ابوظبی(ویب ڈیسک) متحدہ عرب امارات میں کورونا وائرس کی روک تھام کے لیے جزوی کرفیو لگایا گیا ہے۔ حکام کی جانب سے عوام کو گھروں تک ہی محدود رہنے کی ہدایت کی گئی ہے، اور پابندی کی خلاف ورزی کرنے والوں کو جرمانے کی سزا سے ڈرایا جا رہا ہے۔ ایسے میں متحدہ عرب امارات کی سب سے بڑی ٹیلی کام کمپنی اتصالات نے عوام کو گھروں میں ہی رکھنے کے لیے ایک شاندار اعلان کر دیا ہے۔
اتصالات کی جانب سے خوشخبری سنائی گئی ہے کہ اس کے تمام صارفین کو اپریل اور مئی کے دو مہینوں کے دوران انٹرنیٹ آڈیو اور ویڈیو کالز مفت کرنے کی سہولت فراہم کر دی گئی ہے۔ اتصالات کی جانب سے صارفین کو بھیجے گئے ایس ایم ایس میں لکھا ہے ”اس مشکل کی گھڑی میں اپنے پیاروں سے رابطے میں رہنے کی خاطر، اپریل اور مئی کے مہینوں میں انٹرنیٹ کالنگ پلان کی سروس سبسکرائب کر لیجیے، جو بالکل مفت ہے۔اس سہولت کے تحت آپ مخصوص ایپس کی مدد سے مفت ویڈیو اور آڈیو کالز کر سکتے ہیں۔ یہ سہولت سبسکرائب کرنے کے لیے ‘ICP’ لکھ کر 1012پر بھیج دیں۔ گھروں پر اکٹھے مل بیٹھنا بہت ضروری ہے۔“ اتصالات کی جانب سے اس آفر کا مقصد لوگوں کو گھروں پر زیادہ سے زیادہ وقت گزارنے کی ترغیب دینا ہے جس دوران وہ اپنی وقت گزاری کے لیے مفت کی ویڈیو اورآڈیو کالز کر سکیں گے۔ اتصالات کی جانب صارفین کو پوسٹ پیڈ اور پری پیڈ موبائل کالنگ پلانز، موبائل کا بل کم رکھنے کی خاطر ڈیلی پلان اور ای لائف ہوم کا ماہانہ پلان بھی متعارف کرایا گیا ہے۔ اتصالات کے کسی بھی انٹرنیٹ کالنگ پلان کو سبسکرائب کرنے کے بعد صارفین BOTIM، HiU، Voice UAE اور C’Me جیسی ایپس کی مدد سے اپنے پیاروں کو آڈیو اور ویڈیو کالز کر سکیں گے۔

مسقط(ویب ڈیسک) خلیجی ریاست اومان میں بھی کورونا وائرس نے ڈیرے ڈال رکھے ہیں۔ مملکت میں اب تک کورونا کے سینکڑوں مریض سامنے آ چکے ہیں۔ جبکہ دو روز قبل کورونا کا ایک مریض جان کی بازی بھی ہار گیا ہے۔ مملکت میں کورونا سے نمٹنے کے لیے ایک اہم انتظامی فیصلہ لیا گیا ہے۔اومان کے صوبہ مطرہ کو مکمل طور پر لاک ڈاون کر دیا گیا ہے۔رائل اومانی پولیس کی جانب سے اعلان کیا گیا ہے کہ آج بدھ کے روز سے مطرہ میں مکمل لاک ڈاون کیا جا رہا ہے، تاکہ کورونا کے خطرے پر قابو پایا جا سکے، کیونکہ مطرہ میں کورونا کے مریضوں کی گنتی میں اضافہ ہو رہا ہے، جس کے پھیلاوکو دوسرے علاقوں میں روکنے کی خاطر یہ فیصلہ لیا گیا ہے۔ رائل اومانی پولیس کی جانب سے جاری ایک بیان میں کہا گیا ہے کہ کورونا کی روک تھام کی خاطر رائل اومان پولیس نے دیگر اداروں کے ساتھ مشاورت کے بعد مطرہ کو لاک ڈاون کرنے کا فیصلہ کیا ہے۔