اسلام آباد: (ویب ڈیسک) قومی سلامتی کمیٹی نے واضح کیا ہے کہ پاکستان کو للکارنے والوں کو پوری قوت سے جواب دیا جائے گا، قومی مفادات پر کوئی آنچ نہیں آنے دی جائے گی۔
قومی سلامتی کمیٹی (این ایس سی) کا اہم اجلاس جمعہ کو وزیراعظم شہبازشریف کی زیرصدارت منعقد ہوا۔ اجلاس میں وفاقی وزراء، سروسز چیفس اورانٹیلی جنس اداروں کے سربراہان نے شرکت کی۔ وزیراعظم آفس کے پریس ونگ سے جاری بیان کے مطابق اجلاس نے ملکی معیشت اور امن وامان کا تفصیل سے جائزہ لیا۔
وزیرخزانہ اسحاق ڈار نے ملک کی معاشی صورتحال اور چیلنجز سے آگاہ کیا اور اس ضمن میں حکومت کی طرف سے اختیار کی گئی معاشی حکمت عملی اور اقدامات کے بارے میں شرکاءکو بریفنگ دی۔ انٹیلی جنس اداروں نے ملک میں امن وامان کی مجموعی صورتحال پر بریفنگ دی اور دہشت گردی کی حالیہ لہر سے متعلق عوامل اور ان کے سدباب کے اقدامات سے اجلاس کو آگاہ کیا۔
وزیر مملکت خارجہ حنا ربانی کھر نے افغانستان کی صورتحال پر اجلاس کو بریفنگ دی اور پاکستان کے افغانستان کی عبوری حکومت سے ہونے والے رابطوں سے آگاہ کیا۔
اجلاس نے دوٹوک رائے کا اظہار کیا کہ پاکستان کے قومی مفادات پر کوئی آنچ نہیں آنے دی جائے گی اور نہ ہی کسی کو بھی قومی سلامتی کے کلیدی تصور کو نقصان پہنچانے کی اجازت دیں گے۔ پاکستان کی بقا، سلامتی اور ترقی کے بنیادی مفادات کا نہایت جرات وبہادری، مستقل مزاجی اور ثابت قدمی سے تحفظ کیاجائے گا۔
اجلاس نے دہشت گردی کے خلاف شہداءکی عظیم قربانیوں کو خراج عقیدت پیش کرتے ہوئے ان کے اہل خانہ سے ہمدردی اور تعزیت کا اظہار کیااور شہداءکے درجات کی بلندی کے لئے اجتماعی دعا کی۔
اجلاس کے شرکاء نے کہا کہ دہشت گردپاکستان کے دشمن ہیں اور اس عزم کا اظہار کیا کہ پوری قوم دہشت گردی اور دہشت گردوں کے خلاف ایک بیانیہ پر متحد ہے، پاکستان کو للکارنے والوں کو پوری قوت سے جواب ملے گا۔ نیشنل سکیورٹی کمیٹی (این ایس سی) کا اجلاس 2 جنوری 2023کو جاری رہے گا جس میں سامنے آنے والی تجاویز کی روشنی میں مزید فیصلے کئے جائیں گے۔

اسلام آباد: (ویب ڈیسک) اسلام آباد ہائی کورٹ نے وفاقی دارالحکومت میں بلدیاتی انتخابات کل کروانے کا حکم دے دیا۔
اسلام آباد ہائیکورٹ نے محفوظ فیصلہ سناتے ہوئے بلدیاتی انتخابات کل 31 دسمبر کو کرانے کا حکم جاری کر دیا۔ عدالت نے حکم دیا کہ الیکشن کمیشن 101 یونین کونسلز پر 31 دسمبر ہی کو الیکشن کرائے۔
کیس کی سماعت کے دوران الیکشن کمیشن نے اسلام آباد میں 101 یونین کونسلز پر 7 سے 10 دن میں بلدیاتی الیکشن کے انعقاد پر رضامندی ظاہر کی تھی۔ جس پر عدالت نے کیس کا فیصلہ محفوظ کیا تھا۔
کیس کی سماعت کے دوران وفاق کی جانب سے ایڈیشنل اٹارنی جنرل منور اقبال دوگل اور ڈپٹی اٹارنی جنرل جبکہ پی ٹی آئی وکیل سردار تیمور اسلم پیش ہوئے۔ اس موقع پر ڈی جی الیکشن کمیشن بھی دیگر حکام کے ساتھ عدالت میں موجود تھے۔
یہ بھی پڑھیں: سندھ میں غیر قانونی مقیم افراد کو واپس بھجوانے کا فیصلہ
پی ٹی آئی کے وکیل سردار تیمور نے دلائل دیتے ہوئے کہا کہ الیکشن سے صرف 11 دن پہلے یونین کونسلز کی تعداد بڑھائی گئی اور اتنا بڑا فیصلہ کرنے سے پہلے الیکشن کمیشن سے مشورہ تک نہیں کیا گیا۔ الیکشن کمیشن نے ابتدائی طور پر حکومتی فیصلہ نہیں مانا تھا اور مؤقف اختیار کیا کہ نیا نوٹیفکیشن موجودہ شیڈولڈ الیکشن پر لاگو نہیں ہوگا۔

