کراچی( ویب ڈیسک)سندھ کے مختلف علاقوں میں ہونے والی مون سون کی پہلی بارش سے نشیبی علاقے زیر آب آگئے اور کراچی میں بجلی کا نظام بری طرح درہم برہم ہوا جبکہ بارش کے باعث 4 نوجوانوں سمیت 8 شہری جاں بحق اور تین افراد زخمی ہوگئے۔کراچی کے مختلف علاقوں میں صبح سویرے ہونے والی بارش کی وجہ سے اسکولوں میں بچوں کی حاضری کم رہی جبکہ دفاتر اور کام پر جانے والے افراد کو بھی مشکلات کا سامنا کرنا پڑا۔محکمہ موسمیات کے مطابق کراچی میں سب سے زیادہ بارش صدر میں 60 ملی میٹر ریکارڈ کی گئی، گلشن حدید میں 21، لانڈھی میں 12 اور کیماڑی میں 5 ملی میٹر بارش ریکارڈ کی گئی۔محکمے کے مطابق کراچی میں جناح ٹرمینل کے اطراف میں 35ملی میٹر، موسمیات میں 34 ملی میٹر، مسرور بیس میں 32 ملی میٹر، ناظم آبادمیں 39، ایئرپورٹ کے علاقے میں 38 ملی میٹر بارش ریکارڈ کی گئی۔کراچی کے دیگر علاقوں میں سرجانی میں 50ملی میٹر، فیصل بیس میں 45 ملی میٹر، نارتھ کراچی میں 42 ملی میٹر اور سب سے زیادہ 60 ملی میٹربارش صدرمیں ریکارڈ کی گئی۔دوسری جانب لیاری ایکسپریس وے پر جگہ جگہ پانی بھر گیا، گاڑیوں کی طویل قطاریں لگنے کے باعث ٹریفک جام ہوگیا اور لوگ تاخیر سے دفاتر پہنچے۔آئی جی سندھ نے کسی بھی ہنگامی صورتحال میں پولیس اہلکاروں کو فوراً پہنچنے اور امدادی کارروائیاں کرنے کی ہدایت جاری کیں۔پولیس اور امدادی تنظیموں کے مطابق کراچی میں بارش کے دوران 4 نوجوانوں سمیت 8 افراد جاں بحق ہوگئے جن میں سے اکثریت کرنٹ لگنے دم توڑ گئے۔کراچی کے علاقے اختر کالونی کے سیکٹر ای کے گھر کے باہر کرنٹ لگنے سے 8 سالہ فرزانہ جاں بحق ہوئیں۔پولیس افسر سندر خان کا کہنا تھا کہ اخترکالونی میں بچے کھیل رہے تھے اس دوران 8 سالہ فرزانہ نے بجلی کے کھمبے کو چھوا جس کے نتیجے میں وہ زخمی ہوئی تھیں اور انہیں جناح ہسپتال منتقل کردیا گیا تھا۔جناح ہسپتال کی ایگزیکٹیو ڈائریکٹر ڈاکٹر سیمی جالی کا کہنا تھا کہ بچی کو ہسپتال لایا گیا تھا جہاں ڈاکٹروں نے ان کی انتقال کی تصدیق کردی۔بوٹ بیسن پولیس کے مطابق کلفٹن کے علاقے باتھ آئی لینڈ میں کرنٹ لگنے سے 30 سالہ شہری دم توڑ گیا جن کی لاش قانونی کارروائی کے لیے جناح ہسپتال منتقل کردی گئی۔گلبہار پولیس اسٹیشن کے ایس ایچ او ہدایت حسین کا کہنا تھا کہ ناظم آباد نمبر 2 میں کرنٹ لگنے سے 39 سالہ کاظم ضیا لقمہ اجل بن گئے۔چھیپا کے ترجمان کے مطابق ڈیفنس کے فیز 5 میں خیابان تنظیم کی گلی نمبر 17 میں واقع ایک گھر کے اندر بجلی کا کرنٹ لگنے سے 30 سالہ شرافت جاں بحق ہوگئے۔پولیس کے مطابق گلستان جوہر میں پارک ایونیو اپارٹمنٹ بلاک 19 میں کرنٹ لگنے 19 سالہ نوجوان غلام رسول جاں بحق ہوگئے۔ملیر سٹی میں کرنٹ لگنے سے 10 سالہ مہراب جبران اور 9 سالہ عمر رضا اورپاپوش نگر پولیس کی حدود میں صرافہ بازار میں 30 سالہ سعد احمد جاں بحق ہوئے۔