جس کے بعد مطرہ کو جانے والی تمام ٹریفک بند کر دی گئی ہے۔ جس سے رووی، ہمریو، وادی الکبیر اور درست کے کچھ علاقے متاثر ہوں گے۔ تاہم کھانے پینے کا سامان، ادویات و طبی آلات اور اشیائے ضروریہ کا سامان لے جانے والی گاڑیوں اور ٹرکوں کو داخلے کی اجازت ہو گی۔ تاہم مطرہ میں عوام اور تارکین وطن کا پیدل یا نجی گاڑیوں پر داخلہ ممنوع ہو گا، اسی طرح مطرہ سے بھی کوئی بھی شخص اور گاڑی باہر نہیں نکلنے دی جائے گی۔رائل پولیس کے ترجمان میجر محمد الہاشمی نے لوگوں کو ہدایت کی گئی ہے کہ وہ اس لاک ڈاون کے دوران اپنے گھروں میں ہی رہیں، غیر ضروری طور پر سڑکوں پر آنے سے اجتناب کریں، البتہ غذائی اشیاءاور ادویات کی خریداری اور کسی میڈیکل ایمرجنسی کی صورت میں باہر نکلنے کی اجازت ہو گی۔

کویت(ویب ڈیسک) کویت کو بھی اس وقت کورونا وائرس کی وبا کا سامنا ہے، جس کے باعث سینکڑوں افراد ہسپتالوں میں جا پہنچے ہیں، جبکہ کچھ افراد کی ہلاکت بھی ہو چکی ہے۔ کویتی حکام کی جانب سے کورونا کی روک تھام کے لیے کئی اقدامات اٹھائے گئے ہیں، جن میں کرفیو کا نفاذ اور کاروباری مراکز کی بندش بھی شامل ہے۔ کویتی اداکارہ حیات الفہد نے مملکت میں کورونا کی وبا کے دوران انتہائی متنازعہ ترین بیان دے ڈالا ہے۔کئی دہائیوں سے اداکاری کے جوہر دکھانے والی حیات نے مطالبہ کیا ہے کہ مملکت سے تمام تارکین وطن کو نکال دیا جائے۔ حیات کا کہنا تھا کہ مملکت میں مقیم غیر قانونی تارکین وطن ہی خرابی کی جڑ ہیں، انہی کی وجہ سے مملکت میں کورونا پھیل رہا ہے۔
جب تک انہیں نکالا نہیں جائے گا، کورونا سے نمٹنا دشوار ہی رہے گا۔ یہ بات انہوں نے ایک ٹی وی پروگرام میں ٹیلی فون پر آن لائن لیے جانے کے دوران کہی۔حیات نے تمام خرابیوں کی اصل وجہ غیر قانونی تارکین کو قرار دیا۔ حیات نے جذبات کی رو میں آ کر کہا ”ہماری برداشت ختم ہو گئی ہے۔ جب ہم کویتی لوگ بیمار پڑتے ہیں تو ہمارے لیے ہسپتالوں میں جگہ نہیں ہوتی۔ جن تارکین کو ان کے وطن والے واپس لینے کو تیار نہیں، ہم نے انہیں کیوں اپنی زمین پر جگہ دے رکھی ہے میں انسانیت کے خلاف نہیں، مگر ہم اب ایسے مقام پر آ گئے ہیں، جب برداشت کی حد ختم ہو گئی ہے۔انہیں کویت سے نکال باہر کرو۔“71 سالہ اداکارہ نے مزید کہا”اقامہ فروشوں نے ہمارا ملک تباہ کر دیا ہے۔ خصوصاً غیر قانونی تارکین کو ضرور واپس بھیجنا چاہیے۔ کویت ان کی بڑی تعداد کا متحمل نہیں ہو سکتا۔ “کویتی اداکارہ کی جانب سے یہ شدت بھرا بیان ایسے وقت میں دیا گیا ہے جب مملکت میں کورونا وائرس کی وبا کے دوران کچھ غیر ملکی کارکنان کی کرفیو کی خلاف ورزی کرنے اور اس کا مذاق اڑانے کی ویڈیوز بنا کر سوشل میڈیا پر وائرل کی گئیں۔