوں اور دیہات میں خالی گھروں کی تعداد بھی تیزی کے ساتھ بڑھ رہی ہے، جنہیں پ±ر رکھنے کے لیے اکثراوقات لوگوں کو مفت گھر کی پیشکش کر دی جاتی ہے۔جاپان کی کئی پراپرٹی ویب سائٹس پرمالکان کی طرف سے یا قصبات کی انتظامیہ کی طرف سے گھر مفت دیئے جانے کے اشتہارات موجود ہیں۔ یہ گھر حاصل کرنے کے لیے آپ کو صرف اس گھر پر واجب الادا ٹیکس ادا کرنے ہوں گے یا پھر ایجنٹ کا کمیشن۔ اس کے علاوہ گھر بالکل مفت مل جاتا ہے۔ یہ گھر ایسے لوگوں کے ہوتے ہیں جو شہر منتقل ہو چکے ہیں اور اب اس گھر کا ٹیکس وغیرہ ادا نہیں کرنا چاہتے، یا پھر ایسے لوگ جو دنیا سے رخصت ہو چکے ہیں۔مقامی حکومتیں ان گھروں کی ازسرنوبحالی پر اچھی خاصی سبسڈی بھی دیتی ہیں۔ان ویب سائٹس پر قیمت کے عوض بھی جو گھر دستیاب ہیں ان کی قیمت انتہائی کم ہے اور وہ تین سے چار لاکھ روپے میں مل جاتے ہیں۔جاپان کی ایک رئیل سٹیٹ ویب سائٹ ’ری تھنک ٹوکیو‘کی رپورٹ کے مطابق 2013ءمیں پورے جاپان میں 80لاکھ سے زائد گھر خالی پڑے تھے، جو پورے جاپان کے گھروں کا 13.52فیصد ہیں۔ اب ان کی تعداد میں مزید اضافہ ہو چکا ہے۔

سری نگر(ویب ڈیسک) مقبوضہ کشمیر میں قابض بھارتی فوج کے آرمی کیمپ میں اہلکاروں کے درمیان جھگڑے میں ایک سپاہی نے اپنے ساتھی اہلکار کو گولیاں مار کر قتل کردیا۔بین الاقوامی خبر رساں ادارے کے مطابق مقبوضہ کشمیر کے ضلع ڈوڈا میں واقع بھارتی آرمی کیمپ میں معمولی بات پرجھگڑے ہوا جس کے نتیجے میں ایک سپاہی نے حوالدار راجیش کو سرکاری رائفل سے فائرنگ کرکے قتل کردیا۔بھارتی فوج کے ترجمان نے واقعے کی تصدیق کرتے ہوئے میڈیا کو بتایا کہ دو اہلکاروں کے درمیان جھگڑا معمولی تلخ کلامی سے شروع ہوا جس پر مشتعل ہوکر سپاہی نے فائرنگ کردی۔بھارتی فوج کے ترجمان کا مزید کہنا تھا کہ واقعے کی تحقیقات کے لیے کمیٹی تشکیل دے دی گئی ہے جب کہ فائرنگ کرنے والے سپاہی کو حراست میں لے لیا گیا ہے۔ تمام آئینی اور قانونی تقاضے پورے کیے جائیں گے۔واضح رہے کہ مقبوضہ کشمیر میں بھارتی فوجی اہلکاروں کے درمیان جھگڑے اور قتل کا واقعہ نیا نہیں رواں برس ساتھی اہلکار کے ہاتھوں قتل ہونے والے سپاہیوں کی تعداد 6 ہوگئی ہے جب کہ خودکشی کرنے والے اہلکار اس کے علاوہ ہیں۔

نئی دہلی(ویب ڈیسک) بھارت میں ایک لڑکی کو گھر میں ایک رشتہ دار نے جنسی زیادتی کا نشانہ بناڈالا اور جب وہ اس سے جان چھڑا کر گھر سے باہر بھاگی تو ایسے لوگوں کے ہتھے چڑھ گئی کہ سن کر ہر آدمی افسردہ ہو جائے۔ ٹائمز آف انڈیا کے مطابق یہ اندوہناک واقعہ بھارتی ریاست ہریانہ کے شہر فریدآباد میں پیش آیا۔ وہ ہندوتہوار ’نوراتری‘ کا دن تھا اور متاثرہ لڑکی نے نوراتری کا روزہ رکھا ہوا تھا، جب اس کے باپ کی عمر کا رشتہ دار اس کے گھر آیا۔ اس نے لڑکی کے گھر والوں سے کہا کہ ’آج میری کمپنی کی طرف سے نوراتری کے تحفے تقسیم کیے جا رہے ہیں لیکن تحفہ اسی ملازم کو ملے گا جو اپنی بیٹی کو ساتھ لائے گا۔ میری بیٹی ننھیال گئی ہوئی ہے چنانچہ آپ اپنی بیٹی کو میرے ساتھ بھیج دیں۔“رپورٹ کے مطابق والدین نے اس درندہ صفت انسان پر بھروسہ کرتے ہوئے اپنی بیٹی کو اس کے ساتھ بھیج دیا جو اسے اپنے گھر لے گیا اور جنسی زیادتی کا نشانہ بناڈالا۔جب لڑکی اس کے چنگل سے چھوٹ کر گھر سے باہر بھاگی تو بجندر نامی شخص نے اسے مدد کی پیشکش کی کیونکہ وہ خوف کے مارے بھاگتی جا رہی تھی اور مدد کے لیے پکار رہی تھی۔ بجندر نے اسے اپنی گاڑی میں بٹھا لیا اور ایک گھر میں لے گیا جہاں پروین اور ونود نامی دو شیطان پہلے سے موجود تھے۔ یہاں ان تینوں نے لڑکی کو اجتماعی زیادتی کا نشانہ بناڈالا اور بدترین جسمانی تشدد بھی کیا۔ ان کے ایک ہمسائے نے لڑکی کی چیخوں کی آواز سن کر پولیس کو اطلاع دی، جس نے آ کر تینوں کو گرفتار کرکے لڑکی کو بازیاب کرا لیا۔ رپورٹ کے مطابق اب ان چاروں کو دہلی ہائی کورٹ نے سات، سات سال قید اور 5لاکھ روپے زرتلافی کی سزا سنا کر جیل بھجوا دیا ہے۔