ڈیرہ غازی خان (ویب ڈیسک) وفاقی وزیرِ ریلوے شیخ رشید نے کہا ہے کہ عمران خان نے انہیں مخاطب کر کے کہا ہے کہ جب تک وہ وزیرِ اعظم ہیں، تب تک عثمان بزدار وزیرِ اعلیٰ پنجاب رہیں گے۔وفاقی وزیر ریلوے شیخ رشید خصوصی ٹرین سے ڈی جی خان پہنچے جہاں تقریب سے خطاب کرتے ہوئے شیخ رشید نے کہا کہ آصف زرداری کے دوست پلی بارگین کے لیے پیسہ جمع کر نا شروع کرچکے ہیں، امید ہے کہ محرم الحرام کے بعد نواز شریف بھی پیسے دیں گے۔انہوں نے کہا کہ عمران خان کا سارا زور 27 ستمبر کی تقریر پر مرکوز ہے حالانکہ اقوام متحدہ نے ہمیں کچھ نہیں دینا، کشمیر کے لیے قوم کا بچہ بچہ قربانی دینے کے لیے تیار ہے۔شیخ رشید نے کہا کہ سورج مشرق کے بجائے مغرب سے بھی طلوع ہو جائے لیکن عمران خان کسی کو این آر او نہیں دینے والے۔وزیرِ ریلوے نے ڈی جی خان سے سکھر تک تیز ریل اور کوئٹہ کے لیے چلتن ایکسپریس ٹرین چلانے کا اعلان کر دیا۔آخر میں شیخ رشید نے کہا کہ انہوں نے آٹھ نو سال سے جھوٹ بولنا چھوڑ دیا ہے، جو اعلانات کیے گئے ہیں ان پر عمل درآمد بھی ہو جائے گا۔

اسلام آباد (ویب ڈیسک)وزیراعظم عمران خان کی مشیر برائے اطلاعات فردوس عاشق اعوان نے کہا ہے کہ پنجاب پولیس کا ’کینسر‘ ڈسپرین سے ٹھیک نہیں ہوگا،اس کے لیے بڑے آپریشن کی ضرورت ہے۔مشیر برائے اطلاعات نے آئی جی پنجاب کو مشورہ دیا کہ وہ اپنی پولیس میں موجود کالی بھیڑوں کا پتا لگانے کے لیے ’منجی تلے ڈانگ پھیریں۔فردوس اعوان نے مزید کہا کہ پنجاب پولیس کے کینسر کا علاج ڈسپرین سے نہیں ہوگا۔ایک بیان میں فردوس عاشق اعوان نے یونیفارم میں ملبوس عورت کی طرف سے تحفظ مانگنے پر افسوس کا اظہار کیا اور کہا کہ خواتین پر تشدد معاشرتی رویوں کا عکاس ہے۔انہوں نے کہا کہ تھپڑ کھانے والی لیڈی کانسٹیبل کے پیٹی بند بھائی نے وکیل کو ریلیف دینے کے لیے ایف آئی آر میں غلط نام کا اندراج کیا۔

کراچی (ویب ڈیسک)کراچی میں محرم الحرام کے پیش نظرموٹرسائیکل کی ڈبل سواری پرپابندی عائد کردی ہے۔تفصیلات کے مطابق محرم الحرام کے پیش نظرکراچی میں موٹر سائیکل سواری کی ڈبل سواری پرپابندی عائد کردی گئی ہے۔ پابندی تین روز کیلئے ہوگی جبکہ صحافی اورخواتین پابندی سے مستثنیٰ ہونگے۔واضح رہے کہ پنجاب میں اس سے قبل ہی محرم الحرام میں عاشورہ کے تین دنوں میں موٹر سائیکل کی ڈبل سواری پر پابندی عائد کردی گئی ہے۔

اسلام آباد(ویب ڈیسک)اسلام آباد میں وزیر خارجہ شاہ محمود قریشی کی زیر صدارت افغان اور چین کے وزرائے خارجہ پر مشتمل سہ فریقی اجلاس میں 5 نکاتی معاہدے پر اتفاق ہوگیا۔اس ضمن میں تینوں ممالک کے وزرائے خارجہ نے اجلاس کے بعد مشترکہ پریس کانفرنس کی اور صحافیوں کے سوالات کے جوابات دیے۔وزیر خارجہ شاہ محمود قریشی نے افغان اور چینی ہم منصب وزرائے خارجہ کی آمد کو خوش آئند قرار دیا اور کہا کہ چین ہمارا دیرینہ ہمسایہ اور آزمودہ دوست ہے۔