کراچی: (ویب ڈیسک) سندھ حکومت نے صوبے میں غیر قانونی طور پر مقیم افراد کو واپس اپنے ملک بھجوانے کا فیصلہ کر لیا۔
سندھ کے وزیر اطلاعات شرجیل انعام میمن نے پریس کانفرنس کرتے ہوئے کہا کہ افغانیوں کو ملک بدر کرنے کے لیے جو ہمارا قانون و آئین کہے گا ہم وہی کریں گے اور جو بھی کوئی ملک میں غیر قانونی رہ رہا ہے انہیں ملک بدر کریں گے۔
انہوں نے کہا کہ کسی بھی فرد کو اس وقت تک جیل میں نہیں رکھا جاسکتا جب تک عدالت حکم نہ دے اور 3 روز سے ایک تصویر وائرل کی جا رہی ہے جس کی وضاحت کرنا ہے کہ تصویر سے متعلق کہا گیا کہ یہ لانڈھی اور ویمن جیل ہے لیکن تصویر سندھ کے کسی بھی جیل کی نہیں ہے اور نہ ہی افغان بچے زیرحراست ہیں۔
شرجیل میمن نے کہا کہ 129 غیر ملکی خواتین غیر قانونی طریقے سے رہائش پذیر ہیں اور 178 غیر ملکی بچے جو قیدی نہیں ہیں۔ قانون کے مطابق کم عمر بچے کو والدین کے ساتھ جیل میں رکھا جاتا ہے لیکن وہ قیدی نہیں ہوتے اور عدالت کے احکامات پر ملزمان کو جیل بھیجا جاتا ہے۔ کسی بھی بچے کو سزا نہیں ہوئی ہے اور عدالت نے انہیں والدین کے ساتھ رہنے کا حکم دیا ہے۔
انہوں نے کہا کہ سندھ کے جیلوں میں افغانیوں کی تصاویر دکھائی گئیں اور 7 سال سے کم عمر کے بچوں کو جیل میں رکھا تو جاتا ہے لیکن وہ مجرم کے طور پر نہیں رہتے۔ پوری دنیا میں مہنگائی کا طوفان ہے تاہم سندھ حکومت عوام کو ریلیف کی فراہمی کی کوششیں کر رہی ہے۔
صوبائی وزیر اطلاعات نے کہا ہے کہ پورے ملک میں سندھ حکومت کی جانب سے سبسڈی دے کر 65 روپے فی کلو آٹا فراہم کیا جا رہا ہے اور سندھ میں سستے آٹے کی سپلائی مارچ تک جاری رہے گی۔
انہوں نے کہا کہ پیپلز پارٹی بلدیاتی الیکشن کے لیے مکمل تیار ہے اور الیکشن مقررہ وقت پر ہی ہونا چاہیے۔

اسلام آباد: (ویب ڈیسک) پاکستان پیپلز پارٹی کی سینئر رہنما اور سینیٹر شیری رحمان نے کہا ہے کہ تمام منصوبے ناکام ہونے کے بعد پاکستان تحریک ‘احتجاج’ پھر مظاہرے کرنے جا رہی ہے، ان کی ترجیح صرف سیاست میں اِن رہنا ہے، ان کے پاس احتجاج کے علاوہ کوئی آپشن نہیں بچا۔
سماجی رابطے کی ویب سائٹ ٹوئٹر پر اپنے پیغام میں شیری رحمان نے کہا کہ پی ٹی آئی میں پارلیمانی اپوزیشن کا کردار ادا کرنے کی صلاحیت نہیں، لوگ اب ان کے طرز سیاست سے تنگ آچکے ہیں۔
رہنما پیپلز پارٹی کا کہنا تھا کہ ملک میں ابھی بھی 2 کروڑ سیلاب زدگان کو فوری امداد کی ضرورت ہے، پی ٹی آئی سندھ اور بلوچستان کے کروڑوں سیلاب متاثرین کو پٖیغام دے رہی ہے کہ آپ نہیں عمران خان کی سیاست اہم ہے، دہشت گردی کے واقعات میں اضافہ ہو رہا ہے، ان کو سیلاب زدگان اور بڑھتی ہوئی دہشتگردی سے کوئی سروکار نہیں۔
شیری رحمان نے کہا کہ پاکستان تحریک انصاف کی ترجیح صرف اور صرف سیاست میں اِن رہنا اور ہیڈ لائنز بنانا ہے، 2 شارٹ مارچ، استعفوں اور اسمبلیاں تحلیل کرنے کی دھمکی میں ناکامی ہوئی، ان کے پاس احتجاج کے علاوہ کوئی آپشن نہیں بچا۔
اپنے پیغام میں سینیٹر نے کہا کہ پاکستان تحریک احتجاج ملک نہیں چلا سکی، ان میں پارلیمانی اپوزیشن کا کردار ادا کرنے کی صلاحیت نہیں ہے، انہوں نے بس تقسیم،گالم گلوچ،الزام تراشی اور کنٹینر کی سیاست کرنی ہے، ان کی سیاست کا محور ملک اور عوام نہیں، عمران خان کا ذاتی مفاد ہے۔

اسلام آباد: (ویب ڈیسک) وفاقی وزیر قانون اعظم نذیر تارڑ نے ٹیکنو کریٹ سیٹ اپ کو غیر آئینی قرار دے دیا ۔
وفاقی وزیر قانون اعظم نذیر تارڑ نے کہا کہ آئین میں ٹیکنو کریٹ حکومت کی کوئی گنجائش نہیں ، آئین میں واضح ہے اگروقت سے پہلے اسمبلیاں تحلیل ہو جاتی ہے تو 90 روز میں الیکشن ہوں گے۔
وفاقی وزیر کا کہنا تھا کہ کسی کی خواہش اور سوچ پر پابندی نہیں لگائی جاسکتی، ملک کی معیشت کے لئے آئین کے اندر رہ کر اقدامات اٹھائے جا سکتے ہیں۔
خیال رہے کہ پاکستان تحریک انصاف (پی ٹی آئی) نے ٹیکنوکریٹ سیٹ اپ کو ماورائے آئین قرار دے کر اس ممکنہ قدم کی بھرپور مزاحمت کا اعلان کررکھا ہے ۔