تاہم سوشل میڈیا پر کویتی صارفین نے اداکارہ کو شدید تنقید کا نشانہ بنا ڈالا۔ ایک کویتی صارف عبداللہ الصالح نے اپنے ٹویٹ میں کہا ”ہم ایک انسانیت پرست مملکت ہونے کے دعوے دار کیسے ہو سکتے ہیں، اگر ہم اپنے ملک میں موجود تارکین وطن کو باہر پھینک دیں گے۔ “ایک اور کویتی صارف کا کہنا تھا کہ کویت میں موجود تارکین یونیورسٹی پروفیسرز، ٹیچرز، انجینئرز، پلمبرز اور الیکٹریشن کی اہم ذمہ داریاں نبھا رہے ہیں۔کویت کی تعمیر و ترقی میں ان کا کردار بہت اہم رہا ہے، ہمیں ان کا ناشکرگزار نہیں ہونا چاہیے۔“ جبکہ کچھ صارف نے حیات کی حمایت کرتے ہوئے کہا کہ اداکارہ نے صرف غیر قانونی تارکین کو باہر نکالنے کا مطالبہ کیا ہے۔ جن کی وجہ سے مملکت کو نقصان پہنچ رہا ہے۔ اصل مجرم وہ لوگ ہیں جو انہیں غیر قانونی طریقے سے یہاں لاتے ہیں۔ واضح رہے کہ کویت کی 43 لاکھ کی آبادی میں تارکین وطن کی تعداد 30 لاکھ کے لگ بھگ ہیں۔

ریاض(ویب ڈیسک) ممتاز سعودی عالم دین ڈاکٹر عبداللہ بن محمد المطلق نے اپنے ایک تازہ ترین فتویٰ میں کہا ہے کہ اگر کوئی خاتون اپنے خاوند کو کورونا وائرس کے ڈر سے جسمانی طلب کی صورت میں قریب نہیں آنے دیتی، تو اسے شرعاً ایسا کرنے کی اجازت ہو گی۔ جبکہ ایسی خاتون پر بھی کوئی گناہ نہ ہو گا جو اپنے ہونے والے خاوند سے اس بناءپر شادی سے انکار کر دے کہ وہ موجود کورونا کی وبا کے دوران بھی خود کو گھر تک محدود نہیں رکھتا ہے۔کیونکہ ایسے شخص کے کورونا سے متاثر ہونے کے امکانات بڑھ جاتے ہیں۔ سعودی سپریم علماءکونسل کے اہم رکن اور ایوانِ شاہی کے مشیر ڈاکٹر المطلق نے مسلمان مردوں کو تلقین کی کہ وہ خدا کا خوف کرتے ہوئے خود کو گھروں تک ہی محدود رکھیں تاکہ کورونا وائرس کے خدشے کے پیش نظر ان کی بیویاں اور گھر والے خوف اور پریشانی میں مبتلا نہ ہوں۔ڈاکٹر المطلق سعودی ٹی وی چینل کے مذہبی پروگرام فتاویٰ میں عوام کے سوالات کا جواب دے رہے تھے، جب ایک خاتون کالر نے ان سے سوال کیا ”میرا خاوند کورونا کی موجودہ وبا کے دِنوں میں بھی گھر پر ٹِک کر نہیں بیٹھتا اور زیادہ وقت باہر ہی گزارتا ہے۔اسے حکومتی احکامات کی بھی پرواہ نہیں ہے۔ جس کے باعث میں اپنی اور بچوں کی صحت اور زندگی کے حوالے سے بہت زیادہ فکر مند ہوں، یہاں تک کہ خاوند کے ساتھ سونا بھی ترک کر دیا ہے۔ کیا میں ایسا کر کے کسی گناہ کی مرتکب ہو رہی ہوں؟“ اس سوال کے جواب میں ڈاکٹر المطلق نے خاتون سے کہا ”آپ بالکل گناہ گار نہیں ہو۔ بلکہ آپ تو اپنی حفاظت کر رہی ہو۔ کیونکہ یہی فرمانِ خداوندی ہے کہ اپنے آپ کو ہلاکت میں مت ڈالو۔تمہارا رب بہتر رحیم ہے۔