کراچی: (ویب ڈیسک) برصغیر پاک وہند کے مسلمانوں کے نجات دہندہ، بانی پاکستان محمد علی جناح کی اکہترویں برسی آج انتہائی عقیدت واحترام سے منائی جا رہی ہے۔کراچی کی بندرگاہ کے قریب واقع وزیر منشن میں 1876ءمیں گجراتی تاجر جناح بھائی پونجا کے گھر آنکھ کھولنے والے محمد علی جناح آنے والے برسوں میں مسلمانان ہند کے میر کارواں بن گئے اور عرصہ دراز سے استحصال میں پھنسی قوم کو اپنی سیاسی بصیرت کی وجہ سے الگ مملکت کی شناخت دی۔برصغیر میں ایک آزاد مسلم ریاست کے قیام کا وہ دیرینہ خواب جو مسلمانان ہند دو صدیوں سے دیکھتے چلے آ رہے تھے 14 اگست کو شرمندہ تعبیر ہوا۔ اس خواب کی تعبیر ایک فرد واحد کی چشم کرشمہ ساز کا نتیجہ تھی اور وہ قائد اعظم محمد علی جناح تھے۔

پشاور: (ویب ڈیسک) وزیراعلیٰ خیبر پختونخوا محمود خان نے کہا ہے کہ وزیراعظم عمران خان 14 ستمبر کو طورخم بارڈر کا افتتاح کریںگے۔پشاور میں وزیراعلیٰ محمود خان نے ایک ویڈیو پیغام میں کہا ہے کہ وزیراعظم کی ہدایت پر طورخم بارڈر کو 24 گھنٹے کے لئے کھول دیا ہے، تمام انتظامات مکمل کر لئے ہیں جبکہ تمام عملہ 24 گھنٹے موجود رہے گا۔ان کا کہنا تھا کہ تمام اداروں نے اپنا کام شروع کر دیا ہے۔ طورخم 24 گھنٹے کھلا رہنے سے تجارت کو فروغ ملے گا۔ بارڈر کھلا رہنے سے وسطی ایشیا تک تجارت بڑھے گی۔انہوں نے اس امید کا اظہار کیا کہ افغانستان اور پاکستان میں روزگار کے مواقع بڑھیں گے۔ افغانستان اور پاکستان میں غلط فہمیاں بھی ختم ہوں گی۔ محمود خان نے کہا سرحد کے دونوں اطراف میں ایک ہی لوگ ہیں افغانی دوسرے ممالک میں جانے کے بجائے یہاں آئیں۔

اسلام آباد(ویب ڈیسک): دنیا کے دیگر ممالک کی طرح ملک بھر میں حضرت محمد مصطفیٰ کے نواسے حضرت امام  حسینؓ اور ان کے ساتھیوں کی عظیم قربانیوں کی یاد میں یوم عاشور کے موقع پر مختلف شہروں سے جلوس نکالے گئے۔یوم عاشور کے موقع پر علمائے کرام، ذاکرین، مشائخ عظام اور مفتیان کرام نواسہ رسول حضرت امام حسینؓ اوران کے ساتھیوں کی لازوال قربانیوں اور فلسفہ شہادت پہ روشنی ڈالی۔مختلف شہروں سے یوم عاشور کے موقع پر شبیہ ذوالجناح اور شبیہ علم کے جلوس برآمد ہوئے۔ لوگوں کی بڑی تعداد نے نواسہ رسول اور ان کے ساتھیوں کی قربانیوں کو خراج عقیدت پیش کیا۔ملک کے سب سے بڑے شہر کراچی میں شہر کا مرکزی جلوس نشترپارک سے برآمد ہوکر امام بارگاہ حسینیہ ایرانیاں کھارادر پر اختتام پذیر ہوا۔راولپنڈی میں مرکزی جلوس امام بارگاہ عاشق حسین، امام بارگاہ کرنل مقبول اور ٹائروں والی امام بارگاہ سے برآمد ہوکر اور اپنے روایتی راستوں سے ہوتے ہوئے اختتام پذیر ہوئے۔