انہوں نے بتایا کہ مذاکرات میں سیاسی تعلقات، افغان امن عمل، سیکیورٹی تعاون پر بات ہوئی تاہم ہم افغان امن عمل کی کامیابی کے لیے دعا گو ہیں‘۔شاہ محمود قریشی نے امید ظاہر کی وہ اگلے مرحلے میں افغانستان اور پورے خطے میں پائیدار امن کیلئے بین الافغان مذاکرات کی جانب پیشرفت کریں گے۔سہ فریقی اجلاس میں آئندہ مذاکرات بیجنگ میں کرنے پر بھی اتفاق کیا ہوا۔اس ضمن میں انہوں نے بتایا کہ ’تینوں ممالک کے درمیان دوستانہ کرکٹ میجز بھی ہوں گے‘۔علاوہ ازیں وزیرخارجہ نے تورخم سرحد کو 24گھنٹے کھولے رکھنے کی افتتاحی تقریب میں شرکت کے لیے افغان صدر اشرف غنی کو دوبارہ دعوت دی۔انہوں نے بتایا کہ مذاکرات میں افغان امن عمل پر پیش رفت کا بھی جائزہ لیا گیا‘۔افغان امن عمل کے حوالے سے 5 نکات پر اتفاق ہوا، چینی وزیر خارجہ۔چینی وزیر خارجہ وانگ ڑی نے پریس کانفرنس میں کہا افغان امن عمل کے حوالے سے تینوں ممالک میں 5 نکات پر اتفاق ہوا ہےانہوں نے اجلاس کے انعقاد اور بہترین میزبانی پر پاکستان کا شکریہ ادا کیا۔چین کے وزیر خارجہ کا کہنا تھا کہ ’امن وا مان کے لیے علاقائی رابطوں کا فروغ ضروری ہے پاکستان، چین اور افغانستان کے درمیان سہ فریقی مذاکرات کے تیسرے دور میں شرکت کے لیے چینی اور افغان وزرائے خارجہ اسلام آباد پہنچے تھے۔تینوں ممالک کے درمیان سہ ملکی وزرائے خارجہ مذاکرات کا تیسرا دور آج (7 ستمبر کو) پاکستانی وزیر خارجہ شاہ محمود قریشی کی زیر صدارت اسلام آباد میں جاری ہے۔وزیر خارجہ شاہ محمود قریشی نے چینی وزیر خارجہ وانگ ڑی کا نور خان ایئربیس پر استقبال کیا جبکہ پاکستان آمد پر ان کا خیر مقدم بھی کیا، اس دوران دونوں رہنماﺅں کے درمیان تہنیتی جملوں کا تبادلہ ہوا۔اس کے ساتھ افغانستان کے وزیر خارجہ صلاح الدین ربانی بھی مذاکرات میں شرکت کے لیے اسلام آباد پہنچے اور ان کا استقبال بھی وزیر خارجہ شاہ محمود قریشی نے کیا۔خیال رہے کہ سہ فریقی مذاکرات کے ایجنڈے میں سیاسی تعلقات، افغان امن عمل، سیکیورٹی تعاون و انسداد دہشت گردی، ترقیاتی تعاون اور باہمی روابط کا فروغ شامل ہے۔اس حوالے سے شاہ محمود قریشی کا کہنا تھا کہ ’چین، افغانستان، پاکستان وزرائے خارجہ مذاکرات کا مقصد باہمی مفاد کے امور بالخصوص معاشی ترقی اور امن و سلامتی پر تینوں ممالک میں تعاون کو فروغ دینا ہے‘۔پاکستانی وزیر خارجہ نے کہا کہ سیاسی اعتماد سازی، ترقی و تعاون اور روابط کے فروغ کے حوالے سے یہ سہ ملکی مذاکرات انتہائی اہمیت کے حامل ہیں۔انہوں نے کہا کہ ان مذاکرات کے نتیجے میں تینوں ممالک کے مابین، یکساں مفاد کے امور پر زیادہ بہتر ہم آہنگی سامنے آئے گی۔شاہ محمود قریشی نے بتایا کہ ان کے چینی اور افغان ہم منصب کے ساتھ علیحدہ علیحدہ ملاقاتیں بھی متوقع ہیں۔وزیر کارجہ کا کہنا تھا کہ جہاں ہم چین کے ساتھ اپنی مشرقی سرحد اور مقبوضہ کشمیر کی صورتحال پر تبادلہ خیال کر رہے ہوں گے وہیں ہمیں مغربی سرحد، افغانستان کی صورتحال اور پیشرفت پر بھی تبادلہ خیال کا موقع ملے گا۔وزیر خارجہ نے کہا کہ سہ فریقی مذاکرات کے اس فورم کی اہمیت آئندہ وقت میں مزید بڑھ جائے گی۔شاہ محمود قریشی نے کہا کہ افغانستان پاکستان کی تجارت سے فائدہ حاصل کرسکے گا، تاہم خواہش ہے کہ وہ پاک چین اقتصادی راہداری (سی پیک) اور گوادر سے مستفید ہوسکے۔خیال رہے کہ ان مذاکرات کا پہلا دور 2017 میں بیجنگ جبکہ دوسرا دور دسمبر 2018 میں کابل میں منعقد ہوا تھا۔