“ ڈاکٹر المطلق نے مزید کہا ”آپ خاوند کی بات (کورونا کے) خوف کی وجہ سے نہیں مان رہیں۔ اگر وہ آپ کی بات مان کر گھر پر بیٹھ کر اپنی جان کو محفوظ نہیں بناتا، تو آپ اپنی حفاظت کی خاطر خود کو اس سے دور ہی رکھیں۔ اگر وہ باز نہیں آتا تو کسی شبہے کی صورت میں اسے 14 روز کے لیے قرنطینہ میں منتقل کروا دیں۔“شیخ المطلق نے وضاحت پیش کی کہ اگر کوئی خاوند اپنی بیوی بچوں اور خاندان کی صحت اور زندگیوں کے تحفظ کو نظر انداز کرتے ہوئے محافل اور اجتماعات میں شریک ہوتا ہے، تو پھر اس کی بیوی کو اس سے جسمانی دور ی اختیار کرنے پر قطعاً کوئی گناہ نہیں ہو گا۔ہم ایسے نادان خاوندوں کو تلقین کرتے ہیں کہ وہ اللہ سے ڈریں، کرفیو کی خلاف ورزی نہ کرتے ہوئے گھر پر ہی وقت گزاریں۔ تاکہ ان کی بیویوں اور گھر والوں کو ذہنی اذیت کا شکار نہ ہونا پڑے۔

دبئی(ویب ڈیسک)دبئی سمیت متحدہ عرب امارات میں کورونا کی روک تھام کے لیے کئی اقدامات اٹھائے جا رہے ہیں، جن کے خاطر خواہ نتائج بھی سامنے آ رہے ہیں اور مملکت میں باقی دنیا کی نسبت کورونا کے مریضوں کی شرح میں تیزی سے اضافہ نہیں ہو رہا۔ دبئی کی حکومت نے ایک اور اہم اعلان کر دیا ہے جس کے تحت ریاست بھر میں منی بسیں چلانے پر پابندی عائد کر دی گئی ہے۔روڈزاینڈ ٹرانسپورٹ اتھارٹی کی جانب سے ایک سرکلر جاری کیا گیا ہے جس کے مطابق دبئی کے تمام علاقوں میں منی بسیں چلانے پر پابندی ہو گی، پابندی کا اطلاق تمام ٹرانسپورٹ کمپنیوں اور بس رینٹل کمپنیوں پر ہو گا۔ سرکلر میں ہدایت کی گئی ہے کہ منی بسوں میں مسافر بٹھانے پرپابندی لگائی گئی ہے، یہ پابندی تاحکم ثانی لاگو رہے گی۔روڈز اتھارٹی کے مطابق منی بسیں چلانے پر پابندی کا مقصد مملکت میں مقیم تمام افراد کو کورونا وائرس کی وبا سے محفوظ رکھنا اور اس کی روک تھام کرنا ہے۔ اس وقت جو سرکاری اور نجی ٹرانسپورٹ چلائی جا رہی ہے، ان کی انتظامیہ اور ڈرائیورز کو بھی ہدایت کی گئی ہے کہ وہ مسافروں کو پہلے کی طرح ساتھ ساتھ نہیں بٹھائیں گے بلکہ انہیں مخصوص فاصلے پر بٹھایا جائے گا۔ تاکہ کورونا سے متاثرہ کسی مسافر سے موذی وائرس دیگر مسافروں میں منتقل ہونے کا امکان کم سے کم ہو جائے۔ گزشتہ روز دبئی کا علاقہ الرّاس دو ہفتوں کے لیے مکمل طور پر آمد و رفت کے لیے بند کر دیا گیا ہے۔ دبئی ڈیزاسٹر مینجمنٹ کمیٹی کی جانب سے بتایا گیا ہے کہ الرّاس کے گنجان آباد علاقے کو بند کرنے کا مقصد یہاں پر سٹیریلائزیشن مہم کو پوری طرح موثر اور کامیاب بنانا ہے، کیونکہ عام دنوں میں لوگوں کا رش ہونے کے باعث اس علاقے میں صفائی ستھرائی کی مہم فعال طریقے سے انجام نہیں دی جاسکتی، اسی لیے اس علاقے کو لاک ڈاون کر دیا گیا ہے۔