بارش کے باعث کرنٹ لگنے سے کلفٹن کے علاقے زمزمہ میں ایک شخص جاں بحق ہوگیا جس کی لاش کو جناح ہسپتال منتقل کیا گیا۔اس سے قبل برسات کے پیشِ نظر کے الیکٹرک کی جانب سے تنبیہہ جاری کی گئی تھی جس میں بجلی کے کھمبوں اور ٹوٹے ہوئے تاروں کے قریب جانے سے سختی سے منع کیا گیا ہے۔مون سون سیزن کے پیشِ نظر کے الیکٹرک نے شہریوں کے لیے حفاظتی تدابیر اختیار کرنے کا انتباہ جاری کر رکھا ہے جس میں بارش کے دوران گیلے ہاتھوں سے برقی آلات نہ چھونے، بجلی کے کھمبے، درختوں یا پی ایم ٹی کے قریب نہ جانے جبکہ بچوں کو بجلی کے ساکٹ سے دور رکھنے کی ہدایت کی گئی۔اس کے ساتھ کسی بھی شکایت کی صورت میں کے الیکٹرک کے نمبر 118 اور بجلی جانے کی صورت میں غیر قانونی ذرائع سے بجلی نہ حاصل کرنے کی تنبیہہ بھی کی گئی۔

اسلام آباد (ویب ڈیسک) وزیراعظم عمران خان سے چیف آف آرمی سٹاف جنرل قمرجاوید باجوہ نے ملاقات کی ہے، ملاقات میں ملکی سلامتی اور سکیورٹی صورتحال پر تبادلہ خیال کیا گیا۔ میڈیا رپورٹس کے مطابق وزیراعظم عمران خان اور آرمی چیف جنرل قمر جاوید باجوہ کے درمیان وزیراعظم ہاﺅس میں اہم ملاقات ہوئی ہے۔ملاقات میں ڈی جی آئی ایس آئی لیفٹیننٹ جنرل فیض حمید اور ڈی جی آئی ایس پی آرمیجر جنرل آصف غفور بھی شریک تھے۔بتایا گیا ہے کہ وزیراعظم عمران خان اور آرمی چیف جنرل قمر جاوید باجوہ کے درمیان ملاقات باہمی دلچسپی کے امور اور ملک کی مجموعی سکیورٹی صورتحال پر تبادلہ خیال کیا گیا۔ اس موقع پر ملاقات میں پاک فوج کے پیشہ ورانہ امور پر بھی بات چیت کی گئی۔ ملاقات میں دورہ امریکا پر بھی بات چیت کی گئی ہے۔

کراچی (ویب ڈیسک) سندھ بھر میں مون سون کی بارشوں کا سلسلہ شروع ہونے سے جل تھل ہو گیا۔ جس کے بعد سندھ حکومت نے کل تعلیمی ادارے بند رکھنے کا اعلان کر دیا ہے۔ مون سون کی بارشوں کی وجہ سے صوبے بھر میں کل سرکاری و پرائیویٹ تعلیمی ادارے بند رہیں گے۔ سیکرٹری تعلیم سندھ نے اس حوالے سے باقاعدہ نوٹی فکیشن جاری کر دیا۔سیکرٹری تعلیم سندھ نے ہدایت کی کہ تمام افسران اپنے اپنے علاقوں میں جا کر اسکولوں سے نکاسی آب کروائیں۔ محکمہ موسمیات کے مطابق راجھستان سے آنے والے بارش کے نئے سسٹم کے باعث صبح سے ہی کراچی کے مختلف علاقوں میں مسلسل ہلکی بارش کا سلسلہ جاری ہے جن میں شاہ فیصل کالونی، بلوچ کلونی، کورنگی ، گلشن اقبال، پی ای سی ایچ ایس ، گلشن اقبال، فیڈرل بی ایریا ، صدر،آئی آئی چندریگرروڈ، ایم اے جناح روڈ ، ملیر، ائرپورٹ،شارع فیصل شامل ہیں۔کراچی میں ٹھنڈی ہواﺅں کا بھی راج ہے۔ بارش برستے ہی ڈیفنس فیز8 ، لسبیلہ ، نارتھ ناظم آباد ، گارڈن ، صدر گرومندر، لائنزایریا ، پی ای سی ایچ ایس اور دیگر علاقوں میں بجلی کی فراہمی معطل ہوگئی۔ محکمہ موسمیات کے مطابق کراچی میں بارش کا سلسلہ اگلے دوروزتک جاری رہے گا۔ شہر میں بارش سے ہونے والے ممکنہ نقصانات کے باوجود نالوں کی صفائی نہیں کی جا سکی۔