اسلام آباد(ویب ڈیسک)پاک فوج کے شعبہ تعلقات عامہ (آئی ایس پی آر) نے کہا ہے کہ بھارتی فوج اور میڈیا 2 معصوم پاکستانیوں کو دہشت گرد قرار دے کر جعلی فلیگ آپریشن کے لیے ماحول بنا رہا ہے۔اس حوالے سے آئی ایس پی آر کے ایک اعلامیے میں بتایا گیا کہ 21 اگست کو غلطی سے سرحد عبور کرنے والے شہریوں کو بھارتی میڈیا میں دہشت گرد قرار دیا گیا۔بیان میں کہا گیا کہ 21 اگست کو آزاد جموں و کشمیر سے تعلق رکھنے والے 21 سالہ محمد نظیم کھوکھر ولد عارف حسین کھوکھر اور 30 سالہ خلیل احمد کیانی ولد عبدالعزیز کیانی حاجی پیر سیکٹر میں گھاس کی کٹائی کے دوران غلطی سے سرحد عبور کر گئے تھے۔بعد ازاں 27 اگست کو ہاٹ لائن پر ہفتہ وار رابطے کے دوران بھارتی عسکری حکام کو واقعے سے متعلق آگاہ کیا گیا تھا جبکہ سرحد عبور کرنے والے پاکستانیوں کی تفصیلات بھی فراہم کی گئی تھیں۔آئی ایس پی آر کے مطابق بھارتی حکام نے اس کا اعتراف کیا تھا جبکہ پاکستانی حکام کو آگاہ کیا تھا کہ اس وقت معمول کی قانونی کارروائی جاری ہے جو مکمل ہونے کے بعد دوبارہ رابطہ کیا جائے گا۔پاک فوج کے شعبہ تعلقات عامہ کا کہنا تھا کہ 2 ستمبر کو بھارتی میڈیا نے جھوٹی خبریں چلائیں اور معصوم شہریوں کو کالعدم تنظیم کا کارکن کہتے ہوئے انہیں دہشت گرد قرار دے دیا۔بعد ازاں 3 ستمبر کو ایک مرتبہ پھر ہاٹ لائن رابطے پر بھارتی حکام کو آگاہ کیا گیا کہ حقائق اور معلومات کی فراہمی کے باوجود بھارتی میڈیا غلط خبریں چلا رہا ہے۔تاہم بھارتی حکام کی جانب سے ایک مرتبہ پھر یہ یقین دہانی کروائی گئی کہ قانونی کارروائی جاری ہے جس کے مکمل ہوتے ہی نتائج پاکستانی حکام کے ساتھ شیئر کیے جائیں گے۔آئی ایس پی آر کا کہنا تھا کہ تمام تر معلومات کی فراہمی اور حقائق سے قطع نظر بھارتی فوج نے ایک جھوٹی اور بے بنیاد کہانی بنائی اور معصوم شہریوں کو دہشت گرد بنا کر پیش کیا گیا۔پاک فوج کے شعبہ تعلقات عامہ کے مطابق غلطی سے سرحد عبور کرنے والوں سے بھارتی فوج نے دباﺅ ڈال کر اعترافی بیان بھی دینے کا کہا کہ ان لوگوں کو پاکستان میں تربیت دی گئی اور ان کا تعلق راولپنڈی سے ہے۔اعلامیے میں بتایا گیا کہ دونوں افراد معصوم شہری ہیں جو غلطی سے سرحد پار کر گئے تھے جبکہ ان کا تعلق راولپنڈی سے نہیں بلکہ تیرہ بند گاو¿ں سے ہے۔پاک فوج کے مطابق اس قسم کے اوچھے ہتھکنڈے جعلی فلیگ آپریشن کے بارے میں پاکستان کے خلاف ماحول پیدا کرنا ہے۔آئی ایس پی آر نے اپنے بیان میں کہا کہ ‘پاکستان اس بھارتی جھوٹ کو بے نقاب کرنے کے لیے اس معاملے کو قانونی طریقے سے دیکھ رہا ہے۔‘