آج کے روز سے بند ہونے والے الرّاس کے علاقے کے رہائشیوں کو خوراک، ادویہ اور دیگر ضروری سامان پہنچانے کی ذمہ داری دبئی ہیلتھ اتھارٹی کی جانب سے نبھائی جائے گی۔دبئی ٹرانسپورٹ اتھارٹی نے اعلان کیا ہے کہ اگلے چودہ روز تک دبئی گرین لائن کے تین اسٹیشنز الرّاس، پام ڈیرہ اور بنی یاس سکوائر بھی بند کر دیئے گئے ہیں۔ان تینوں اسٹیشنز پر بھی سٹریلائزیشن کے دوران جراثیم کش ادویہ کا سپرے کیا جائے گا۔اس کے علاوہ الرّاس کو جانے والی شاہراہیں اور انٹرچینجز کو بھی بند کر دیا گیا ہے۔ روڈز اتھارٹی کی جانب سے ایک ٹویٹ میں کہا گیا ہے کہ میٹرو اسٹیشنز کی بندش کا یہ فیصلہ مسافروں کی زندگی اور صحت کے تحفظ کو یقینی بنانے کی خاطر کیا گیا ہے۔

ریاض(ویب ڈیسک) کورونا کی وبا نے دنیا کی سپر پاور امریکا کو بھی گھٹنے ٹیکنے پر مجبور کر دیا ہے۔ ریاست ہائے متحدہ امریکا میں کورونا سے متاثر افراد کی تعداد ایک لاکھ کے قریب پہنچ گئی ہے جبکہ ایک ہزار سے زائد افراد جان کی بازی بھی ہار گئے ہیں۔ اس صورت حال نے دیگر ممالک میں موجود امریکیوں کو بھی شدید خوف زدہ کر دیا ہے۔ایک ایسا ہی امریکی رینڈی وارٹن ان دنوں سعودی شہر الجبیل میں مقیم ہے۔ رینڈی نے وطن واپس جانے سے صاف انکار کر دیا ہے۔ اس نے امریکی حکومت کو مخاطب کرتے ہوئے کہا ہے کہ وہ موجودہ حالات میں کسی صورت امریکا واپسی کی حماقت نہیں کرے گا۔ اردو نیوز کے مطابق رینڈی وارٹن کی ایک گھنٹے پر محیط وڈیو کلپ ٹویٹر پر وائرل ہوئی ہے۔جس کی اصل رپورٹ امریکی نشریاتی ادارے سی این این نے نشر کی ہے۔اپنی طویل ویڈیو میں رینڈی سعودی عرب سے امریکیوں کو واپس بلائے جانے سے متعلق رپورٹوں پر اپنے تحفظات کا اظہارکرتے ہوئے کہتا ہے ”کیا آپ لوگ وہ سب کچھ دیکھ رہے ہو جو سعودی عرب کررہا ہے؟ سعودی شاندار کام کر رہے ہیں۔ میں بہرحال یہاں بہت اچھی جگہ پر ہوں۔میں امریکہ واپس لے جانے والے کسی بھی طیارے پر سوار نہیں ہوں گا۔ یہ تو ایک طرح کی سزا ہوگی یہ کوئی اچھی بات نہیں ہوگی۔بہتر ہوگا کہ آپ کورونا سے نمٹنے کی تیاری کریں۔“ امریکی شہری رینڈی کا مزید کہنا تھا ’ ’امریکیوں کو سعودی عرب سے نکال کر کیوں لے جایا جائے گا؟ اس وقت امریکہ دنیا بھر میں کورونا کی وبا سے سب سے زیادہ متاثر ملک ہے۔ اس وقت سعودی عرب چھوڑ کر جانا بے وقوفی ہوگی۔سعودی اخبار میں امریکی سفارتخانے کے حوالے سے یہ خبر شائع ہوئی ہے کہ امریکی حکومت اپنے شہریوں کو سعودی عرب سے واپس لے جانے کا پروگرام بنا رہی ہے۔یہ نامعقول بات ہے۔ میں واپس نہیں جانا چاہتا- مملکت میں ہی رہوں گا۔ اس وقت امریکہ جانا بے وقوفی ہے۔