حیدرآباد میں بھی مون سون کی بارش کا سلسلہ گذشتہ رات سے وقفے وقفے سے جاری ہے۔ بارش کے باعث سڑکوں پر پانی جمع ہونے سے شہریوں کومشکلات کاسامنا ہے۔ جامشورو میں بھی بارش کے باعث مختلف علاقوں میں بجلی کی فراہمی معطل ہوگئی جبکہ ضلع بھرکے نشیبی علاقے زیرآب آگئے ہیں۔ سندھ کے میدانی علاقوں میں آج اور کل مزید بارشوں کا امکان ہے۔ برسات کے باعث آج بھی طلبا کو درپیش مشکلات کے پیش نظر متعدد نجی اسکولوں کے انتظامیہ نے اپنے اسکول بند رکھنے کا اعلان کردیا تھا جبکہ دفاتر میں بھی حاضری معمول سے کم رہی۔شہر قائد میں سب سے زیادہ بارش گلشنِ حدید میں 12 ملی میٹر ریکارڈ کی گئی۔محکمہ موسمیات نے کراچی سمیت سندھ کے دیگر شہروں کے لئے اربن فلڈنگ کا الرٹ جاری کرتے ہوئے کہا ہے کہ اگلے 12 سے 24 گھنٹوں کے دوران مون سون بارشوں کا سسٹم سندھ پر اثر انداز ہوگا اور موسلا دھار بارش ہوسکتی ہے۔

لاہور(ویب ڈیسک)جو ادارہ اب ناچ گانا کرائے گا اس کے خلاف پیڈا ایکٹ کے تحت کاروائی کی جائے گی، ادارے پر بھاری جرمانہ بھی عائد کیا جائے گا،تعلیمی ادارے کی رجسٹریشن منسوخ کی جائے گی۔پارلیمانی سیکرٹری برائے اعلی تعلیم کا بیان نجی تعلیمی اداروں میں ناچ گانے کا معاملہ پنجاب اسمبلی تک پہنچ گیا۔میڈیا رپورٹس کے مطابق پاکستان مسلم لیگ نون کی رہنما کنول پرویز چوہدری نے کہا ہے کہ طلبہ و طالبات سے عربی اور دیگر گانوں پر رکھ کر ان افسوسناک ہے۔پارلیمانی سیکرٹری برائے اعلی تعلیم سبطین رضا نے ایک سوال کے جواب میں کہا کہ نجی اور سرکاری تعلیمی اداروں میں پہلے ہی ناچ گانے پر پابندی ہے۔تاہم اب مزید سختی کی جارہی ہے۔انہوں نے کہا کہ جو ادارہ اب ناچ گانا کرائے گا اس کے خلاف پیڈا ایکٹ کے تحت کاروائی کی جائے گی۔اور اس ادارے پر بھاری جرمانہ بھی عائد کیا جائے گا اور تعلیمی ادارے کی رجسٹریشن منسوخ کی جائے گی۔سبطین رضا نے مزید کہا کہ غیر نصابی سرگرمیوں اور پڑھائی کے نام پر فحاشی نہیں چلے گی۔تاہم ن لیگ کی رہنما کنول پرویز چوہدری اس جواب پر عدم اعتماد کا اظہار کرتے ہوئے اسے غلط بیانی قرار دے دیا۔واضح رہے کہ گزشتہ برس مارچ میں پنجاب اسمبلی میں قرار داد بھی منظور کی گئی تھی جس میں صوبے بھر کے تعلیمی اداروں میں رات گئے ہونے والے رقص کی محفلوں اور ڈی جے نائٹس پر پابندی لگانے کا مطالبہ کیا گیا تھا۔واضح رہے کہ پنجاب سمیت پاکستان کے چاروں صوبوں میں میں تعلیمی اداروں میں مختلف تقاریب کا انعقاد کیا جاتا ہے جن میں پڑھائی کی غرض سے سکول جانے والے بچوں سے رقص بھی کروایا جاتا ہے۔اس حوالے سے کئی تعلیمی اداروں کی ویڈیوز بھی سوشل میڈیا پر وائرل ہو چکی ہیں جس میں بچوں کو رقص کرتے ہوئے دیکھا گیا۔سوشل میڈیا پر ویڈیو وائرل ہونے کے بعد تعلیمی اداروں کے سربراہان پر خاصی تنقید کی گئی اور حکومت سے اس معاملے کا نوٹس لینے کی اپیل کی گئی تھی۔