کوئٹہ میں گرانفروشوں کی من مانی، ٹماٹر، لیموں اور کھیرے کی قمیتوں میں ریکارڈ اضافہ

کوئٹہ : (ویب ڈیسک) کوئٹہ میں گرانفروشوں کی من مانی کے سبب ٹماٹر ،لیموں اور کھیرے کی قمیتوں میں ریکارڈ اضافہ ہو گیا، سبزیاں مہنگی فروخت کرنے والوں سے کوئی پوچھنے والا نہیں، انتظامیہ اور پرائس کنٹرول کمیٹی کہیں دکھائی نہیں دے رہی۔
کوئٹہ میں مہنگائی نے سبزی منڈی کو بھی لپیٹ میں لے لیا، رمضان شروع ہوتے ہی روز مرہ استعمال ہونے والی سبزیوں کے نرخ آسمان پر پہنچ گئے،شہر کے مختلف علاقوں میں چالیس سے پچاس روپے میں فروخت ہونےوالے ٹماٹر فی کلو 180 روپے تک بکنے لگے ہیں۔
رمضان المبارک میں ہر اک کی خواہش ہے کہ افطاری کےوقت توانائی کی بحالی کے لئے لیموں پانی اور کھانے کےلئے دسترخوان پر سلاد ہو، 100 روپے فی کلو بکنےوالے لیموں 400 روپے فی کلو اورکھیرا 80 روپے اضافے کے بعد 120 روپے میں فروخت ہونے لگا ہے۔
شہریوں کا گلہ ہے کہ گراں فروشوں نے ماہ رمضان میں اپنا کاروبار چمکا رکھا ہے جبکہ ضلعی انتظامیہ کی جانب سے پرائس کنٹرول کمیٹیاں نظر تک نہیں آرہیں اور ان کی کیفیت گدھے کے سر پر سینگ جیسی ہے۔