“سی این این کی جانب سے وائرل ہونے والی وڈیو پر سعودی شہریوں کے تبصرے بھی شائع کیے ہیں۔ ایک سعودی صارف ابراہیم القحطانی نے ٹویٹ کیا ہے کہ ’سعودی عرب دنیا کی واحد ریاست ہے جو نئے کورونا وائرس کے ماحول میں بیرون ملک مقیم اپنے شہریوں سے دستبردار نہیں ہوئی۔“ جبکہ قاسم الزرعی نے ٹویٹ میں امریکی شہری کے اس بیان پر خوشی کا اظہار کیا کہ وہ سعودی عرب میں خوش ہے اور یہاں کورونا کے حوالے سے کیے جانے والے انتظامات بہتر ہیں-

ریاض(ویب ڈیسک) سعودی مملکت میں کوروناکا وائرس بے قابو ہو گیا ہے۔ مملکت میں اس وقت پندرہ سو کے لگ بھگ کورونا کے مریض ہیں جبکہ شبہ ظاہر کیاجا رہا ہے کہ مزید سینکڑوں افراد کورونا سے متاثر ہو سکتے ہیں، جن کے ٹیسٹ کی رپورٹ آنے کے بعد ہی صورت حال واضح ہو گی۔ کورونا کے باعث مملکت بھر میں معاشی اور کاروباری سرگرمیاں ٹھپ ہو کر رہ گئی ہیں۔جس کے باعث تارکین اور مقامی افراد دونوں بری طرح متاثر ہوئے ہیں۔ ایسے بحرانی دور میں سعودی عرب کی موبائل کمپنیوں نے اعلان کیا ہے کہ وہ کورونا سے متاثرہ افراد اور اس موذی مرض میں شبہے کی بناءپر قرنطینہ بھیجے جانے والے موبائل صارفین سے اپریل 2020ءکا بل وصول نہیں کریں گی۔ سعودی اخبار 24 کے مطابق سعودی عرب کی تین بڑی موبائل کمپنیوں موبائلی، ایس ٹی سی اور زین نے اعلان کیا ہے کہ قرنطینہ میں بھیجے جانے والے صارفین کو اپریل کا بل معاف ہو گا۔یہ رعایت سعودی اور تارکین وطن کارکنان دونوں کے لیے دی گئی ہے۔سعودی موبائل کمپنیوں کا کہنا ہے کہ مخصوص صارفین کو یہ سہولت کورونا کے باعث پیدا ہونے والے حالات اور سعودی حکومت اور اداروں کی جانب سے اس موذی مرض کی روک تھام کی مہم کا ساتھ دینے کی خاطر کی جا رہی ہے۔ واضح رہے کہ گزشتہ رات تک سعودی عرب میں کورونا وائرس کے 110 نئے کیسز سامنے آگئے ہیں۔نئے کیسز سامنے آنے کے بعد مملک میں متاثرہ افراد کی مجموعی تعداد 1563 ہوگئی ہے جبکہ قرنطینہ میں رکھے گئے 400 افراد کو کلیئر قرار دیدیا گیا ہے۔ وزارتِ صحت نے مزید بتایا ہے کہ مملکت میں 50 افراد صحتیاب ہوکر گھروں کو چلے گئے ہیں جس کے بعد صحتیاب ہونے والے مریضوں کی تعداد 165ہوگئی ہے۔سعودی گزٹ کے مطابق ایئرپورٹس پر آئے سینکڑوں افراد کو جدہ میں 14 دن تک قرنطینہ میں رکھا گیا تھا۔جن میں سے 400 افراد کو گزشتہ روز کورونا وائرس سے کلیئر قرار دے کر انہیں گھروں کو جانے کی اجازت دے دی گئی۔ان تمام افراد میں کورونا وائرس کی تصدیق نہیں ہوئی۔ جدہ میں قرنطینہ سے نکلنے والے پہلے گروپ کے واپس جاتے وقت وزارت صحت کے عہدے داروں کی جانب سے خصوصی تقریب کا اہتمام کیا گیا۔ ان افراد پر پھولوں کی پتیاں نچھاور کی گئیں اور انہیں تحائف بھی دیئے گئے۔